Զինծառայող Ալբերտ Դալլաքյանի բուժման համար հավաքվեց ավելի քան 49.000 դոլար

Ծառայության ընթացքում վիրավորված զինծառայող Ալբերտ Դալլաքյանի՝ արտերկրում բուժման համար հավաքվող գումարն այսօր առավոտյան անցավ նախատեսված 45.000 դոլար ցուցանիշը։ Սրա համար պահանջվեց 9 օր, որի ընթացքում 500-ից ավելի մարդիկ հասցրին տարբեր չափի նվիրատվություններ կատարել զինծառայողի բուժման համար։

«Կուզենայի, որ Հայաստանում լիներ, ուղղակի որ այդ սարքավորումը չկա, ուզում եմ գնամ՝ Գերմանիայում անենք, ու ոնց որ ստացվում է։ Ինձ ասում են՝ կարո՞ղ է վախենում ես կամ ինչ-որ բան, բայց վախենալու բան չկա, սա արդեն չորրորդն է։ Ինչքան շուտ, այնքան լավ, շատ բան ունեմ անելու»,- նշեց Ալբերտ Դալլաքյանը «Շանթնյուզի» հետ զրույցում։

Մինչ այս զինծառայողն արդեն 3 վիրահատության է ենթարկվել Հայաստանում։ Եթե նրա հետագա բուժումը նույնպես իրականացվեր այստեղ, պաշտպանության նախարարությունը պարտավոր կլիներ իր վրա վերցնել նաև այդ ծախսերը։ Սակայն հարազատների խոսքով՝ արտերկրում բուժումն ավելի հավանական կդարձնի Ալբերտի Դալլաքյանի ապաքինումը։

«Հնարավոր չէ, որ ես գնայի այն ռիսկին, որ իմ երեխային այստեղ վիրահատեին, որովհետև այս անոթների վիրահատության հիմքը դրված է լուրջ սարքավորման վրա։ Մեր բիշկները բոլորից լավն են։ Բայց այս նեղ մասնագիտական ասպարեզում սարքավորումներն այդ բարձր որակի չեն, որ կարողանան։ Եթե այստեղ բուժումը կատարվեր, պաշտպանության նախարարությունը կփոխանցեր իր գումարը»,- նշեց Ալբերտի մայրը՝ Արմինե Ղազարյանը։

Պաշտպանության նախարար Վիգեն Սարգսյանն անձնական նախաձեռնությամբ միացավ զինծառայողի բուժման համար արվող հանգանակությանը։ Սա բուռն արձագանք ունեցավ ցանցում․ որոշ մարդիկ պնդում էին, թե նախարարությունը պարտավոր է պետական միջոցներով կազմակերպել բուժումը։ Բայց նախարարությունն այլևս իրավասու չէր պետական միջոցներ տրամադրել, քանի որ զինծառայողի հարազատները որոշել էին բուժումն այնուամենայնիվ շարունակել արտերկրում

«Հերոսի մայրիկը հաշվեհամար էր բացել, և 5-6 ամսվա ընթացքում շատ քիչ գումար էր հավաքվել։ Հասկացա, որ դժվարանում է մայրիկը։ Ասացի, որ չէ, չենք կարող այդպես թողնել, բերեք բացենք GoFundMe, և բացեցինք։ Հիմա մնացել է հավաքել 1020 դոլար»,- տեղեկացրեց Թագուհի Օգանյանը, ով հանգանակության կազմակերպիչն է։

Առավոտյան, երբ 45.000 դոլարի հավաքվելուց հետո պարզվեց, որ հանգանակությունների կայքը միջնորդավճար է պահելու մոտ 9 տոկոս, որոշվեց հավաքվող գումարի չափը հասցնել 49.000 դոլարի։ Մեր թիմը դեռ զրուցում էր Ալբերտի ու Թագուհու հետ, երբ եկավ սպասված լուրը․ հանգանակությունների չափն անցել է 49.000 դոլարը։