Մեկ տարի COVID 19-ի հետ. նախարարական բարձրաստիճան հանդիպմանը քննարկվել են համավարակի մարտահրավերները

Կայացել է «Մեկ տարի COVID-ի հետ. առաջնահերթությունը տալով կրթության վերականգնմանը՝ մեղմացնելու աղետի հետևանքները սերունդների համար» նախարարական բարձրաստիճան հանդիպումը, որի շրջանակում տեղի են ունեցել երեք զուգահեռ առցանց նստաշրջաններ: Միջոցառմանը մասնակցել են կրթության նախարարներ և ՅՈՒՆԵՍԿՕ-ի հետ համագործակցող գործընկեր կառույցների բարձրաստիճան անձինք:

ՀՀ ԿԳՄՍ նախարարի տեղակալ Ժաննա Անդրեասյանը մասնակցել է «Բաց պահել դպրոցները, առաջնահերթություն տալ և աջակցել ուսուցիչներին» թեմատիկ քննարկմանը: Փոխնախարարը շեշտել է նմանօրինակ հանդիպումների կարևորությունը լավագույն փորձի փոխանակման տեսանկյունից` յուրաքանչյուր երեխայի կրթության իրավունքն իրացնելու համար:

«2020 թվականը մեր երկրի համար լի էր մարտահրավերներով ոչ միայն COVID-19-ի, այլև սեպտեմբերին Ադրբեջանի կողմից Արցախի դեմ սանձազերծված պատերազմի պատճառով, որն իր ազդեցությունն ունեցավ նաև կորոնավիրուսի 2-րդ ալիքի տարածման վրա»,- նշել է Ժաննա Անդրեասյանը՝ տեղեկացնելով, որ Հայաստանում 2020-2021 ուսումնական տարին սկսվել է սեպտեմբերի 14-ին` միջգերատեսչական համագործակցության արդյունքում մշակված ընթացակարգերի և ուղեցույցների պահանջներին համապատասխան: Այդ համատեքստում նա ներկայացրել է կրթության ոլորտում համավարակի հաղթահարման ուղղությամբ իրականացված աշխատանքները:

Փոխնախարարի խոսքով՝ ներկայում որդեգրվել է իրավիճակային մոտեցում. եթե դպրոցում աշխատողների և սովորողների ընդհանուր թվի 10 և ավելի տոկոսի շրջանում արձանագրվում է կորոնավիրուսային հիվանդության վարակման դեպք, ապա դպրոցն անցնում է հեռավար կրթության:

Եթե սովորողն ունի կորոնավիրուսային հիվանդության ռիսկի խմբի հիվանդություններից որևէ մեկը, ինչպես նաև նրա ընտանիքի որևէ անդամ այդ հիվանդության ռիսկի խմբում է, ապա այդ աշակերտի համար ԿՏԱԿ-ն ուսումնական գործընթացը կազմակերպում է կենտրոնացված հեռավար ձևով:

«Այս պահին ունենք այդպիսի շուրջ 5000 սովորող: Նմանօրինակ միջոցառումները մեզ հնարավորություն են տալիս բաց պահել դպրոցները և միաժամանակ նվազեցնել հիվանդությունների տարածումը: Ինչ վերաբերում է ուսուցիչների առողջությանը և անվտանգությանը, ապա նշեմ, որ կորոնավիրուսային հիվանդության ծանր ընթացքով զարգացման բարձր ռիսկային խմբի, ինչպես նաև 65 և բարձր տարիքային խմբի ուսուցիչներին տրվել է աշխատանքի կազմակերպման ընտրության հնարավորություն, այդ թվում` համապատասխան պայմանների դեպքում հեռավար ձևաչափով աշխատելու տարբերակով»,- փաստել է փոխնախարարը:

Նրա խոսքով՝ աշխատանքի չներկայացող ուսուցիչների դեպքում դպրոցը կարող է ներգրավել փոխարինող ուսուցիչների՝ առաջացած թափուր ժամերի մասով։ Բացի դրանից՝ ուսումնական տարվա ընթացքում համավարակի հնարավոր նոր բռնկում կանխատեսելով՝ Կրթական տեխնոլոգիաների ազգային կենտրոնն իրականացրել է ուսուցիչների վերապատրաստում՝ «Հեռավար ուսուցման հմտություններ» թեմայով, որպեսզի ապահովվի սովորողների անխափան ուսումնական գործընթացը: Ելույթի ավարտին Ժաննա Անդրեասյանը փորձի փոխանակման համար շնորհակալություն է հայտնել ներկաներին և հույս հայտնել, որ շուտով հնարավոր կլինի հաղթահարել այդ մարտահրավերը:

Նշենք, որ միջոցառման նպատակն էր կրթության մասով ապահովել քաղաքական երկխոսություն՝ հրատապ և ընթացիկ մարտահրավերների վերաբերյալ, ինչպես նաև մոբիլիզացնել գործընկերներին՝ նոր գործիքներով և գիտելիքներով աջակցելու սովորողներին, ուսուցիչներին ու քաղաքականություն մշակողներին: