Շիրակի մարզում հեղեղումների վտանգը նվազեցնելու համար սելավատարներն են մաքրում

Շիրակի մարզի առանձին համայնքներում հեղեղումների վտանգ կա։ Խոսքը, մասնավորապես, Արթիկի տարածաշրջանի գյուղերի մասին է: Ձմռան ու գարնան առաջին ամիսները տեղումնառատ էին, իսկ ջերմաստիճանի բարձրացումը ստեղծում է հեղեղման վտանգ: Դրանով պայմանավորված, այս տարի գյուղերում սելավատարների մաքրման աշխատանքներն ավելի շուտ են սկսվել: Հողե հունով սելավատարները մաքրվում են տիղմից ու կենցաղային աղբից: Այս աշխատանքներն ամեն տարի գյուղերում տեղական բյուջեի միջոցների հաշվին են կատարվում:

Նոր Կյանք գյուղի սելավատարներ երեք ուղղություններով ջուր է հասնում: Մանթաշի ջրամբարից, Փանիկի ու Արթիկի ձնհալի ջրերն այստեղով են հոսում: Օրեր առաջ գյուղի սելավատարներում ջրի մակարդակը բարձրացել էր: Սա, գյուղացիներն են նշում, հնարավոր հեղեղումների առաջին նշանն էր:

«Մի քանի օր առաջ ջուրը բարձրացավ, անձրևից էր, ձնհալից էր: Ջուրն արդեն վտանգ էր ստեղծում: Սելավատարները սկսեցինք մաքրել, որ երբ գետերը վարարեն, վտանգ չլինի: Իսկ սելավներ այս տարի հաստատ կլինեն: Մեր սարերում դեռ ձյուն շատ կա»,- SHANTNEWS-ին ասել է Նոր Կյանքի գյուղապետի տեղակալ Արտավազդ Հակոբյանը:

Գյուղապետի տեղակալը է նշում՝ մաքրման աշխատանքները միայն ժամանակավոր լուծում են, որպեսզի հեղեղման ժամանակ վնասները նվազագույնը լինեն: Գյուղի այս հատվածում տներ են, անասնագոմեր, որոնք միշտ հեղեղումների ժամանակ տուժել են: Արթիկի տարածաշրջանում գրեթե բոլոր սելավատարները հողե հունով են: Ջուրը հեշտությամբ ճամփան փոխում է ու լցվում տներն ու անասնագոմերը: Ցանցի նորոգման ծրագրերը գյուղերի ուժերից վեր են: Անգամ սուբվենցիոն հայտ չեն ներկայացնում համաֆինանսավորման մեծ գումարների պատճառով:

«Առաջին վտանգից է սա պաշտպանում, բայց սա հարցի լուծում չէ: Պետք է հիմնովին մաքրվի, պաշտպանիչ շերտեր պետք է կառուցվեն: Մենք դիմել ենք մի քանի անգամ, որ մաքրվեն գոնե այն տեղամասերը, որտեղ ջուրն արդեն հունը փոխել է, բայց ծրագրեր չեղան»,- նշում է  Նոր Կյանքի գյուղապետի տեղակալը։

Հողե հունով սելավատարներով է ջուրը հասնում Վարդաքարի ջրամբար, ինչի պատճառով կորուստները շատ են, որն էլ հետո ջրի պակաս է առաջացնում ոռոգման սեզոնին: Նախորդ տարվա նույն ժամանակահատվածի համեմատ, այս տարի Վարդաքարի ջրամբարում ջրի քանակը շատ է: Ջրամբարները ձմեռացման բավարար պաշարով են գնացել, տեղումնառատ ձմեռն ու գարնան առաջին ամիսն էլ մուտքեր են ապահովել: Ու դեռ ձնհալը նոր է սկսվել:

Ջրամբարի ափերին տարբեր թռչուններ են բնադրում: Սա գյուղացիները համարում են իրենց գյուղերում աղբահանության կազմակերպման արդյունքը: Արթիկի տարածաշրջանի գրեթե բոլոր գյուղերում աղբահանություն են կատարում։ Հեղեղատարներում ու ջրամբարներում կենցաղային աղբի քանակությունը էականորեն պակասել է:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։