Այրման ճակատագրական հետևանքները․ խեժ

Ժամանակակից աշխարհում մարդկության առաջ օրեցօր ծառանում են ավելի ու ավելի լուրջ վտանգներ, որոնք լուրջ սպառնալիք են հասարակության բարեկեցության ու հանրային առողջության համար․ շրջակա միջավայրի ու մթնոլորտի աղտոտում, ջերմոցային գազեր, աղտոտված օվկիանոսներ, անտառահատումներ, մարդածին վտանգներ․․․ կարելի է անվերջ թվարկել, բայց լուծումներ գտնելն ավելի է դժվարանում։

Վերը նշված աղետների հետ միաժամանակ՝ մարդն ինքն իր առողջության համար վտանգներ է ստեղծում։ Հիմա շատերն են անհանգստանում աշխարհում հարյուր հազարավոր մարդկանց կյանքեր խլած կորոնավիրուսային վարակի մասին՝ անուշադրության մատնելով տարեկան 8 միլիոն մարդու կյանք խլող մեկ այլ համաճարակի՝ ծխելու մասին։

Նիկոտինն առաջացնում է կախվածություն

Ծխելն աշխարհում դարձել է իրական վտանգ, որն անխտիր խլում է մարդկանց կյանքերը՝ չխնայելով ո՛չ երիտասարդներին, ո՛չ ծերերին։ Կա տարածված կարծիք, որ ծխելու հետևանքով առաջացող հիվանդությունների հիմնական պատճառը նիկոտինն է, որն առաջացնում է կախվածություն ու սպանում մարդկանց։ Այնուամենայնիվ, իրականացված բազմաթիվ գիտական ուսումնասիրություններն ու հետազոտությունները ցույց են տվել, որ ծխելու հետևանքով մարդկային առողջությանը հիմնական վնասը հասցնում են ծխախոտի այրման արդյունքում արտազատվող ծուխն ու խեժը։

Այրումը և խեժը՝ վնաս

Ծխախոտի այրման արդյունքում մարդը ներքաշում է թունավոր ծուխն ու խեժը, որն օրգանիզմում վտանգավոր նստվածք է առաջացնում։ Ծուխը պարունակում է ավելի քան 6000 վնասակար թունավոր նյութ, որից առնվազն 100-ը քաղցկեղածին է։ Խեժը սիգարետի ծխի մնացորդն է՝ նիկոտինի ու ջրի հեռացումից հետո։ Խեժն առաջանում է ծխախոտի այրման հետևանքով: ԱՄՆ-ի Քաղցկեղի ազգային ինստիտուտը նշում է, որ խեժը պարունակում է ամենաքաղցկեղածին տարրերն ու քիմիական նյութերը, որոնք հայտնաբերված են սիգարետի ծխում։ Երբ ծխողը ներքաշում է ծուխը, խեժը կպչուն շերտ է առաջացնում թոքերի ներսում։ Սա վնասում է թոքերն ու կարող է թոքերի քաղցկեղի, էմֆիզեմայի և այլ թոքային խնդիրների առաջացման պատճառ դառնալ։ Հարկ է նշել, որ խեժը միայն թոքերի վրա չէ ազդում։ Խեժի բաղադրության մեջ գտնվող թունավոր նյութերը կարող են ներթափանցել արյան մեջ և այդպիսով հայտնվել ամբողջ օրգանիզմում։ Քանի որ ծխախոտն օգտագործվում է բերանի միջոցով, խեժը կարող է նաև առաջացնել բերանի խոռոչի քաղցկեղ։

Երկրորդային ծուխ

Ծխախոտի ծուխն ու խեժը լուրջ սպառնալիք են հանդիսանում նաև երկրորդային ծխողների համար, որոնք չեն օգտագործում սիգարետ, սակայն անընդհատ գտնվում են ծխողների շրջապատում։ Ներքաշելով այրվող սիգարետի ծուխը՝ նրանք նույն կերպ կարող են ենթարկվել թունավոր նյութերի ազդեցությանը։

Հարց է առաջանում՝ ի՞նչ անել, եթե ծխողը չի ցանկանում կամ չի կարողանում թողնել ծխելը։ Պատասխանը մեկն է՝ այլընտրանքներ կամ փոխարինիչներ։ Բարեբախտաբար, ժամանակակից տեխնոլոգիաները հնարավորություն են տալիս ծխողներին նվազեցնել իրենց առողջությանը հասցվող վնասը և չենթարկվել սիգարետի թունավոր ազդեցությանը։ Սիգարետի այլընտրանքները՝ էլ․սիգարետը, ծխախոտի տաքացման համակարգերը, նիկոտինային մաստակը, սպեղանին և այլն, չեն առաջացնում այրում, և, բնականաբար, ավելի քիչ վնասակար են մարդկային առողջության համար։ Այրման բացառումը հնարավորություն է տալիս 90-95%-ով նվազեցնել օրգանիզմ ներթափանցով թունավոր քիմիական տարրերի ծավալը՝ ծխողին հնարավորություն տալով ստանալ նիկոտինի անհրաժեշտ չափաքանակն ու միաժամանակ, բացառել քաղցկեղի և այն ծխախոտածին հիվանդությունների առաջացումը։