Շիրակի մարզի հազարավոր հեկտար գյուղատնտեսական մշակաբույսեր երաշտի և ոռոոգման ջրի պակասի պատճառով վնասներ են կրում

Հանրապետությունում առանց տեղումների եղանակը շարունակվում է հունիսի սկզբից։ Երկարատև տեղումների բացակայությունը, օդի բարձր ջերմային ֆոնը, որն ուղեկցվում է ուժեղ քամիներով, լուրջ վնասներ է հասցնում գյուղատնտեսությանը։ Հանրապետությունում երաշտային պայմաններ են, իսկ խնդիրն ավելի լուրջ է Շիրակի մարզում։

Ճաքած ու չորացած հողում բանջարանաբոստանային կուլտուրաները բայանդուրցիների տնամերձներում նորմալ վեգետացիա չտեսած չորացել են։ Լոլիկի, վարունգի, լոբու ու կարտոֆիլի բերքը չի հասցրել աճել: Շիրակի մարզի ցածրադիր գոտիների մի քանի համայնքներ միշտ են բողոքել ոռոգման ջրի պակասից, բայց այս երկու շաբաթների չոր ու ցամաք եղանակային պայմանները բերքն ավելի են վնասել։

Մինչև 35 աստիճան տաքության և ամեն օր  ուժեղ քամիների պայմաններում բույսին անսպառ ջուրը կփրկեր: Բայց այս ցանքատարածքների և տնամերձների բերքն անգամ առաջին ջուր չի ստացել: Բայանդուրի հողերը ոռոգում ստանում են Ախուրյանի ջրամբարից, մի քանի օր է ոռոգման ջուր են կուտակել է, բայց գյուղի պոմպակայանից տնտեսություններին ջուրը չի հասնում։

Պոմպակայանից մեկ պոմպամղիչով է ջուրն հասնում գյուղացիական 168 տնտեսությունների: Համայնքի ղեկավարի խոսքով երկու տարի առաջ գյուղի պոմպակայանում երկու պոմպ են ունեցել, հիմա մեկի հույսին են մնացել, մեկը թալանել են։ Հակառակի նման էլ այս տարի գյուղում կարտոֆիլի ցանքերն են ավելացրել։

Գյուղապետը ևս մեկ՝ նոր պոմպամղիչ տեղադրելու խնդրով դիմել է ջրային կոմիտեի նախագահին: Թե ինչ լուծում է տրվելու, առայժմ գյուղովի սպասում են պատասխանի: Հացահատիկային մշակաբույսերի դաշտերն ավելի վատ վիճակում են։ Ցորենի, գարու, վարսակի ցանքատարածքներն հեկտարներով արևից վնասվել են, հատիկը մնացել է նվազ, իսկ հասկերը չորացել են։

15 հազար հեկտար աշնանացան ցորեն, 21 հազար հեկտար գարնանացան է մշակվել Շիրակի մարզում։ Եվ այժմ ընդհանուր բերքի 1800 հեկտարը վտանգված է մարզում, SHANTNEWS.am-ի հետ զրույցում ասել է Շիրակի մարզպետարանի գյուղվարչության բաժնի պետ Անդրանիկ Նալբանդյանը։ Այս օրերին գյուղվարչության մասնագետները ուսումնասիրություններ են կատարել, որի արդյունքներով գնահատելու են երաշտի հասցրած վնասի չափը։

Երաշտի վնասների վերաբերյալ առայժմ գյուղացին է իր անձնական հաշվարկներն անում։ Մեկ հեկտար հողը մշակելու, ցանելու համար ծախսել է մոտ 150-180 հազար դրամ, բայց վերջնարդյունքում գյուղացուն իր հողը բերքով չի փոխհատուցում։ Մարզի ջրամբարներում ջրի պաշարներն էլ անհամեմատ քիչ են ստեղծված եղանակային պայմանների պատճառով։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։