Շիրակի մարզի գյուղերում հեղեղականխարգելման աշխատանքներ են տարվում

Շիրակի մարզի 10 համայնքների 61 բնակավայրերում կատարվում են հեղեղումների կանխարգելման աշխատանքներ: Ջերմաստիճանի բարձրացմանը զուգահեռ մեծանում է սելավների վտանգը: Ջրահեռացման համակարգի բացակայության կամ խցանված լինելու հետևանքով գրեթե ամեն տարի սելավները շատ գյուղերում ողողում են տներն ու տնամերձները: Մարզպետարանում հեղեղների կանխարգելման ծրագիր է մշակվել, ու առանձնացվել են այն համայնքներն ու տեղամասերը, որոնք առավել հեղեղավտանգ են: Սելավատարների մաքրման աշխատանքները կատարվում են գյուղապետարանների միջոցներով:

Անցած տարվա հուլիսի 10-ին Մարմաշեն խոշորացված համայնքի դաշտերը, տնամերձերը, տների նկուղներն ու գյուղի ճանապարհը մնացել էին սելավաջրերի տակ: Տիղմն ու ավազը ծածկել էին հացահատիկի դաշտերը: Սելավների հետևանքները մեկ տարի անց էլ դեռ Մարմաշեն համայնքի Վահրամաբերդ գյուղի դաշտերում պահպանվել են: Վահրամաբերդում մաքրման աշխատանքներն այս տարածքից են սկսել: Հողե հունով առվով սարից ձնհալի ջրերը հասնում են դաշտեր, գնալու տեղ չունեն, ողողում են ցանքերը:

«Տարածքն այնպիսին է, որ ջրահեռացման լիարժեք տեղ չունենք: Նախկինում գնում էր մինչև Գյումրի քաղաք, Գյումրիով մինչև Ախուրյան գետ: Հիմա այդ հնարավորությունը չունենք: Ստիպված կատարում ենք որոշակի մաքրման աշխատանքներ, որ հարակից վարելահողերը պաշտպանենք: Հարցի լուծումը մնում է այն, որ վերջնական սելավատարը նախկին կարգով, հունով մաքրվի,որ հնարավորություն լինի տարվա մեջ մեկ անգամ մաքրելով դաշտերը պաշտպանել»,-SHANTNEWS-ին ասել է Վահրամաբերդ գյուղի վարչական ղեկավար Աղվան Մարտիրոսյանը:

Տեխնիկան հիմա ջրի համար ճամփա է բացում, որ հնարավոր հեղեղների ժամանակ վնասները քիչ լինեն ու ջուրը որոշ չափով ցանքերը շրջանցի: Վահրամաբերդից Հովունի գյուղ ու Գյումրի ձգվող ջրահեռացման համակարգը չի աշխատում: Մինչև 88-ը համակարգը գործել է, սելավաջրերը հոսել են դեպի Ախուրյան գետը: Հետերկրշարժյան տարիներին այդ տարածքում Գյումրիի բնակելի թաղամասերն են կառուցվել, ու ստացվել է, որ ջրահեռացման համակարգն ավարտվում է դաշտերի մեջտեղում:

«Շատ տեղերում կոնկրետ համակարգ չունենք, առուներ են, որոնց տարողունակությունն ավելի քիչ է, քան եկող ջուրը: Դրա համար շատ տեղերում նեղ հունի պատճառով առաջանում են հեղեղումները: Տեղեր կան՝ հնարավոր չէ հուները լայնացնել: Փորձում ենք մի քիչ խորացնելու հաշվին ջրի ավելի մեծ տարողունակություն ապահովել»,-SHANTNEWS-ին ասել է Շիրակի մարզպետարանի ՏԻՄ և հանրապետական գործադիր մարմինների հարցերով վարչության պետ Արամ Անտոնյանը:

Օրինակը Վահրամաբերդում է: Դաշտամիջյան սելավատարը խորացնում են, որ հնարավորիս շատ սելավաջուր կարողանա տեղավորել: Գյուղի վարչական ղեկավարը նշում է, որ սա դաշտերը կապահովագրի մինչև առաջին հորդառատ անձրևը: Հողե հունով սելավատարով ավելին անել չեն կարող:

Սելավատարների մաքրումը անհապաղ սկսելու հանձնարարական է տրվել մարզի 10 համայնքի 61 բնակավայրերի ղեկավարներին: Որ գյուղերի տարածքում թեկուզ փոքրիկ առուներ ու գետակներ կան, մաքրման աշխատանքները անհրաժեշտություն են: Ընդհանուր Շիրակի մարզում մաքրման ենթակա է 40 հազար գծամետր սելավատար: Իսկ հեղեղումների վտանգը մարզում մինչև հուլիս պահպանվում է:

Այս տարի մարտի վերջին մարզի մի քանի գյույղերում ոչ մեծ վնասներով , բայց հեղեղումներ եղել են: Խոսքը Փանիկ, Հայկավան և Ոսկեհասկ գյուղերի մասին է: Այստեղ ևս առանձին տեղամասերում ջրահեռացման համակարգը բացակայում է:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։