Գյումրիի վթարային շենքերում ուսումնասիրություններ կկատարվեն

Գյումրիի 4՝ Անտառավան 26, Իսահակյան 9, Ղուկասյան 29 և Տիգրան Մեծի 5 վթարային շենքերի բնակիչների բնակապահովման հարցը քննարկվել է քաղաքաշինության կոմիտեում: Հիշեցնենք, միայն Տիգրան Մեծի 5-ի ամրացման և մյուս 3 շենքերի բնակիչներին բնակարանի գնման վկայագրերի տրամադրման մասին նախագիծ էր ներկայացվել անցած տարի: Համավարակի ու պատերազմի հետևանքով հերթը կառավարության նիստում քննարկմանը չհասավ: Շիրակի մարզպետարանը գործադիրին գրություն էր հասցեագրել ծրագիրը վերսկսելու համար: Հիմա քննարկումները վերսկսվել են:

Կաթոցներ, խոնավություն, քայքայվող պատեր ու առաստաղ… Վիճակն ամեն տեղումներից հետո այսպիսին է Գյումրիի վթարային շենքերում: Իսահակյան 9-ը առավել վթարային 4 շենքերի ցանկում է, որոնց բնակիչներին անցած տարի կառավարությունը ԲԳՎ էր առաջարկում: Վկայագրերից բնակիչները հրաժարվել են ու ամրացում են պահանջում:

Ամրացում են պահանջում նաև Ղուկասյան 29 շենքում: Իսահակյան 9 և Ղուկասյան 29 շենքերում մասնագիտական նոր ուսումնասիրություններ կկատարվեն: Շիրակի մարզպետ Հովհաննես Հարությունյանն այս մասին համաձայնության է եկել Քաղաքաշինության կոմիտեի ղեկավարի հետ հանդիպման ժամանակ:

«Քաղաքաշինության կոմիտեի ղեկավարի հետ պայմանավորվածություն ձեռք բերեցինք, որ ինքը կգա Գյումրի, կհրավիրենք մասնագիտական խումբ, որպեսզի հասկանանք հնարավորություններն ամրացման հետ կապված: Եթե մասնագետները հստակ ասեն, որ հնարավոր չէ շենքերն ամրացնել և շենքերի վրա աշխատանք տանելն անիմաստ է, ուրեմն պետք է տեսնեն այլ լուծումներ»,- Shantnews-ին ասել է Շիրակի մարզպետ Հովհաննես Հարությունյանը:

Անցած տարի ներկայացված նախագծով ամրացում նախատեսվում էր միայն Տիգրան Մեծի 5 շենքի համար, մյուս 3-ի դեպքում բնակիչներին վկայագրեր էին տրամադրվում: Այս երկու առաջարկներին, քննարկման արդյունքում, ևս մեկն է ավելացել: Խոսքը մասնավոր ներդրողների հետ համագործակցությամբ բնակարանաշինական ծրագրի մասին է: Վկայագրից հրաժարվող բնակչին իր վթարային բնակարանի փոխարեն կառաջարկվի բնակարան նորակառույց շենքում:

«Քննարկվում է նաև երրորդ տարբերակը: Մասնավոր ներդրողներին տրամադրվում է տարածքը, որը ներդրողի համար հետաքրքիր է: Ինքը տվյալ հատվածում կառուցում է բնակելի շենք, և վթարային շենքում ապրողները կստանան բնակարան նոր շենքում: Եռակողմ հարաբերություն է, որտեղ պետությունը քիչ ներգրավվածություն ունի: Հարաբերությունները ստեղծվում են բնակչի և ներդրողի միջև: Բնակիչն իր սեփականության իրավունքը հանձնում է ներդրողին և ստանում է այլ սեփականության իրավունք նոր կառուցված շենքում»,– նշել է Շիրակի մարզպետը:

Նման ծրագրի նախադեպ մայրաքաղաքում է կիրառվել: Ըստ Շիրակի մարզպետի՝ որպեսզի Գյումրիում ևս դա կիրառելի լինի, անհրաժեշտ է, որ բնակարանաշինությունը, որպես ներդրում, շահավետ լինի: Առայժմ սա միայն քննարկվող տարբերակների ցանկում է: Բնակապահովման տարբերակի ընտրությունը հստակ է երկու՝ Տիգրան Մեծի 5 և Անտառավան 26 շենքերի համար:

Ըստ Շիրակի մարզպետի՝ վարչապետի հանձնարարականը կա սեղմ ժամկետներում ամեն ինչ սկսել: Էլի սեղմ ժամկետներում առաջարկվելու են նաև Շիրակի մարզում անօթևանության խնդրի լուծման տարբերակներ: Տնակները հաշվառել են, թվերը հստակեցրել: Գյումրիում մոտ 300 տնակ բնակեցված չէ: Դրանք ենթակա են ապամոնտաժման: Բայց շատ դեպքերում քանդել հնարավոր չէ՝ տնակի տերերի բացակայության պատճառով: Ըստ մարզպետի՝ մշակման փուլում են օրենսդրական կարգավորումները, որոնք հնարավորություն կտան ապամոնտաժել չբնակեցված տնակները:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։