Առաջիկայում կարագի գինը զգալիորեն կնվազի. ՏՄՊՊՀ աշխատակից

Վերջին շրջանում որոշ ապրանքատեսակների գների բարձրացման հարցը երեկ քննարկվել է Հանրային խորհրդի նիստում: Ըստ հանրային խորհրդի տարածած հաղորդագրության՝  ՏՄՊՊՀ մեթոդաբանության և ծրագրերի մշակման վարչություն պետ Արման Մանասերյանը հայտնել է, որ հունվար ամսին հիմնական թանկացումները վերաբերել են բենզինի, դիզվառելիքի և սեղմված գազի շուկաներին: ՀԽ անդամներից մեկը նշել է, որ բենզինի գնի բարձրացումը ինչ որ տեղ ձեռնտու չէ նաև բենզին ներմուծողներին, քանի որ դա հանգեցնում է բենզինի սպառման  ծավալների նվազման և անցման դեպի սեղմված գազի սպառում:

Խոսելով միջազգային շուկայում ապրանքների գների տատանումների մասին՝ Արման Մանասերյանը հայտնել է, որ կարագի գինը միջազգային շուկայում նվազել է, ինչը կամաց-կամաց նկատելի է նաև Հայաստանում: Առաջիկա երկու ամիսներին նվազումն առավել զգալի կլինի:  

Անդրադառնալով ԵՏՄ մաքսատուրքերի փոփոխության հետևանքով մի շարք ապրանքների գների բարձրացմանը՝ Արման Մանասերյանը նշել է, որ դա առավելագույնը կարող է 4 տոկոսով ազդել ներկրվող ապրանքի գնի վրա, ինչը, սակայն, էական ազդեցություն չի ունենում վերջնական գնի ձևավորման վրա: Նա հավելել է, որ ԵՏՄ մաքսատուրքերի ավելացում նկատվում է այնպիսի ապրանքատեսակների վրա, որոնց արտադրությունը Հայաստանում լավ վիճակում է, կախում չկա դրսի շուկաներից:

Պարզաբանելով Հարկային նոր օրենսգրքից բխող փոփոխությունները՝ Վախթանգ Միրումյանը նշել է, որ օրենսգրքի ընդունումը եկամուտները նվազեցնելու նպատակ չի հետապնդում, և դրա ընդունման հիմքում դրված է մի քանի կարևոր սկզբունքներ՝ տնտեսական աճի խթանումը և պետության ֆինանսական համակարգերի կոնսոլիդացիայի ամրությունը: Նրա խոսքով՝ Հարկային նոր օրենսգրքով նախատեսվում են նաև բազմաթիվ միջոցառումներ, որոնց արդյունքում պետության հարկային եկամուտները նվազում են: Հարկային նոր օրենսգիրքը մի շարք ոլորտների վրա (որտեղ օգտագործվում է դիզելային վառելիք) թողնելու է եթե ոչ դրական, ապա գոնե ոչ բացասական ազդեցություն: Խնդիր կա գյուղատնտեսության առումով: Հանրային խորհրդի անդամները կարևորել են ոլորտի վրա հնարավոր հետևանքները չեզոքացնող կամ գոնե մեղմող միջոցառումների իրականացումը:

Ամփոփելով գնաճի պատճառներն ու հետևանքները՝ Հանրային խորհուրդը կարծիք է հայտնել, որ ստեղծված իրավիճակը նաև հետևանք է երկարաժամկետ հատվածում որոշակի սխալների և բացթողումների: Պետությունն իր վրա պետք է վերցնի կարգավորիչ դեր, տնտեսության վրա ազդելու մեխանիզմներ մշակի: Այդ մեխանիզմները պետք է համահունչ լինեն նաև շուկայական ազատ մրցակցության սկզբունքին և միջազգային պարտավորություններին: