«Գյումրին առանց տնակների» հիմնադրամը մեկ տարի է՝ նվիրատուներ չունի

Համավարակն ու հետպատերազմական իրավիճակը Գյումրիում ներդրումների նվազման պատճառ են դարձել: Խոսքը ոչ միայն գործարար, այլև բարեգործական ծրագրերում ներդրումների ու նվիրատվությունների մասին է: 2015-ին ստեղծված «Գյումրին առանց տնակների» հիմնադրամը տարբեր նվիրատուների աջակցությամբ 36 բնակարան է նվիրել տնակներում ապրողներին:

Վերջին մեկ տարում ծրագիրը չի գործել՝ նվիրատուներ չկան, հիմնադրամը միջոցներ չունի: Տնակային թաղամասերում կատարած ուսումնասիրությունները և նոր ծրագրերն առայժմ թղթի վրա են ու բանավոր պայմանավորվածությունների փուլում:

Տարածքի բնակիչների մեծ մասը անօթևանների հերթացուցակում չկան, բնակարանային հաշվառում քաղաքապետարանում ու մարզպետարանում չեն անցել: Երկու տարի առաջ 207 տնակային տարածքի բնակիչներին «Գյումրին առանց տնակների» հիմնադրամն է հաշվառել: 207 տարածքը, հիմնադրամի խորհրդի որոշմամբ, ընտրվել էր թիրախային: Քաղաքի կանաչ գոտիներն էին նախատեսել տնակներից ազատել:

«Շուրջ մեկ տարի կորցրինք և մեր պլանավորած ծրագրերից ու նախագծերից հետ ընկանք: 2019-ին տվել ենք 2 հատ 3 սենյականոց բնակարան՝ փազլի կտորների վաճառքից ստացված գումարով, ևս 2 բնակարան գնել ենք տնակային թաղամասերի բնակիչների համար: Հիմա մեկ ընտանիք կա, որտեղ վիրավոր զինվոր է ապրում իր մոր հետ: Դոնոր կազմակերպության հետ համագործակցում ենք և նրանց բնակարան ենք նվիրելու»,- Shantnews-ին ասել է «Գյումրին առանց տնակների» հիմնադրամի տնօրեն Գևորգ Գրիգորյանը:

Անցած տարի հիմնադրամը բնակարանաշինական ծրագրի հայտ էր ներկայացրել: «Շառլ Ազնավուր» հիմնադրամի հետ, Մանուշյան թաղամասում, նախատեսում են 50 բնակարանի շինարարության համար դրամահավաք սկսել: Ծրագիրը մոտ 2 մլն դոլար է գնահատվել, բանավոր պայմանավորվածություններ են ձեռք բերվել, հողհատկացում ևս կատարվել է:

«Ծրագրի ստարտի գումարը տալիս է «Շառլ Ազնավուր» հիմնադրամը: Դա գործուղումներն են, հանդիպումները Սփյուռքի հայ համայնքների հետ: Ծրագրի մեջ ներառված է 3 փուլ՝ ֆոնդերի հայթայթում, բարեգործական համերգներ, 1 մլն հայի միավորում: Մենք նպատակ ենք դրել, որ եթե 1 մլն հայ 1 դոլարով միավորվի, արդեն իսկ նախագիծը կիսով չափ կիրականանա: 2-3 փուլով ենք նախատեսում դրամահավաքը, բայց զուգահեռ ընթանա նաև շինարարություն: Ֆիքսել ենք, որ կառուցելու ենք 50 բնակարան՝ ժամկետը 3 տարի է»,- Shantnews-ին ասել է Գևորգ Գրիգորյանը:

Դրամահավաքի կազմակերպչական աշխատանքները սկսելու համար «Շառլ Ազնավուր» հիմնադրամը պատրաստ է ֆինանսավորում կատարել: Միայն թե ծրագրի մեկնարկի ժամկետներ դեռ չկան:

Այս ծրագրի համար շահառուների ընտրելու են ոչ միայն թիրախային տնակային թաղամասից, այլ ընտրություն կատարվելու է ամբողջ քաղաքում եղած տնակներում ապրող ընտանիքներից: Նրանց հաշվառման գործընթացին «Գյումրին առանց տնակների» հիմնադրամը քաղաքաշինության կոմիտեում ստեղծված հանձնաժողովի կազմում մասնակցել է: Հիմա արդեն հիմնադրամը տնակներն ու ընտանիքներին չի հաշվառում:

Շիրակի մարզում, ըստ հանձնաժողովի ուսումնասիրության, կա 3253 տնակ, որից 2871-ը՝ Գյումրիում: Այս ուսումնասիրությունների վերջնարդյունքը լինելու էր անօթևանության խնդրի լուծման տարբերակի ընտրությունը: Անցած տարի Շիրակի մարզի միայն գյուղական բնակավայրերում ԲԳՎ-ներ տրամադրվեցին և 27 ընտանիքի համար բնակարանաշինություն մեկնարկեց:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։