Բողոքի ակցիա վարչապետի նստավայրի դիմաց. քաղաքացիներն իրենց բնակարանների սեփականության վկայագրերն են պահանջում

Այսօր վարչապետի նստավարի առաջ բողոքի ակցիա են իրականացրել մի խումբ քաղաքացիներ, որոնց պնդմամբ՝ իրենց բնակարաններն ապօրինի կերպով խլել են իրենցից: Խոսքը Երևանի Նորաշեն թաղամասի 14/3 շենքի բնակարանների մասին է, որոնք, ըստ բնակիչների, կառուցապատող ընկերությունը նախնական պայմանագրով՝ մինչ շենքի կառուցումը վաճառել է իրենց: Այնուհետ էլ այդ նույն բնակարաններն առքուվաճառքի պայմանագրով կառուցապատող ընկերության կողմից գրավ են դրվել մասնավոր անձանց մոտ՝  տոկոսի դիմաց:

«Գրեթե բոլորս ամբողջ բնակարանի գումարը վճարելով՝ ձեռք ենք բերել բնակարանի սեփականության իրավունք: Մեզնից հետո նախագահն (խմբ-կառուցապատող ընկերության ղեկավարը) անօրեն ձևով կեղծ գործարքներ է կնքում վաշխառուների հետ՝ տոկոսով գումարի դիմաց: Վերցրել է տոկսով գումարներ վաշխառուներից՝ պատաճառաբանելով, որ գումարներ չի ունեցել կառուցելու համար և մեր բնակարաններն առանց մեր իմացության վաճառել է այլ անձնաց»,- ասել է բողոքի ակցիայի մասնակիցներից Արուսյակ Վանյանը:

Բողոքի ակցիայի մասնակիցներից մեկն էլ SHANTNEWS.am-ի հետ զրույցում նշել է, որ ինքն իր տղաների ու հարազատների հետ նույն այդ կառուցապատող ընկերությունից գնել են 5 բնակարան, որոնք այս պահին փաստացի իրենց չեն պատականում: Քաղաքացու խոսքերով՝ բացի այն, որ այդ բնակարաններն արդեն այլ անձանց են պատկանում, նաև մի մասի կառուցումը դեռ չի էլ ավարտվել:

«Բնակարանները գրավադրել են տարբեր տոկոսչիների մոտ: Դրանց մեջ են Ավագյանը, Դավիթ Բեգլարյանը՝ Հերմինե Նաղդալյանի ամուսինը, մի 25 հոգի տոկոսչիներ, որոնք դատական նախաքննության, դատաքննության ժամանակ ընդունել են, որ իրենք կատարել են պատժելի արարք, որ իրենք ստացել են այսքան գումար տոկոս, այսքան մայր գումարից, որից հետո բնակարանները, երբ քրեական հետապնդում է տեղի ունեցել, նրանք հասկանալով՝ կազմակերպված ձևով վերավճառել են այլ անձանց՝ նորից գումար վերցնելով»:

Բնակիչների խոսքերով՝ մոտ 45 քաղաքացի է տուժել կառուցապատող ընկերության ապօրինությունների հետևանքով:

Բողոքի ակցիայի մասնակիցները հույս ունեն, որ նոր կառավարությունը կլսի իրենց խնդիրների մասին: Այդ պատճառով վարչապետին ուղղված նամակ էին գրել, որը ցանկանում էին փոխանցել վարչապետի աշխատակազմին, սակայն ավելի ուշ մտափոխվեցին. նամակը ցանկանում են հինգշաբթի օր կառավարության նիստից առաջ անձամբ փոխանցել փոխվարչապետերից մեկին կամ հենց վարչապետին:

Նշենք, որ Նորաշեն թաղամասի 14/3 շենքի կառուցապատող ընկերության ղեկավարներ տարիներ առաջ Լուսաբեկ Սամվելյանն ու Արմեն Թադևոսյանը դատապարտվել են համապատասխանաբար 5 և 6 տարվա ազատազրկման: Այս պահին նրանք ազատության մեջ են: