Համավարակի սահմանափակումների պատճառով Գյումրիի մանկապարտեզներում նոր ընդունելություն չեն կատարում 

 Որոշակի սահմանափակումներով և սանիտարահիգիենիկ նորմերի պահպանումով մանկապարտեզները վերսկսել են աշխատանքը։ Խմբերում առավելագույնը 18 երեխա է թույլատրվում, իսկ մուտքը հակահամաճարակային կանոնների պահպանումով է։ Այս տարբերակով  աշխատելու արդեն 5 ամսվա փորձ ունեն մանկապարտեզները, որտեղ համավարակի սահմանափակումների հարուցած վնասներին են բախվում:

 «Եղել է երեխաների թվի սահմանափակում, սկզբում քիչ էր, հետո ավելացրին մինչև 18։ Մենք հիմա 18-ով  ենք աշխատում, այսինքն՝ փոփոխություն չեղավ, երեխաների թվի ավելացում չեղավ»,- նշում է Գյումրիի  «Արևիկ» մանկապարտեզի տնօրեն Գայանե Մանուկյանը:

 Խնդիրն այս մեկ մանկապարտեզով չի սահմանափակվում։ Քաղաքապետարանի կրթության բաժնի տվյալներով՝ Գյումրիում երեխաների գրեթե կեսը չի կարողանում մանկապարտեզ հաճախել, խմբերում տեղերը լրացել են, իսկ առաջնահերթությունը տրվել է աշխատող ծնողների երեխաներին։ 

 «Ցուցակագրված երեխաների գրեթե 50%-ը չի հաճախում մանկապարտեզ: Չի հաճախում, որովհետև թիվն է սահմանափակ: Կարանտինի ժամանակ փակվել է մանկապարտեզը, վերաբացվել է 12 երեխայով, հետո դարձել է 18 ու թվի պատճառով դուրս է մնացել»,- նշում է Գյումրիի քաղաքապետարանի կրթության բաժնի պետի ԺՊ Շողիկ Ալեքսանյանը:

Ծնողներից  բողոքներ, ահազանգեր քաղաքապետարանի կրթության բաժինն էլ է ստանում։ Համավարակի հարուցած սահմանափակումները փոքրիկներին զրկել են մանկապարտեզ հաճախելու հնարավորությունից։ Ծնողների պահանջը արդարացնում են, բայց լուծում չի տրվում։ Մի քանի մանկապարտեզներում նաև նոր ընդունելության դիմումներին ընթացք չեն կարող տալ։ Ծնողների դիմումներն անպատասխան են թողնվում: Նոր սաների ընդունելությունն արգելված չէ, բայց  մանկապարտեզների մեծ մասն այդ աշխատանքները կատարել չի կարող։  

«Դիմումներ մեզ մոտ շատ կան, շատ կան հերթագրված երեխաներ, մի քանիսին կարողացանք տեղավորել, բայց շատ են գալիս, ասենք՝ միջին խմբի, ավագ խմբի, սակայն մենք չենք կարող ընդունելություն կատարել, քանի որ մեր երեխաները դրսում են մնացել»,- նշում է մանկապարտեզի տնօրենը։

Այս առումով պատկերն այլ էր «Արձագանք» մանկապարտեզում։ Մինչև 108 երեխա կարող է հաճախել 6 խմբերում, բայց այս պահին 90 երեխա ունեն, նոր դիմումներ ևս  չունեն։ Ամառային ամիսների հարկադրված  պարապուրդը նաև ֆինանսական խնդիրներ է առաջ բերել։ Չեն կարողացել ձմռան  կոմունալ ծախսերի  համար գումար տնտեսել։

«Գումարը նախկինում հաշվարկել ենք 12-ամսյա կուտակումներով, որ 6 ամիսը կուտակում ենք, մյուս 6 ամիսը՝ ջեռուցում: Պարզապես այս տարի ամռան ամիսներին մենք չաշխատեցինք ու գումար չկուտակվեց։ Մինչև նոյեմբերը լրիվ պարտք չունենք, հիմա դեկտեմբերի վառածը, բնականաբար, էս ամիս պիտի մուծենք»,- նշում է «Արձագանք» մանկապարտեզի տնօրեն Ջուլիետա Ավետիսյանը:

 Այս դեպքում Գյումրիի  քաղաքապետարանի պատասխանատուն նշում է՝ մանկապարտեզների ֆինանսական ծախսերը մեղմելու տարբերակներ են գտնելու, իսկ  երեխաների թիվն ավելացնելու, նրանց մանկապարտեզ հաճախելու  հնարավորությունից չզրկելու համար պատրաստվում են դիմել առողջապահության նախարարություն՝ առաջարկով՝ փոխել  հաճախելիության առավելագույն շեմը։