«Հյուսիս-հարավ» մայրուղու Թալին-Լանջիկ և Լանջիկ-Գյումրի հատվածներում ասֆալտապատումը մեկնարկել է

«Հյուսիս-հարավ» արագընթաց մայրուղու Տրանշ 3-ի Թալին-Լանջիկ և Լանջիկ-Գյումրի հատվածների կառուցումը կավարտվի աշնանը։ Այս մասին այսօր հայտնել է ՀՀ տարածքային կառավարման և ենթակառուցվածքների նախարարի պաշտոնակատար Սուրեն Պապիկյանը։ Ժամանակավոր դադարից հետո շինաշխատանքները մեկնարկել են, Լանջիկ գյուղի հատվածում  ասֆալտապատման աշխատանքներն են տարվում։ Օրեր առաջ այս հատվածում փորձնական ասֆալտապատում էր կատարվել։ Փորձարկման արդյունքները բավարար են եղել։ Կապալառու չինական «Սինոհիդրո» ընկերությունը մինչև աշուն աշխատանքները նախատեսում է ավարտել։

«Որոշ ժամանակ առաջ իրականացրել ենք ասֆալտապատման աշխատանքներ փորձնական որոշակի տիրույթի վրա, որի հիման վրա որոշակի շտկումներ ենք կատարել՝ կապված մեթոդաբանության հետ: Նախորդ ուրբաթ օրը եռաշերտ ասֆալտի առաջին շերտն ենք արել: Սա խոշորահատիկ հիմքի շերտն է, մոտ 400 մետր իրականացվել է: Պլանավորում ենք, որ առնվազն մեկ կողմի երկու շերտի խոշորահատիկ շերտի և ասֆալտի տեղադրումն իրականացնենք,որից հետո կիրականացվի երթևեկության շեղում, կթույլատրենք այս հատվածով երթևեկել ու կապալառուն կանցնի երկրորդ կեսի հատվածի շինարարությանը»,- ասել է վերահսկողության կազմակերպության թիմի ղեկավարի տեղակալ Արամ Պետրոսյանը:

«Հյուսիս-հարավի» կառուցումը ձգձգվում է ու ժամկետներից շեղվել է: Սա նշեց տարածքային կառավարման և ենթակառուցվածքների նախարարի պաշտոնակատար Սուրեն Պապիկյանը: Պատճառները բազմաթիվ են՝ համավարակը, մայրուղու կառուցմանը վերաբերող հարուցված քրեական գործերը: Իսկ այժմ, համենայնդեպս, Թալին-Լանջիկ ու Լանջիկ-Գյումրի հատվածների շինարարության շարունակությանը, ըստ նախարարի պաշտոնակատարի, ոչինչ չի խանգարում:

Ըստ Սուրեն Պապիկյանի՝ քրեական գործերով է պայմանավորված նաև այն, որ, ի տարբերություն մյուս տրանշների, Թալին-Լանջիկ և Լանջիկ-Գյումրի հատվածները ոչ թե բետոնե ծածկով են լինելու, այլ ասֆալտապատ: Հայտնաբերված խախտումները հիմնականում բետոնի որակին են վերաբերում:

«Կան բազմաթիվ քրեական գործեր, որոնց մեջ նաև էական դերակատարում ունի գործող բետոնի որակի հարցը: Այսինքն՝ ՀՀ-ում առկա ցեմենտը կամ քարային հիմքը չի համապատասխանում այն ստանդարտներին, որոնք առաջադրել է բանկը: Դեպի Արտաշատ, Աշտարակ և Երևան տանող ճանապարհներին տեսանելի է բետոնի որակը: Սա մեր գերատեսչության միանձնյա որոշումը չէ: Երկար քննարկումներից հետո, այս հարցով զբաղվող հանձնաժողովը որոշում է ընդունել անցում կատարել ասֆալտբետոնյա ծածկի, որը բերելու է արագություն: Սեպտեմբերի դրությամբ մենք կունենանք շուրջ 42 կմ երկշերտ ասֆալտապատված հատված»,- ասել է ՀՀ տարածքային կառավարման և ենթակառուցվածքների նախարարի պաշտոնակատար Սուրեն Պապիկյանը:

Հիմա Երևան-Գյումրի մայրուղին, մեղմ ասած, դժվարանցանելի է: Մեծ ու փոքր փոսեր են ճանապարհի Շիրակի մարզի ամբողջ հատվածում: Քանի դեռ մայրուղու երթևեկությունը չի տեղափոխվել ասֆալտապատ տարածք, գործող ճանապարհը պարտավորվել է երթևեկելի վիճակի բերել կապալառու չինական ընկերությունը: Գործող ճանապարհի շահագործումը ժամանակավոր է: Հստակ ժամկետներ են նշվում, թե երբ Թալին-Լանջիկ ու Լանջիկ-Գյումրի հատվածներն ամբողջությամբ ասֆալտապատ կլինեն:

Այսինքն՝ Տրանշ 3-ի Թալին-Լանջիկ և Լանջիկ-Գյումրի հատվածները պատրաստ կլինեն աշնանը, իսկ շարունակությունը՝ Գյումրի-Բավրա հատվածը դեռ քննարկման փուլում է: Գյուղացիների հողատարածքների փոխհատուցման հարցերն են քննարկում: Բացի դրանից, ըստ նախարարի պաշտոնակատարի, այս հատվածի շինարարությունը ձգվում է դեպի Վրաստանի սահման և  պայմանավորված է նաև նրանով, թե արդյոք հարևան երկիրը նույնպես նախատեսում է նման որակի արագընթաց մայրուղի ունենալ:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։