Գյումրիի Չերքեզի ձորի տարածքում սողանքներն ակտիվացել են

Գյումրիի Չերքեզի ձորի տարածքում սողանքներն ակտիվացել են: Ամեն գարնանը ձնհալի ու անձրևների հետևանքով սողանքային մարմինը սկսում է սահել: Իսկ սա խարխլում է տարածքում գտնվող տների և տնակների ամրությունը: Սողանքի հետևանքները տարածքի 207 տնակային թաղամասում 5 տարի առաջ են տեսանելի դարձել: Ժամանակավոր կացարանները սկսել են թեքվել դեպի ձորը: Տարածքը նախկինում հանգստյան գոտի է եղել և նախատեսված չի եղել կառուցապատումների համար:

88-ից հետո են տնակներն այստեղ հայտնվել: Այդ ժամանակ տեղանքի ընտրությանը ուշադրություն չէր դարձվում: Իրականում Չերքեզի ձորի ու բուսաբանական այգու տարածքը սողանքավտանգ է: Սրան գումարվել է նաև այն, որ այս տարածքում են 88-ից հետո կուտակվել ու հետո գրունտի վերածվել շենքերի փլատակները:

«Ամեն անձրևից ու ուժեղ քամուց հետո շարժը զգում ենք: Տնակները սահում են դեպի ձորը: Այս հատվածը նախկին «Տուրբազայի» տարածքն է: Երկրաշարժից հետո փլատակներն այստեղ են տեղափոխվել, դրանց վրա էլ հետո մարդիկ տուն են կառուցել ու տնակ տեղադրել: Մենք տնակը գնել ենք ու չգիտեինք, թե իրականում ինչ վիճակում է այս տարածքը»,- Shanmtnews-ին ասել է 207 տնակային թաղամասի բնակիչ Անդրանիկ Պողոսյանը:

Տնակներում ճաքեր են առաջացել: Ժամանակավոր կացարաններն առանձնացել են բետոնապատ հիմքերից: Գրունտը սահում է՝ տնակների տակ տարածքը դատարկվում է ու նստվածքներ են առաջանում:

Այն, որ այս տարածքը կանաչ գոտի է ու սողանքային, քաղաքի գլխավոր հատակագծում ամրագրված է եղել 2000-ականների սկզբին։ Այդ տարիներից օրակարգային է եղել տարածքում գտնվող տների ու տնակների ապամոնտաժումը: Տարիներ անց էլ քաղաքապետարանի պատասխանն անփոփոխ է՝ սողանքային գոտու կառուցապատումները քանդել չեն կարող:

«Կան մարդիկ, որոնք ժամանակին՝ երկրաշարժից հետո իրենց տները կառուցել են շատ սխալ տեղերում, տնակները սխալ տեղեր են դրել՝ սողանքային գոտիներում, սելավատարների վրա: Դրա համար էլ մեկ-մեկ բացվում են այդ պրոբլեմները: Պետք է կամաց-կամաց դրանք տեղափոխել այլ տեղ, այսինքն՝ պետք է քանդվեն վերջնական: Բայց հիմա ժամանակը չէ: Մենք չունենք այդ ռեսուրսները, այդ հնարավորությունները, որ միանգամից հարցը լուծենք»,- Shantnews-ին ասել է Գյումրիի գլխավոր ճարտարապետ Հենրիկ Գասպարյանը:

Տնակները բնակության պիտանի չեն, բայց և տարածքում ապրող ընտանիքներն անօթևանի կարգավիճակ չունեն, ու պետությունը փոխհատուցման պարտավորություն չունի: Տարիներ առաջ են գնել տնակներն ու չեն իմացել, որ տարածքը սողանքավտանգ է:

Քաղաքի գլխավոր հատակագծով, ըստ գլխավոր ճարտարապետի, ամրագրված են նաև սողանքի դեմ պայքարի միջոցառումները: Դրանք ևս թղթի վրա են, ինչպես կանաչ գոտիները կառուցապատումներից ազատելու հարցը: Ծառատունկը, որպես սողանքից պաշտպանվելու տարբերակ, բնակիչները վաղուց են կիրառել: Կան տնակներ, որոնք ձորում հայտնվելուց ապահովագրում են միայն  հաստաբուն ծառերը: Դրանք խնդրի լուծմանը տարիներով սպասող բնակիչների միակ  հուսալի պատնեշն են:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։