Ադրբեջանում պետք է հասկանան՝ եթե դիմեն արկածախնդրության, դա լինելու է իրենց պետության վերջը. Դավիթ Բաբայան

Արցախի նախագահի մամուլի քարտուղար Դավիթ Բաբայանը Ադրբեջանի պաշտպանության նախարար Զաքիր Հասանովի ռազմատենչ հայտարարություններում նոր բան չի տեսնում: SHANTNEWS.am-ի հարցին՝ արդյո՞ք իրողություն է փոխվել, որը թույլ է տալիս խոսել միջազգային հարմար իրադրության պահին հարձակվելու մասին, նա պատասխանեց.

«Գիտեք, Ադրբեջանը երբեք իր նենգ ծրագրից չի հրաժարվել, դրա համար մենք երբեք պետք է չզարմանանք կամ ասենք՝ ինչ է փոխվել. ոչ մի բան չի փոխվել, ունենք թշնամիներ՝ աննորմալ, հայատյաց, մարդատյաց, ֆաշիստական գաղափարախոսությամբ և աշխարհընկալմամբ, ովքեր պարբերաբար դիմում են սադրանքների»:

Սահմանին առկա կուտակումներին անդրադառնալով՝ Բաբայանը նշեց, որ իրենք բազմիցս հայտարարել են՝ ապրիլ ամսից ադրբեջանական զորքի կուտակումներ են սահմանի երկայնքով, որ կա տեղաշարժ: Արցախի նախագահի խոսնակը նշեց, որ համապատասխան քայլերը ձեռնարկվում են և ձեռնարկվելու են այսուհետ ևս, որպեսզի կայունությունն ու խաղաղությունը տարածաշրջանում պահպանվի:

«Հակառակորդը միշտ պետք է իմանա, որ մենք ավելի ուժեղ ենք, որ եթե դիմի արկածախնդրության, ստիպված կապիտուլյացիայի համաձայնագիր է ստորագրելու Բաքվում: Հասկանալով պատերազմի ողջ ծանրությունը, չվախենալով դրանից, պարզապես պատերազմ տեսած ժողովուրդը չի ուզում նորից այդ արհավիրքներով անցնել, անհրաժեշտ է խաղաղ ձևով կարգավորել այդ հակամարտությունը»,- ասաց նա:

Բաբայանը նշեց՝ ադրբեջանական հասարակության մասին միանշանակ չի կարող պնդել, որ պատերազմ են ուզում, որովհետև հասարակ մարդիկ չեն ուզում պատերազմել, ուզում են օլիգարխները, թալանչիները՝ Ալիևի գլխավորությամբ, բայց կարծում է՝ եթե Ադրբեջանում գնան դրան, պետք է ողջ պատասխանատվությունը վերցնեն իրենց վրա և հասկանան, որ սա լինելու է իրենց պետության վերջը:

Հարցին՝ Ադրբեջանից հնչող այս հայտարարություններին ԵԱՀԿ Մինսկի խմբից որևէ արձագանքի կարիք չկա՞, նա նշեց, որ անպայման պետք է ՄԽ համանախագահները համապատասխան հայտարարությամբ հանդես գան:

«Մենք հասկանում ենք, որ տարածաշրջանում խաղաղության և կայունության պահպանման երկու կարևոր գործոն կա, մեկը մեր զինուժն է՝ Արցախի ՊԲ-ն, ՀՀ զինված ուժերը, և երկրորդը միջազգային հանրության դիրքորոշումը, այդ թվում՝ առաջին հերթին ԵԱՀԿ ՄԽ եռանախագահության կարծիքը և այն, որ նրանք անընդունելի են համարում ցանկացած արկածախնդրության:

Բնական է, որ այս ամենի դեպքում պետք է համապատասխան քայլեր ձեռնարկեն, իհարկե, հասկանում ենք, որ ոչ հրապարակային խողովակներով երևի թե արդեն սկսվել է աշխատանք, բայց պետք է հրապարակային ձևով էլ հայտարարեն ևս մեկ անգամ և անընդունելի համարեն այսպիսի աննորմալ, շիզոֆրենիկ հայտարարությունները, որովհետև սա իրոք կարող է բերել անկանխատեսելի հետևանքների»,- ասաց նա:

Բաբայանի խոսքով՝ որևէ վախ, խուճապ նման զարգացումներ չկան և չեն էլ կարող լինել, Արցախում կատարյալ կայուն, հանգիստ վիճակ է թե՛ արտաքին ասպարեզում, թե՛ ներքին: Նա նշեց, որ իրավիճակն արմատապես չի փոխվել, նույնն է, ինչ եղել է երեկ, հինգ օր առաջ, մեկ ամիս առաջ, նույն ստորաբաժանումները դեռևս այնտեղ են, հետ չեն քաշվել: