Ինչպե՞ս է Լենինականի նախկին Կոմերիտմիության այգու՝ կանաչ գոտու գործառնական նշանակությունը փոխվել ու տարածքը վաճառվել

Լենինականի նախկին Կոմերիտմիության այգու հատակագիծը ՀՀ վաստակավոր նկարիչ, քանդակագործ Սամվել Պետրոսյանի արխիվից է։ Այգու նշանակության մասին հիմա հիշեցնում է հուշարձանը, որը 1981-ին է տեղադրվել: «Ավետաբեր» է կոչվում հուշարձան-կոթողը, բայց ավելի շատ հայտնի է «Զոյա» անունով։ Վազգեն Սարգսյան 26/6 հասցեի երիտասարդական այգին 30տարուց ավելի է առաջվանը չէ։ Այն ինչպես քաղաքի շատ կանաչ տարածքներ, տնակային ավան է դարձել՝ համարակալումով։ 213 տնակային տարածքում շարունակում են տնակներում ապրել 3 ընտանիքներ։

Սանդուխտ Հովհաննիսյանը շուրջ 20 տարի աշխատել է Տեքստիլ կոմբինատում։ 1969 թվականին Լենինականի քաղսովետը ընտանիքին 3 սենյականոց բնակարան է հատկացրել: 88-ին կորցրել են ու նոր բնակարանի փոխհատուցում չեն ստացել։ 6 անձից բաղկացած ընտանիքը ԲԳՎ-ից հրաժարվել է, փոխհատուցման այլ տարբերակներից չեն օգտվել։ Կանաչ գոտում գտնվող ևս 2 տնակի բնակիչներն էլ անօթևանի կարգավիճակ չունեն: Ժամանակավոր կացարանները քարապատելու թույլտվություն ստանալու խնդրով շատ են դիմել քաղաքապետարան, բայց մերժվել են, պատճառաբանությամբ, որ տարածքը կանաչ գոտի է։

Տարածքը կանաչ գոտի է՝ ըստ քաղաքի գլխավոր հատակագծի։ Հողային օրենսգրքով ամրագրված է, որ կանաչ գոտիներում ժամանակավոր կացարանները կառուցապատելու կամ սեփականաշնորհելու իրավունք չի տրվում: Պարզվում է՝ բացառություններ լինում են, բայց ոչ բնակիչների օգտին: Կանաչ գոտու տարածքում ինչ-որ շինություն կառուցելու հիմքեր են փորվել: Սա է բնակիչներին զայրացրել, թե ինչպես է ստացվում, որ իրենց դեպքում կառուցապատումներն արգելվում են։

Այն, որ 2015 թվականին այգու գործառնական նշանակությունը փոխվել է, քաղաքի գլխավոր ճարտարապետն է հաստատում։ 5 տարի առաջ ընդունած որոշումը, սակայն, 3500 քառակուսի մետր տարածքից վերաբերում է 3000 քառակուսի մետրին։ Իսկ մնացած 500 քառակուսի մետրի վրա էլ հենց տնակներն են գտնվում։

2015 թվականից հողային նշանակությունը փոխած տարածքը մոտ մեկ ամիս առաջ գնել է «Դևելոփմենթս» ՍՊԸ-ն և արդեն հիմքի փորման  աշխատանքներ է կատարել, որից ոչ միայն բնակիչներն են դժգոհ, նաև հուշարձանի հեղինակը։ Սամվել Պետրոսյանը ասում է՝ վնասել են պատվանդանի սալաքարերը, պոկել են ու լցրել են արձանի շուրջ։ Բացի վնասումներից, հեղինակը բողոքում է, որ հուշարձանը պատրաստվում են տարածքից տեղափոխել։

Քանդակագործը հուշարձանի տեղափոխման համաձայնություն չի տալիս։ Տարածքային վեճը հուշարձանի ու տնակների շուրջ արձանի հեղինակն ու տնակների բնակիչները հասցրել են նաև մարզպետարան, հանդիպումներ են ունեցել Շիրակի մարզպետի հետ։ Հանդիպումների վերջնարդյունքում թե ինչ որոշում կկայացվի, բնակիչները դեռ պետք է սպասեն։

Իսկ մինչ այդ՝ դեռ հունիս ամսին, Շիրակի  մարզպետը գրություն է ուղարկած եղել քաղաքապետարան, որտեղ նշված է, որ սկսված շինարարությունը հակասում է քաղաքի գլխավոր հատակագծին ու այն կասեցման ենթակա է: Ավելին, նույն գրության մեջ նաև նշված է, որ 2015 թվականին տրված փաստաթուղթն ու կառուցվող օբյեկտի նախագծային փաթեթը ՀՀ օրենսդրությամբ սահմանված կարգով համաձայնեցման գործընթացի համար հիմք չի կարող հանդիսանալ: