Գյումրիում սուբվենցիոն ծրագրով փողոցներ են նորոգվում առանց կոմունիկացիոն ցանցի ուսումնասիրման

Գյումրիի Նորավան թաղամաս անվանումը համահունչ չէ տարածքի փողոցների այն խնդիրներին, որոնք 30 տարուց ավելի է տանջում են բնակիչներին։ Բաղրամյան և Հունան Ավետիսյան փողոցների սեփական տներում  կոյուղատար ցանց գոյություն չունի, բակերում սեպտիկ հորեր են փորել ու այսկերպ կարգավորել սանհանգույցի հարցերը։

Այնպես չէ, որ Նորավանը կոյուղատար համակարգ չի ունեցել: Այն բոլոր ենթակառուցվածքներով ապահոված  թաղամաս է, ունի մանկապարտեզ, հանրակրթական ու երաժշտական դպրոցներ, որոնք ունեն կոյուղատար համակարգ։ Մանկապարտեզից ընդամենը 100 մետր հեռավորության վրա գտնվող եղած ու միակ կոյուղատարը 50 տարի առաջ է կառուցվել, որն էլ նորմալ չի գործում, խցանված է:

Եվ հիմա Հունան Ավետիսյան փողոցում սուբվենցիոն ծրագրով նորոգումներ են սկսվել։ Ընդամենը 250 մետր  երկարության փողոց է ասֆալտապատվելու։ Ներքին կոմունիկացիոն ցանցի վիճակն առանց ուսումնասիրելու, շինարարը խճապատում է արել ու անցել եզրաքարերի տեղադրմանը, ինչից էլ սկսվել են բնակիչների դժգոհությունները։

Պատվիրատուին՝ քաղաքապետարան, բողոքներն հասել են։ Կոմունալ բաժնի պետը բացատրություններ տվել է, որ սուբվենցիոն ծրագրի նախագծանախահաշվային փաթեթը կազմելիս ներքին ցանցերի նորոգումները ծրագրային բաղադրիչ չեն համարվում։

Համայնքային բյուջեների համաֆինանսավորման պայմանը պատճառներից մեկն է, որ փողոցների նորոգման ծրագրերում ենթակառուցվածքների վերանորոգումները առաջնահերթ խնդիր չեն դառնում, ֆինանսական հնարավորություններն են սուղ։ Իսկ բացառություններ, փաստորեն կարող են լինել, երբ բնակիչների բողոքներն արձագանք են ստանում։ Պատվիրատուն ու շինարարը համաձայնության են եկել փոխել շիննախագիծը և Հունան Ավետիսյան փողոցի բնակիչների համար կոյուղատար  ցանց կառուցել, որի համար պահանջվող լրացուցիչ ծախսերը կփակվեն տեղական բյուջեի միջոցներով։

«Նախնական հաշվարկներով երկուսուկես միլիոն դրամ է պետք Հունան Ավետիսյան փողոցում 4 դիտահոր, 75 գծամետրի վրա, 300 միլիմետրանոց տրամագծով խողովակաշարեր անցկացնելու համար։ Մենք խոսել ենք բնակիչների հետ, եկել ենք համաձայնության, որ քաղաքապետարանը փողոցում կենտրոնական կոյուղատար ցանցը կանցկացնի, իսկ բնակիչներն իրենց միջոցներով իրենց տան միացումները կտանեն։ Այս ամբողջ աշխատանքները կատարելու է քաղաքապետարանը, ջրմուղը ոչ մի պարտավորություն չունի»,- SHANTNEWS.am-ի հետ զրույցում ասել է Գյումրիի քաղաքապետարանի կոմունալ բաժնի պետ Կնյազ Մանասյանը։

Փողոցում չափ ու ձև շինարարն արդեն կատարել է, 250 մետր երկարության փողոցում կոյուղատար անցկացնելու համար կպահանջվեն 300 միլիմետր տրամագծով խողովակներ, փողոցի վրա կկառուցվի 4 դիտահոր: Գյումրիում ևս 10-ը փողոց կա, որոնք կոյուղի չունեն, բայց այս պահին դրանցից որևէ մեկը փողոցաշինական ծրագրերում չէ։