Գյումրիի կանանց ֆուտբոլային ակումբը հաջորդ մրցաշրջանում կմրցի Չեմպիոնների լիգայում

Ավարտին է մոտենում Հայաստանի կանանց ֆուտբոլի բարձրագույն առաջնությունը։ Տիտղոսային եռյակում երկու թիմերը Գյումրիի ներկայացուցիչներն են։ «Գյումրի» ակումբը  ամրապնդել է դիրքերը 3-րդ հորիզոնականում, իսկ «Հայասան» առաջնության ավարտից առաջ արդեն նվաճել է չեմպիոնությունը։ Թիմը  մրցաշրջանում կարողացել է 6 մրցակիցների մրցապայքարում ամրապնդել առաջատարի դիրքերը։ Անցկացրած 14 հանդիպումներից ոչ մեկում  ակումբը չի պարտվել և ունի 38 միավոր։ Այժմ թիմը պատրաստվում է առաջնության վերջին  հանդիպմանը, ինչից հետո չեմպիոնական տիտղոսով հանդես է գալու կանանց Չեմպիոնների լիգայում։

Հիմա պատարաստվում են առաջնության վերջին խաղին։ Այս մարզադաշտում մայիսի 31-ին մրցելու են կանանց ֆուտբոլի  Գյումրին ներկայացնող  երկու ակումբները։ «Հայասա» – «Գյումրի»  դերբիում  «Հայասայի» մրցակիցը երրորդ հորիզոնականի տիտղոսակիրն է։

Այս շաբաթ կայացած վերջին տուրում «Հայասա»-ն իր հարկի տակ ընդունել էր Երևանը ներկայացնող ՈՒրարտուին, հաղթել 12-0 հաշվով։ Թիմը դեռ երկու հանդիպում ունի մինչ կգնա արձակուրդ, ինչից հետո կսկսի բարդ ստուգատեսին պատրաստվել։ 

Shantnews-ի հետ զրույցում թիմի գլխավոր մարզիչ Սենիկ Առաքելյանը նշեց, որ ՉԼ-ին պատրաստվելու համար, գուցե մտածեն նոր տրանսֆերների մասին, բայց ամեն դեպքում թիմից հիմա էլ գոհ է․

 «Երևի կլինեն նոր համալրումներ, որովհետև ավելի բարձր ստուգատեսում հանդես գալու համար պետք է ավելի լավ պատրաստվել։ Տեղի կադրերն էլ պետք է ձգտեն ամրապնդվել և կարողանան ապահովել մրցակցությունը։ Ամեն դեպքում թիմը բարոյակամային որակների շնորհիվ կարողանում է հաղթել։ Թիմը սիրում է մտածել և նախաձեռնող է։ Երբեք հանդես չի գալիս 2-րդ համարով․ միշտ լիդեր է խաղադաշտում»,-նշել է թիմի մարզիչը։

Հիմա թիմում 3 լեգիոներներ են հանդես գալիս՝ ձախեզրային հարձակվող Ֆաուստինա Կյերեմեն,  Արինա Իվանովան և դարպասապահ Ալլա Գերասիմչուկը։  «Հայասա»-ն առաջնության մեկնարկից ի վեր 153 գնդակ է ուղարկել մրցակիցների դարպասը, բաց թողել՝ 5-ը։ Գերասիմչուկի պաշտպանած դարպասում գնդակը   հայտնվել է  ընդամենը 1 անգամ՝ Ալաշկերտի հետ կայացած հանդիպմանը։ Մրցաշրջանի դժվարությունն էլ հենց այդ հանդիպումից էր կախված։ Ալաշկերտի խփած միակ գոլին ի պատասխան՝ «Հայասա»-ն երկու գոլով մրցաշարի 15-րդ տուրում ամրագրել է չեմպիոնական տիտղոսը։

Հաջորդ հանդիպմանը թիմը սպասում է ստանալ վաստակած չեմպիոնական մեդալները և կանանց Չեմպիոնների լիգայի ուղեգիրը։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։