Շիրակի մարզի Հայկավան գյուղում այգիները պաշտպանում են հակակարկտային ցանցերով

Հայաստանում կարկտահարությունից պաշտպանվելու երկու տարբերակ է կիրառվում: Ամենատարածվածը հակակարկտային կայաններն են, ավելի քիչ կիրառություն, բայց բարձր արդյունավետություն ունեն հակակարկտային ցանցերը, որոնց ձեռքբերման արժեքն է բարձր: Հակակարկտային ցանցերը կիրառվում են այգիների պաշտպանության համար: Շիրակի մարզի Հայկավան գյուղում 19 տնտեսություն հակակարկտային ցանցերով է այգիները կարկուտից պաշտպանում: Սա հնարավոր է եղել իրականացնել Գերմանիայի կառավարության միջոցներով ու «Կանաչ արահետ» հասարակական կազմակերպության նախաձեռնությամբ:

Բացի կարտոֆիլից ու ցորենից այստեղ տարբեր մշակաբույսեր են գյուղացիները փորձարկում ու տեղայնացնում: Հայկավանի հողը բարենպաստ է այնպիսի մշակաբույսերի համար, որոնք փոքր հողակտորներից մեծ եկամուտ են ապահովում: Գյուղում 19 ընտանիք ազնվամորու նոր տեսակների այգի է հիմնել:

«Անցած տարի փոքր հողակտորից 470 կգ բերք եմ ստացել: Նոր տեսակի տնկիները և հակակարկտային պաշտպանությունը միասին օգնել են, որ բերքատվությունը բարձր լինի: Երբ կարկուտ է գալիս, լցվում է ցանցերի վրա, միանգամից չի հասնում բույսին ու չի վնասում: Անցած տարի գյուղում կարկուտ եկավ, մոտ 150 կգ կարկուտ էր լցվել ցանցերի վրա, բայց դիմացավ ու այգին էլ պաշտպանեց»,- Shantnews-ի հետ զրույցում ասել է Հայկավան գյուղի բնակիչ Գևորգ Հարությունյանը:

Աշխատանքից լավ արդյունք ստանալու մյուս երաշխիքն էլ այն է եղել, որ այգին կարկտահարությունից չի տուժել: Հակակարկտային ցանցերն են ապահովագրում: Գյուղացիները ձմռանը ցանցերը կոնսերվացրել են, հիմա նորից այգիները ծածկում են, ամրացնում: Հետն էլ բացատրում են, թե ինչպես են ցանցերը կարկուտի ճամփան փակում:

Ցանցերը էլաստիկության հաշվին չեն թողնում, որ կարկուտը հողին հասնի, մոտ 25 տարվա գործարանային երաշխիք ունեն: Ամռանը այգիները արևից ու թռչուններից են պաշտպանում: Իսկ կարկտահարության դեմ արդյունավետությունը մեծ է, քանի որ, ի տարբերություն հակակարկտային կայանների, կոնկրետ տեղանքն է ծածկում:

«Մենք պատկերացում անգամ չենք ունեցել կարկտահարությունից պաշտպանվելու այս տարբերակի մասին: Այս համակարգը բարձրակարգ է, բայց գյուղացու գրպանին հարմար չէ: Մյուս կողմից էլ` ավելի լավ է մեկ անգամ գումար ներդնել ու այգիները ապահովագրել, քան թե վախով ապրել ու սպասել, թե սեզոնին ինչ է լինելու»,- ասել է Հայկավանի գյուղացիական կոոպերատիվի անդամ Արշակ Սերոբյանը:

Հակակարկտային ցանցերի ձեռք բերման արժեքն է բարձր: Դրա համար էլ լայն կիրառություն չունի: Բայց գյուղացիներն են նշում` արդյունքն արդարացնում է ծախսերը: Ազնվամորու տնկիների արանքներում էլ ոչ մի սանտիմետր հող դատարկ չի մնում:

Շուտով Հայկավանում կոլորաբի և ծնեբեկ են ցանելու: Սրանք բարձրարժեք մշակաբույսեր են, որոնք նաև ժողովրդական բժշկության մեջ են տարածված: Իսկ երբ բերքը շատանա, գյուղացիական կոոպերատիվով որոշել են պահեստավորման ու պահածոյացման արտադրամաս հիմնել: Այժմ ծրագրի առաջին փուլն է մեկնարկել, գյուղում կոոպերատիվի գրասենյակ ու հյուրատուն են կառուցում:

   «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։