Շիրակի մարզը դարձել է բիովառելիքի մատակարար այլ մարզերի համար

Համավարակով պայմանավորված սահմանափակումները ոչ միայն  դժվարություններ, այլև որոշ դեպքերում նոր հնարավորություններ ստեղծեցին: Փակ սահմանների պայմաններում գործարար միտքը զարգացավ տեղական հումքի արտադրության ուղղությամբ: Ախուրյան խոշորացված համայնքում, համավարակի օրերին, գյուղի բնակիչները միավորվել են, հիմնադրամ ստեղծել և ՄԱԿ-ի Զարգացման ծրագրերի ֆինանսավորմամբ հիմնել բիովառելիքի արտադրություն: Հումքը ծղոտն է, որն առաջանում է հացահատիկի բերքահավաքից հետո: Ախուրյանում արտադրված ծղոտի բրիկետները մի քանի ամսում դարձել են պահանջված ոչ միայն Շիրակի, այլև Արարատի ու Արմավիրի մարզերում:

Ախուրյանի շտապ օգնության կայանի նախկին ավտոտնակների տարածքը, որը տարիներով լքված է եղել, նոր գործառնական նշանակություն է ստացել: Ավտոտնակներում էլի մեքենաներ են, բայց արդեն արտադրական: 4 տարի առաջ է բիովառելիք արտադրելու միտքը ծնվել: Ֆինանսավորման աղբյուրների փնտրտուքն ու արտադրամասի հիմնումը տևել են մինչև 2020 թվականը ու համընկել համավարակի շրջանին:

Առաջին արտադրամասում ծղոտը մանրացվում է ու լցվում հատուկ սարքավորման մեջ: Հաջորդ արտադրամասում արդեն այն հոսքագծով դուրս է գալիս, որպես պատրաստի արտադրանք:

«Լքված, քայքայված տարածքը վերցրեցինք, վերանորոգեցինք, ստացանք արտադրամաս: 6 հոսքագիծ ենք տեղադրել: Արտադրողականությունը ժամում 350 կգ է: Ոչ ծախսատար, ժամանակակից սարքեր են:Համավարակի ընթացքում արտադրամասը փորձաշրջանում էր:Իսկ արտադրանք թողարկել սկսեցինք տարեվերջից: Բաղադրությունը մաքուր ծղոտ է , գլանաձև տեսքը ստանում ենք բարձր ջերմաստիճանի տակ խտացման հաշվին»,- Shantnews-ին ասել է «Ախուրյանի համայնքային զարգացման կենտրոն» հիմնադրամի տնօրեն Սամվել Սաֆարյանը:

Այլընտրանքային վառելիքը մեկ կարևոր հատկություն ու առավելություն ունի՝  էկոլոգիապես մաքուր է և երկրորդ կյանք է տալիս ծղոտին, որը հացահատիկի բերքահավաքից հետո շատ դեպքերում գյուղացիներին պետք չէր ու այրվում էր դաշտերում:

«Մենք էկոլոգիային էլ ենք օգուտ տալիւս:Ծղոտը դաշտում չեն այրում, ծղոտը ծառայում է իր նպատակին , ծղոտից ստանում ենք նման արտադրանք:Մեր արտադրանքը դուրս է եկել մարզից:Արդեն մատակարարում ենք 2 մարզի: Արմավիրի և Արարատի մարզերից է պահանջարկ եղել»,-Shantews-ին ասել է Սամվել Սաֆարյանը:

Արդեն 100 տոննա ծղոտ են վերամշակել ու վառելիք ստացել: Գյուղացիներից ծղոտը գնում են, վառելիք պատրաստում ու վաճառում կամ գյուղացին բերում է ծղոտը, վճարում սպասարկման դիմաց ու այն վերածում վառելիքի: Տեղական արտադրանքի արդյունավետությունը գնահատում են համեմատության մեջ՝ ծղոտե գլանակների 1 տոննան համարժեք է 3 խորանարդ մետր փայտին:

Արտադրամասը ջեռուցում են նույն գլանակների օգնությամբ: Մեկ կտորը վառարանում վառվում է բավական երկար ու բարձր ջերմատվությամբ:

Բրիկետների իրացումն ու օգտագործումն ավելի արդյունավետ դարձնելու համար որոշել են նախագծել ու պատրաստել վառարաններ հատուկ բիովառելիքի համար՝ էլի տեղական հումքով:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։