Տեղական դիտորդները պատրաստվում են արտահերթ ընտրությունների․Գյումրիում նրանց համար դասընթացներ են կազմակերպվել

Հունիսի 20-ի արտահերթ խորհրդարանական ընտրություններին ընդառաջ տեղական դիտորդական  խմբերի համար  դասընթացները կշարունակվեն մինչև հունիսի 20-ը։ «Ականատես» դիտորդական առաքելության  նախաձեռնությամբ Գյումրիում անցկացվող դասընթացների մասնակիցները  ընտրատեղամասերում հետևելու են  ընտրական գործընթացների կազմակերպման, ընտրախախտումների և վիճահարույց դրվագներին։ Մասնակիցների մեծ մասը առաջին անգամ են այս  պատասխանատու աշխատանքը կատարելու։  

 Ընտրության օրը տեղամասերում դիտորդական աշխատանք կատարելու համար, համեմատ նախորդ ընտրությունների, դիմողների թիվը մեծ է։  Դասընթացների մասնակիցները ընտրության օրը կարճաժամկետ դիտորդական առաքելություն են  իրականացնելու։ Դիտորդի իրավունքները, պարտականությունները և ընդհանրապես դիտարկման թեմաներն ու  ընտրատեղամասերում անհրաժեշտ գործողությունները դասընթացի առանցքային մասն են։ Մարզում դիտորդական առաքելությունը ստանձնելու դիմումները շատ են, բայց որոշակի նախապայմաններ են գործում, որոնք բավարարելու դեպքում են դասընթացների մասնակիցները հայտնվում դիտորդի կարգավիճակում․

«Ընտրում ենք միայն անաչառ և անկողմնակալ անձանց, որոնք չեն հարում որևէ կուսակցության, կուսակցական պատկանելություն չունեն և, իհարկե, իրենց նպաստն են ուզում բերել ժողովրդավարության զարգացմանը և արդար ընտրությունների անցկացմանը»,- Shantnews-ի հետ զրույցում  ասել է դասընթացավար Լևոն Չուկակլյանը։

 Ընտրական գործընթացների ճիշտն ու սխալը որպես ընտրող գիտեն, այսինքն՝ սեփական իրավունքների և պարտականությունների տիրույթում, այժմ մասնագիտանում են, թե ինչպես է պետք հետևել տեղամասում հանձնաժողովների անդամների աշխատանքին, ընտրողների քվեարկության մասնակցության կարգին։ Դասընթացի մասնակիցներից Նունեն առաջին անգամ է, որ դիտորդական առաքելության գործառույթներն է ուսումնասիրում, ինչպես ինքն է նշում, որպես դիտորդ, իր ներկայությունն ընտրատեղամասում ազատ ընտրությունների ևս մեկ երաշխիք է։ 

«Ընդհանուր ընտրական գործընթացներից տեղյակ եմ մասամբ, որպես քաղաքացի, որպես ընտրող։ Անընդհատ ուշադիր ես լինում, ծանոթ ես կարգին, բայց, բնականաբար, կան նյուանսներ, տարրեր, որոնք մասնագիտական, խոր ծանոթացումից հետո քեզ պարզ կլինեն»,- նշել է Նունե Ղազարյանը։

Կարճաժամկետ դիտորդական առաքելությունն իր դերն ունի, երկարաժամկետ դիտորդությունն՝ իր, բայց երկուսի դեպքում էլ պատասխանատվությունն է գերակա։ 

«Մասնակիցների հայտնաբերած խախտումների և բացահայտած խնդիրների մասով  մեր առաքելության կողմից մշակվում են առաջարկներ, բարեփոխումներ, որոնք տեղ են գտնում Ընտրական օրենսգրքի բարեփոխումների պլաններում, ինչպես նաև հանդիպումների և տարբեր գործընթացների միջոցով ԿԸՀ-ին և տարածքային հանձնաժողովներին ներկայացվում են ինչպես բողոքարկումներ, այնպես էլ առաջարկներ, որոնք ընդունվում կամ բավարարվում են ինչ-որ չափով»,- ասել է Լևոն Չուկակլյանը։

Այսինքն՝ տեղամասերում դիտորդների դիտարկման առանցքում են հայտնվում և՛ ընտրողը, և՛ հանձնաժողովի անդամները, և՛ բոլոր ընթացակարգերը։ Այս դասընթացները կարճաժամկետ դիտորդական առաքելությանն են առնչվում, վաղ երկարաժամկետների համար ևս անցկացվել են։ Երկուսի գործառույթների տարբերությունն այն է, որ երկարաժամկետ դիտորդները ընտրական գործընթացներին հետևում են նախընտրական շրջանից սկսած, արձանագրում են քարոզչության ընթացքում դիտարկված խախտումներն ու խնդրահարույց իրավիճակները: Կարճաժամկետ դիտորդներն աշխատելու են միայն ընտրության օրը և ընտրատեղամասերում։ 

  «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։