Սպիտակ տան կանացի դեմքը

Առաջին տիկինը

ԱՄՆ նախագահ Դոնալդ Թրամփի ընտանիքն արդեն ուղիղ մեկ տարի է՝ բնակվում է Սպիտակ տանը: ԱՄՆ առաջին տիկին Մելանյա Թրամփի վարկանիշը վերջին տարվա ընթացքում բավական աճել է, թեև նա հազվադեպ է հանրության առաջ հայտնվում: Հարցումների համաձայն՝ ամերիկացիների 54%-ը դրական է գնահատում ԱՄՆ առաջին տիկնոջը:

Մելանյա Թրամփը ծնվել է 1970թ. Սլովենիայում: Նախկին մոդել Մելանյան ավելի քան 2 հարյուրամյակի ընթացքում առաջին օտարազգին է, որ հայտնվել է առաջին տիկնոջ դիրքում: Մելանյա Թրամփին նախորդող Միշել Օբաման մեծ ժողովրդականություն էր վայելում, և եթե ներկայիս առաջին տիկինն իր առջև խնդիր է դրել գրավել ամերիկացիների սրտերը, ապա դա այնքան էլ հեշտ գործ չի լինելու:

Gallup ընկերության դեկտեմբերյան հարցումների համաձայն՝ Մելանյա Թրամփին դրական է գնահատել ամերիկացիների 54%-ը, մինչդեռ մեկ տարի առաջ՝ ԱՄՆ նախագահական ընտրություններում Դոնալդ Թրամփի հաղթանակից հետո, նման կարծիք էր հայտնել երկրի բնակիչների 37%-ը:

Սպիտակ տանը, կարծես, ավանդույթ է դարձել, որ նախագահության առաջին տարվա ավարտին առաջին տիկնայք իրենց վարկանիշով գերազանցում են իրենց ամուսիններին: Սակայն որքան էլ բարձր լինի Մելանյա Թրամփի վարկանիշը, այն փոքր-ինչ զիջում է իր նախորդների ցուցանիշներին.

Նույն ժամանակահատվածի համար Հիլարի Քլինթոնի վարկանիշը կազմում էր 58%, Լորա Բուշի վարկանիշը՝ 77%, իսկ Միշել Օբամայինը՝ 61%:

Նախորդների համեմատ Մելանյա Թրամփի ավելի ցածր վարկանիշը շատերը բացատրում են նրանով, որ ամերիկացիները դեռ լավ չեն ճանաչում իրենց առաջին տիկնոջը, քանի որ նրան շատ քիչ են տեսնում: Իսկ Մելանյայի սահմանափակ հանրային գործունեությունը, ըստ փորձագետների, պայմանավորված է նրանով, որ նա պրոֆեսիոնալ քաղաքական գործիչ չէ: Բացի այդ, անգլերենն ԱՄՆ առաջին տիկնոջ մայրենի լեզուն չէ: Նախքան նախագահական ընտրություններում Թրամփի հաղթանակը Մելանյա Թրամփի առոգանությունը հաճախ էր զավեշտի առարկա դառնում երգիծական շոուների ընթացքում: Շատերը համակարծիք են, որ Մելանյա Թրամփն իրեն բավականվստահ է զգում արտասահմանյան շրջագայությունների ժամանակ, գուցե, այն պատճառով, որ երկրից դուրս  ավելի ազատ է ԶԼՄ-ների քննադատությունից:

 Առաջին դուստրը 

Երբ Թրամփը ստանձնեց ԱՄՆ նախագահի պաշտոնը, լրատվամիջոցներն ակտիվ ենթադրություններ էին անում, թե Միացյալ Նահանգների ոչ պաշտոնական առաջին տիկինն է դառնալու նախագահի դուստրը՝ Իվանկա Թրամփը: Դոնալդ Թրամփի երդմնակալությունից հետո Իվանկան ամուսնու՝ Ջարեդ Քուշների հետ նշանակվեց նախագահի խորհրդական: Իվանկա Թրամփը, ով նաև երեք երեխաների մայր է, նախագահի խորհրդականն է աշխատատեղերի ստեղծման, տնտեսական հնարավորությունների և բիզնեսի ընդլայնման հարցերով: Չնայած ենթադրություններին, որ Իվանկան կստվերի իրենից ընդամենը 11 տարով մեծ խորթ մոր կերպարը, նա ավելի քիչ է երևում հանրության լայն շրջանակներին:

Իսկ թե ինչպիսին են ԱՄՆ նախագահին ամենից մոտ գտնվող այս երկու կանանց հարաբերությունները, դժվար է ասել: Համենայն դեպս, նրանք միասին մասնակցում են պաշտոնական միջոցառումների, երկու կանանց միավորում է նաև սերը դեպի բարձրակրունկ կոշիկները և նորաոճ հագուստը: