Շիրակի մարզի գյուղերում բնակարանաշինական ծրագրի տեմպերը նվազել են. աշխատուժը մեկնել է արտագնա աշխատանքի

Շիրակի մարզում բնակապահովման միակ ծրագիրը գյուղական բնակավայրերում իրականացվող բնակարանաշինությունն է, որն անցած տարի է մեկնարկել: Մարզի 7 գյուղերում 26 տուն է կառուցվում: Շահառուներն այն անօթևան ընտանիքներն են, որոնք հրաժարվել էին բնակարանի գնման վկայագրերից: Մոտ մեկ տարի ընթացող շինարարության արդյունքում դեռ 4 տան շինարարություն է մոտենում ավարտին:

Ընտրված բնակարանաշինության տարբերակն այնպիսին է, որ տանտերն ինքն է գտնում շինարարին կամ շինաշխատանքներն ինքնուրույն է կատարում, իսկ շինանյութի և աշխատավարձի գումարը փոխհատուցում է կառավարությունը: Շիրակի մարզի գյուղերում այժմ շինարարների պակաս կա: Գյուղերում աշխատուժը մեկնել է արտագնա աշխատանքի:

Ախուրյան խոշորացված համայնքի Բասեն գյուղում հին տան կողքին Ոսկան Սաֆարյանը նորն է կառուցում: Պատշարն ավարտված է, տանիքը կապել է, հիմա նոր տան աստիճանահարթակն է կառուցում: Գործը սկսել է, երբ գյուղում շինարարական բրիգադ կար՝ բարեկամներով ու հարազատներով միասին աշխատում էին: Հիմա մնացած գործը մենակ է շարունակում:

«Սկզբում աշխատում էինք 6 հոգով: Հետո գնացին արտագնա աշխատանքի: Հիմա մենակ եմ մնացել, որպես տանտեր: Չեմ կարող տղաներին ստիպել, թե մնացեք, իմ տան շինարարությունը վերջացնենք: Արտագնա աշխատանքի մեկնելն ավելի եկամտաբեր է»,- Shantnews-ի հետ զրույցում ասել է Բասեն գյուղի բնակիչ Ոսկան Սաֆարյանը:

Գյուղերում բնակարանաշինությունը մեկնարկեց անցած տարի, երբ համավարակով պայմանավորված, սահմանները փակ էին, արտագնա աշխատանքի մեկնողները գյուղում էին մնացել, ու պետական ծրագիրը շատերի համար աշխատանք ունենալու միակ հնարավորությունն էր: Հիմա, երբ խոպանի ճամփան բաց է, գյուղում շինարարության աշխատանքը փոխարինել են ավելի բարձ վարձատրվողով:

«Ամեն տարի գյուղից մոտ 300 մարդ մեկնում է արտագնա աշխատանքի: Այս տարին ևս բացառություն չէր: Հատկապես կորոնավիրուսով պայմանավորված՝ սահմանափակումները հանելուց հետո բոլորը մեկնել են: Այս պահին շինարար էլ չի մնացել»,- ասել է Բասեն գյուղի վարչական ղեկավար Ռոման Համայակյանը:

Բասենում 5 տուն է կառուցվում: Ավարտի ժամկետ սահմանված է այս տարվա նոյեմբերը: Ավելի շուտ կավարտվի այն տների շինարարությունը, որոնք կիսակառույցների հիմքի վրա են: 26 տների շինարարությունով գյուղերում անօթևանության հարցը վերջնականապես չի լուծվի: Շատ են փաստացի անօթևան այն ընտանիքները, որոնց քաղաքաշինության կոմիտեն շահառու չի ճանաչել: Բասենում 3 ընտանիք անօթևանության կարգավիճակի վերականգնման հարցը վիճարկել է դատարանում:

«Հերթացուցակից դուրս մնալու պատճառները տարբեր են: Հիմնականում փաստաթղթերը չեն ներկայացրել կամ ուշացումով են ներկայացրել: Մեկ ընտանիքի դեպքում պատճառը սեյսմիկ գնահատումն է եղել: Տունը գնահատվել է 3-րդ մասնակի 4-րդ աստիճանի վթարայնության: 3 ընտանիք դիմել է դատարան: 2-ի դեպքում Վարչական դատարանի վճիռը կա՝ հօգուտ գյուղացիների: Նրանք ճանաչվելու են շահառու: Երրորդ ընտանիքի դեպքում ևս Վարչական դատարանը հօգուտ գյուղացու է կայացրել, բայց քաղաքաշինության կոմիտեն վճիռը բողոքարկել է»,- Shantnews -ին ասել է Բասեն գյուղի վարչական ղեկավար Ռոման Համայակյանը:

Դատարանի որոշմամբ շահառու ճանաչված երկու ընտանիքների համար կառավարության որոշում պետք է կայացվի, համաձայն որի՝ կորոշվի փոխհատուցման տարբերակը:

  «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։