Շիրակի մարզում կորոնավիրուսի երրորդ ալիքը տարածման ակտիվ փուլում է

Կորոնավիրուսի երրորդ ալիքը Շիրակի մարզում տարածման ակտիվ փուլում է: Սա ցույց են տալիս Հիվանդությունների վերահսկման և կանխարգելման ազգային կենտրոնի «Շիրակ» մասնաճյուղի վերլուծությունները, ինչպես նաև պոլիկլինիկաներում կորոնավիրուսի ախտանշաններով դիմող հիվանդների թվի աճը: Հազ, թոքաբորբի ախտանշաններ, ջերմություն, թուլություն: Դիմողները նրանք են, որոնց մոտ նկատվում են այս ախտանշանները, որոնք բնորոշ են կորոնավիրուսին: C0vid-ի հետ մեկ տարվա համակեցության արդյունքում, բժիշկներն են նշում, որ ուշացած դիմողների թիվն է նվազել: Մարդիկ զգուշավոր են, դիմում են  ու թեստավորվում հիվանդության առաջին նշանների առկայության դեպքում:

Օրական կատարվող թեստավորումների և դրանց մեջ դրական արդյունք ունեցողների թիվն աճել է: Համաճարակաբանների համեմատությունը ձմռան ամիսների հետ է, երբ գործ ունեին կորոնավիրուսի երկրորդ ալիքի հետ:

«Վարակելիության ցուցանիշն է բարձր: Այսինքն՝ յուրաքանչյուր շաբաթ 1,5 անգամ ավելի դեպքեր են արձանագրվում, իհարկե կախված թեստավորումների քանակից: Եթե նախկինում  բոլոր հետազոտվածների 15-20%-ն էին կազմում հաստատված դեպքերը, ապա հիմա 35-40%-ն է հաստատվում: Սա նշանակում է, որ վարակը իր տարածման բավականին ակտիվ փուլում է»,-Shantnews-ին ասել է ՀՎԿԱԿ «Շիրակ» մասնաճյուղի տնօրենի տեղակալ Արմինե Անդրյանը:

Շիրակի մարզում, ըստ մասնագետի, վիրուսի տարածման երրորդ ալիքը ուշ սկսվեց, իսկ պատճառն այն էր, որ նախորդ ալիքի դեպքում մարզում հիվանդացության բավական բարձր մակարդակ էր գրանցվել, այսինքն՝ իմունային որոշակի շերտ կար ձևավորված: Հիմա վիրուսը ավելի ագրեսիվ է դարձել, և Հայաստանում արդեն նոր շտամներով վարակվածներ են հայտնաբերվել:

Կորոնավիրուսով երեխաների վարակվածության ցուցանիշը փոքր է: Այդուհանդերձ, նաև մանկահասակ ու դպրոցահասակ երեխաների շրջանում զգոնությունը պահպանելու խորհուրդ են տալիս բժիշկները: Մարզում մի քանի դպրոցներ որոշում են կայացրել հեռավար դասապրոցեսի անցում կատարելու մասին: Դպրոցներում հիվանդացության ու բացակայությունների թիվը մեծ չէ: Հեռավար դասերի անցնելու որոշումն, ըստ մասնագետի, զգուշությունից ելնելով է կայացվել:

«Ունենք 6-8 դպրոցներ, որտեղ 1-2 ուսուցչի կամ 1-2 աշակերտի մոտ է վիրուսը հաստատվել: Այսինքն՝ 1%-ն անգամ չի գերազանցում, միայն մեկ դպրոցում է, որ 1,5%-ն է գերազանցում: Սա պահանջվող ցուցանիշից շատ ցածր է, բայց հետագա դեպքերի տարածումը կանխելու համար, դպրոցներում կրթության վարչության հետ համաձայնեցրած, անցել են հեռավար կրթության: Պարզապես արվել է ապահով լինելու համար»,- նշել  է Արմինե Անդրյանը:

Շիրակի մարզում հիվանդացության վիճակը կայուն է ու վերահսկելի, այդուհանդերձ հիվանդանոցներում մահճակալային ծանրաբեռնվածությունը մեծ է: Մարտի 17-ից են «Գյումրի» կենտրոնի Covid բաժանմունքն ու Գյումրիի ինֆեկցիոն հիվանդանոցը վերաբացվել՝ որպես Covid բուժող հաստատություններ, այստեղ բուժում են ստանում հիվանդներ ոչ միայն Շիրակի մարզից, այլև ամբողջ հանրապետությունից:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։