Գյումրիի պոլիկլինիկաներում հակակատաղության վակցինայի դեֆիցիտ կա

Գյումրիի պոլիկլինիկաներում հակակատաղության շիճուկի դեֆիցիտ է: Շների հարձակման դեպքերը շատացել են: Կախված ստացած վերքերի խորությունից՝ մեկ հիվանդը ստանում է շիճուկի մինչև 9 դեղաչափ։ Պոլիկլինիկաներին հատկացված շիճուկի քանակը չի բավականացնում: Այժմ առաջնային բուժսպասարկման օղակում շիճուկի, այսպես ասած, ներքին շրջանառություն է: Թափառող շների հարձակման դեպքեր արձանագրվում են գրեթե բոլոր թաղամասերում: Ըստ այդմ, դժվար է հաշվարկել, թե որ պոլիկլինիկային ինչքան դեղաչափ է անհրաժեշտ:

Գյումրիի բոլոր թաղամասերում թափառող շները խմբերով են: Տիրացել ու հարմարվել են տարածքին: Իրենց տարածք մտնող մարդկանց էլ դիմավորում են ագրեսիվ վարքագծով: Ծայրամասային Անի թաղամասի բակերից ու փողոցներից շները շենքերի շքամուտքեր են տեղափոխվել: Գիշերում են մուտքերում:

Թափառող շների մեծ մասը ստերջացված է: «Կենդանիների նկատմամբ պատասխանատու վերաբերմունքի մասին օրենքի» ընդունումից հետո ստերջացումը կենդանիների վնասազերծման միակ տարբերակն է: Ստերջացնում են ու վերադարձնում նույն տարածք, բայց բնակիչները նշում են՝ դրանից կենդանիների ագրեսիվությունը չի պակասում:

Թափառող շների հարձակման դեպքերը շատացել են: Սա փաստում է նաև պոլիկլինիկաներում կատաղության դեմ ներարկումներ ստացած հիվանդների թիվը: Աճն, ըստ բժիշկների, գրանցվել է ձմռան վերջին ու գարնան սկզբին:

«Մատյանում գրանցում ենք կատաղության դեմ պատվաստումներ ստացածներին: Կատաղության դեմ հունվար ամսից վակցինացվել է 17 քաղաքացի: Բոլորը եղել են միջին ծանրության: Ստացել են վակցինայի մինչև 9 դեղաչափ»,- Shantnews-ին ասել է Գյումրիի «Միջազգային Կարմիր խաչի անվան» պոլիկլինիկայի իմունիզացիայի կաբինետի բուժքույր Մագդա Ղազարյանը:

Դեպքերի ու պատվաստվող հիվանդների թվի աճն էլ հանգեցրել է հակակատաղության շիճուկի դեֆիցիտի: Նախկինում այն  պոլիկլինիկաներում շատ քիչ էր օգտագործվում, ստացած քանակությունը մնում էր, դառնում ժամկետանց ու խոտանվում: Հիմա հակառակն է՝ ամսական ստացած քանակությունը չի բավարարում:

«Շան կծածի համար չգիտենք, թե կոնկրետ տվյալ ամսվա համար ինչքան դեպք ենք ունենում: Սովորաբար որոշակի քանակություն ստանում ենք, բայց, քանի որ դեպքերը շատ են և դեպքի ծանրությունից կախված տարբեր քանակի դեղաչափ ենք ներարկում, շատ հաճախ պատվաստանյութը չի բավարարում: Խնդրում ենք մյուս պոլիկլինիկաներից, ճարում, բերում ենք: Եթե մենք ունենք և մեկ այլ պոլիկլինիկայում խնդիր կա, մենք ենք տրամադրում: Մեկս մեկին օգնում ենք»,- նշել է Գյումրիի «Միջազգային Կարմիր խաչի անվան» պոլիկլինիկայի իմունիզացիայի պատասխանատու Անահիտ Սանդրոսյանը:

Կոնկրետ այս պոլիկլինիկան ամսական 20-25 դեղաչափ հակակատաղության շիճուկի հայտ է ներկայացնում: 27 հազար մարդու սպասարկող պոլիկլինիկան այսօրվա դրությամբ ընդամենը 2 դեղաչափ շիճուկ ունի, որը, անհրաժեշտությունից ելնելով՝ գյուղական ամբուլատորիայից են խնդրել ու ստացել:

«Մենք ունենք ընդամենը 2 հատ: 3 հատ է եղել, երեկ ևս մեկ հիվանդ է շիճուկը ստացել, մնացել է երկուսը: Բայց խոստացել են, որ պիտի ստանանք: Քանի դեռ թափառող շների խնդիրը կա, քանի տեր-տիրական չկա, քանի դեռ այս հարցով զբաղվող չկա, հակակատաղության շիճուկի պահանջարկը շատ կլինի»,- նշել է Անահիտ Սանդրոսյանը:

Բժիշկները մտածում են հակակատաղության շիճուկի անհրաժեշտ քանակի վերահաշվարկ կատարելու մասին, քանի դեռ Գյումրիում թափառող շների կացարանի հարցը քաղաքում չի լուծվում։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։