Հիմնանորոգվում է Գյումրին սահմանամերձ գյուղերին կապող ճանապարհը

Շիրակի մարզում այս տարվա ճանապարհաշինական ծրագրերում են ընդգրկվել ճանապարհահատվածներ,որոնք 30 տարուց ավելի հիմնանորոգում չեն տեսել: Օրինակը՝ Սպիտակ-Գյումրի- Թուրքիայի սահման ճանապարհի մասին է: Ճանապարհը Գյումրին կապում է Առափի, Ոսկեհասկ, Ախուրիկ գյուղերին ու հասնում մինչև սահմանային հատված: Միջպետական նշանակության ճանապարհը հիմնանորոգվում է պետբյուջեի միջոցներով: Խորհրդային տարիներին Ոսկեհասկը, Առափին համարվել են սահմանամերձ գյուղեր, մուտքն այստեղ եղել է անցագրերով։

«Այս ճանապարհի վերջնամասը հատվում է Ախուրիկ գյուղում գտնվող կամուրջի մոտ: Ժամանակին այստեղով գործել է երկաթուղուն զուգահեռ ճանապարհ դեպի Ղարս: Հիմնանորոգվում է այդ ճանապարհի միայն մինչև Ախուրիկ գյուղ հասնող հատվածը: 30 տարուց ավելի այստեղ անգամ փոսային նորոգումներ չեն եղել»,-Shantnews-ին ասել է Ոսկեհասկի գյուղապետ Արտաշես Սահակյանը:

Վերակառուցվում է  4 կմ` Շիրակի մարզի Առափիից մինչև Ախուրիկ գյուղ ընկած հատվածը: Առափիի հատվածում նաև կամուրջն է վերակառուցում: Կամուրջը Ախուրյան գետի վրա է կառուցված՝ խոնավության հետևանքով նստվածքներ են առաջացել: Հիմա կամուրջը վերակառուցվում է ջրամեկուսացման տեխնոլոգիայով:

«Կամուրջի աջ հատվածում ճահճային տարածք է : Խոնավության հետևանքում քարերը քանդվել էին: Հիմա շինարարները նոր տեխնոլոգիաներով են վերակառուցում՝ ավելի ամուր կամուրջ ունենալու համար: Այս ճանապարհը այլընտրանքային է Գյումրի-Արմավիր ճանապարհի համար, որտեղով երթևեկում են Ախուրիկ գյուղի բնակիչները»,- ասել է Արտաշես Սահակյանը:

Հիմնանորոգվող 4 կիլոմետրանոց հատվածով մինչ այս երթևեկում էին միայն Ոսկեհասկ գյուղի բնակիչները, այլընտրանք չունեին: Իսկ ախուրիկցիների համար ավելի հարմար էր քաղաք հասնել Գյումրի-Արմավիր ճանապարհով: Հիմա այն գրեթե անանցանելի է, իսկ հիմնանորոգվող հատվածը դարձել է այլընտրանքային Ախուրիկ գյուղի համար:

Ընդհանուր առմամբ Շիրակի մարզում այս տարի իրականացվող ճանապարահաշինական աշխատանքների բյուջեն կազմում է 24 մլրդ 350 մլն դրամ: Գումարային հաշվարկում Գյումրիի փողոցաշինական ծրագիրն է, ինչպես նաև Հյուսիս-հարավի Տրանշ 3-ը: Հավելյալ 3 ճանապարհահատվածի հիմնանորոգման հարցը քննարկվում է ըստ ֆինանսական միջոցների առկայության: Այդ ցանկում նաև Գյումրի-Արմավիր ճանապարհահատվածն է:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։