Շիրակի մարզում 167 դիմորդ այսօր միասնական քննություն է հանձնել «Կենսաբանություն», «Ընդհանուր պատմություն» և «Աշխարհագրություն» առարկաներից

Այսօր մեկնարկել են բուհական ընդունելության միասնական քննությունները: Առաջին օրը դիմորդները քննություն են հանձնել «Կենսաբանություն», «Աշխարհագրություն» և «Ընդհանուր պատմություն» առարկաներից: Գյումրիում քննություններն անցկացվել են մեկ քննական կենտրոնում, մասնակից դիմորդների թիվը եղել է 167-ը:

Պարտադիր ջերմաչափումից ու ախտահանումից հետո, դիմորդները հերթական համարներն են ստանում ու լսարաններում իրենց տեղերը զբաղեցնում: Լսարանում արդեն փոքր-ինչ լարվածությունը մեծանում է: Կենտրոնանալու, իմացածը թղթին հանձնելու պատասխանատու պահն է: Իսկ անցողիկ շեմ ասվածը տարբեր բաժինների ու ֆակուլտետների համար տարբեր է: Մեծ մասի դեպքում կրկին բավարար կլինի յոթուկես միավորը:

«Նախորդ տարիների փորձը հաշվի առնելով, ինձ թվում է, որ բավարար շեմը հաղթահարելու դեպքում հնարավոր կլինի ընդունվել բուհ: Իհարկե, խոսքն այնպիսի բաժինների մասին չէ, ինչպիսիք են, օրինակ, Բժշկական համալսարանի բաժինները, իրավաբանականը, ծրագրավորումն ու կիրառական մաթեմատիկան: Այն մասնագիտություններում, որոնք քիչ պահանջված են, յոթուկես միավորը բավարար կլինի ընդունվելու համար»,- Shantnews-ին ասել է Գյումրիի թիվ 21 դպրոցի քննական կենտրոնի ղեկավար Արմեն Ասրյանը:

Այսօր ամենաշատ դիմորդները «Կենսաբանություն» հայտագրածներն էին՝ մեծ մասը Բժշկական համալսարանի ապագա ուսանողներ, իսկ արդյունքում՝ բնագիտական առարկաներից «Կենսաբանությունն» ու «Քիմիան» պահանջված են, ինչը չի կարելի ասել շատ այլ առարկաների մասին: Օրինակ՝ «Աշխարհագրությունից» ամբողջ Շիրակի մարզում ընդամենը 11 դիմորդ էր քննություն հանձնում:

Ամենաշատ դիմորդները «Հայոց լեզու», «Օտար լեզու» և «Մաթեմատիկա» առարկաներից են, ինչը ևս պայմանավորված է սրանով, որ այս առարկաները պարտադիր են շատ բաժիններում ընդունվելու համար: Վերջին տարիների համեմատ «Մաթեմատիկա» հայտագրողների թիվն է ավելացել, ծրագրավորման ու կիրառական մաթեմատիկայի բաժիններն են պահանջված, և առարկայի նկատմամբ հետաքրքրությունը մեծ է: Դիմորդների և բուհական ընդունելության քննություններ հանձնածների վերջնական թիվն ամփոփվելու է միասնական քննությունների երկրորդ փուլից հետո՝ հուլիսի 2-8-ը: Երկրորդ փուլին կմասնակցեն այն դիմորդները, որոնք առաջին փուլին չեն հայտագրվել կամ հայտագրվել են և  քննության չեն ներկայացել:

«Միասնական քննությունների առաջին փուլը տևելու է մինչև հունիսի 25-ը: Հունիսի 26-ից հուլիսի 1-ը տեղի կունենա երկրորդ փուլի հայտագրումը: Նրանք, ովքեր առաջին փուլում չեն հայտագրվել կամ չեն մասնակցել, հուլիսին արդեն Երևանում կհանձնեն միասնական քննություն: Անկախ նրանից, թե առաջին փուլին ինչ պատճառով չեն ներկայացել, կարող են մասնակցել երկրորդ փուլին: Այսինքն՝ նրանք, ովքեր առաջին փուլում բավարար գնահատական չեն ստացել կամ ցածր են ստացել, չեն կարող մասնակցել երկրորդ փուլին»,- Shantnews-ին ասել է Արմեն Ասրյանը:

Այսօրվա քննությունների արդյունքները կհրապարակվեն հունիսի 13-ին, որից հետո դիմորդներին մեկ օրվա ընթացքում գնահատականը բողոքարկելու հնարավորություն կտրվի: Էլեկտրոնային բողոքարկման արդյունքները պարզ կլինեն միասնական քննությունների առաջին փուլից հետո:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։