ԵՄ-ի հետ այս համաձայնագրի շրջանակներում բարեփոխումները սահմանված ժամկետներում իրականացվում են առանց քաղաքական որևէ իրադարձության. փոխվարչապետի գրասենյակի ղեկավար

ԵՄ-ն արդեն ծանուցել է Հայաստանին, որ Հայաստան-ԵՄ համապարփակ և ընդլայնված գործընկերության համաձայնագրի վավերացման գործընթացն ավարտվել է. համաձայնագիրը լիարժեքորեն գործում է, և դա կլինի մարտի մեկից։

Ի՞նչ է դա գործնականում նշանակում։ «Հեռանկարի» տաղավարում այս հարցին է անդրադարձել փոխվարչապետի գրասենյակի ղեկավար Սեդրակ Բարսեղյանը։

«Նախ նշեմ, որ այն համաձայնագիրը, որն ուժի մեջ է մտնելու այս տարվա մարտի մեկից, ստորագրվել է դեռևս 2017 թվականի նոյեմբերի 24-ին, ժամանակավորապես արդեն իսկ ուժի մեջ է մտել 2018 թվականի հունիսի մեկից։ Մարտի մեկից այն ամբողջությամբ կմտնի ուժի մեջ»,- նշել է նա։

Ի՞նչ է փոփոխվել ՀՀ-ԵՄ հարաբերություններում։ Այս հարցի հետ կապված Սեդրակ Բարսեղյանը նշել է.

«ԵՄ-ի հետ նախորդ երկկողմ համաձայնագիրը կնքվել էր դեռևս 1996 թվականին, որն ուժի մեջ էր մտել 1999 թվականից։ Դա իր ծավալով էականորեն զիջում է այս Համապարփակ և ընդլայնված գործընկերության համաձայնագրին, որը ներառում է մի քանի հարյուր էջանոց փաստաթուղթ, որում ներառված են հղումներ մի շարք եվրոպական կանոնակարգերին և հրահանգներին, որն ամբողջապես կազմում է այս համաձայնագրի բուն բովանդակությունը։ Դա ենթադրում է ՀՀ-ԵՄ բազմաոլորտ՝ երեք տասնյակ ոլորտների համագործակցություն, որը ներառում է տրանսպորտի, կրթության, առողջապահության, տնտեսական հարաբերությունների, առևտրի, էներգետիկայի և այլ ոլորտներ։ Գրեթե բոլոր ոլորտների համագործակցությունը ներկայումս պետք է ավելի խոր իրականացվի, քան նախանշված էր նախորդ համաձայնագրով, որովհետև, եթե նախորդ համաձայնագրով ոլորտները սահմանափակված էին ընդամենը մեկ հոդվածով, ապա այստեղ մենք  ունենք բաժիններ՝ նվիրված տարբեր ոլորտներին, որոնք իրենց հերթին ունեն մի շարք հոդվածներ և կանոնակարգեր»։

Զուգահեռներ անցկացնելով Ասոցացման համաձայնագրի հետ՝ նա նշել է, որ այս համաձայնագիրը չի ենթադրում մաքսային կանոնակարգման, այսինքն՝ առևտրի ժամանակահատվածում արտոնյալ մաքսատուրքերով կամ ռեժիմներով առևտուր, բայց ամբողջությամբ ընդգրկում է այն բոլոր ոլորտների համագործակցությունը, որոնք կան ասոցացման պայմանագրի մեջ։

Ինչ վերաբերում է ՌԴ-ԵՄ վերջին լարումներին և արդյոք դրանք կարող են խոչընդոտ դառնալ համաձայնագրի իրագործման համար, Բարսեղյանը պատասխանել է.

«Ես կարծում եմ, որ ոչ, քանի որ ՀՀ-ԵՄ այս համաձայնագիրը գտնվում է կառավարության ուշադրության կենտրոնում. մենք այս համաձայնագիրը դիտում ենք որպես տարբեր ոլորտներում իրականացվող բարեփոխումների օրակարգ, հետևաբար այն բարեփոխումները, որոնք մենք նախատեսում ենք իրականացնել այս համաձայնագրի շրջանակներում ճանապարհային քարտեզով, սահմանված ժամկետներում իրականացվում են առանց քաղաքական որևէ իրադարձությունների»։

Մանրամասները՝ տեսանյութում։