Պատերազմի օրերին Արցախից Շիրակի մարզ է տեղափոխվել մոտ 2000 արցախցի

Պատերազմի ընթացքում Շիրակի մարզ տեղափոխվեց 2000-ից ավելի արցախցի: Նրանց մի մասն արդեն վերադարձել է: Նրանք, ում բնակավայրերն անցել են թշնամու վերահսկողության տակ, անորոշ ժամանակով կշարունակեն ապրել Շիրակի մարզում: Արցախցիների համար որպես կացարան են ծառայում հյուրատները, հյուրանոցները, պետական հաշվեկշռում գտնվող ու այս պահին չօգտագործվող շենքերը: Բազմաթիվ արցախցիներ հյուրընկալվել են գյումրեցի ծանոթ-բարեկամների տներում։

Երեխաների խնամքի թիվ մեկ հաստատության նախկին շենքը լուծարումից հետո  դատարկ էր: Սեպտեմբերի վերջից դարձել է ժամանակավոր օթևան Արցախից Գյումրի տեղափոխված ընտանիքների համար: Հիմա այստեղ 23 ընտանիք է ապրում՝ 65 մարդ: Հիմնականում նրանք են, որոնց բնակավայրերը մնացել են Ադրբեջանի վերահսկողության տակ:

Ռոզա Շաքարյանը 1998-ին է Արթիկից Քաշաթաղի շրջանի Այգեկ գյուղ տեղափոխվել: 22 տարի տուն ու տեղ է դրել, տնտեսություն հիմնել, նոյեմբերի 3-ին ամեն ինչ թողել է, նորից Շիրակի մարզ վերադարձել: Արցախ վերադառնալու ցանկությունը մեծ է, բայց այնտեղ արդեն վերադարձի հասցե չունի:

«Արթիկում տունս վաճառել եմ, Քաշաթաղի Այգեկ գյուղում այգի ու բանջարանոց հիմնել: Թեկուզ ոչ թե մեր գյուղ, այլ հարևան գյուղերը վերադառնալու հնարավորություն եթե լիներ, անպայման կգնայի: Բայց հիմա  գնալու տեղ չունեմ, ադրբեջանցիներն են իմ տունն ու ունեցվածքը վայելում »,-shantnews-ին ասել է Ռոզա Շաքարյանը:

Նույն կարգավիճակում նաև Գրիգորյանների ընտանիքն է: 90-ականներին շիրակավանցի ամուսինները Հադրութի շրջանի Հայկավան գյուղ են տեղափոխվել: 9 երեխա են ունեցել: Նրանից մեծը Գրիգորն է,օրեր առաջ է Արցախից վերադարձել ու Արմավիրի մարզում ժամանակավոր ապաստանած ընտանիքին Գյումրի տեղափոխել:

Պատերազմի ընթացքում արցախցի ընտանիքներին հաշվառում էին մարզպետարանները, հիմա միգրացիոն ծառայության որոշմամբ, հաշվառման գործառույթը փոխանցվել է համայնքապետարաններին, բայց վերջնական տվյալներն էլի ամփոփվում են մարզպետարանում, որտեղ հիմա արցախցիների երկու ցուցակ կա՝ վերադարձողների և անորոշ ժամանակով մարզում մնացողների:

«Մոտավորապես 2000 արցախցի է եկել Շիրակի մարզ և մոտ 600-700-ը վերադարձել է: Այս թվերն անընդհատ փոփոխվում են: Մեկնում են տարբեր ճանապարհներով: Պետության կողմից անվճար տեղափոխվում են, տրամադրվում են ավտոբուսներ, գրանցումների հիման վրա, կան նաև մարդիկ, ովքեր ունեն մեքենաներ, մեկնում են ինքնաբուխ: Եթե ընտանիքը մեծ է, երեխաները շատ են, մեկնում է ընտանիքից  մեկը , այնտեղ ծանոթանում է իրավիճակին, թե կարող են արդյո՞ք ընտանիքը տեղափոխել: Ունենք դեպքեր , երբ գնում են ու նորից հետ են գալիս,որովհետև իրենց տները չկան, իրենց կապող ոչինչ չկա »,-shantnews-ի հետ զրույցում ասել է Շիրակի մարզպետարանի ընտանիքի, կանանց և երեխաների իրավունքների պաշտպանության բաժնի պետ Լիլիթ Գորգինյանը:

Արցախցիների մի քանի խումբ է պետական աջակցությամբ իրենց բնակավայրերը տեղափոխվել: Հիմա վերադառնալու ցանկություն 24 մարդ է հայտնել, որոնց համար դեռ ուղևորափոխադրումներ չեն կազմակերպվում: Սպասում են, որ վերադառնալու ցանկություն ունեցողների թիվը կմեծանա: Իսկ վերադարձի երաշխիքը Արցախի բնակավայրերում քաղաքացիական ենթակառուցվածքների վերականգնումն է ,նաև անվտանգության ապահովումը:

Ովքեր մտադիր են մնալ ու ապրել Շիրակի մարզում,նրանց բնակարանային ու զբաղվածության ապահովման հարցերը դեռ քննարկման փուլում են: Հայաստանի կառավարությունը հստակեցրել է արցախցի ընտանիքներին միանվագ գումարային աջակցություն ցուցաբերելու, ինչպես նաև հյուրընկալողների դրամական փոխհատուցման հարցերը: