Բնակապահովման պետական ծրագրով Մայիսյան գյուղում առաջին առանձնատունն է հանձնվել շահագործման

Շիրակի մարզի Մայիսյան գյուղում այսօր բնակարանամուտ է նշել 30 տարի տնակում ապրած Տերտերյանների ընտանիքը։ 2 տարի առաջ Շիրակի մարզում գյուղական բնակավայրերում անօթևանության հարցի լուծման երկու տարբերակ ներդրվեց՝ բնակարանաշինություն և բնակարանային գնման վկայագրերի տրամադրում։ Վերջինի դեպքում ծրագիրն առայժմ չի գործում, իսկ բնակարանների կառուցման բաղադրիչը  ընթացքի մեջ է։ Շիրակի մարզի 7 գյուղերի  անօթևան 25 ընտանիքների համար տներ են կառուցվում։

Կառավարության այս ծրագիրն իրականացվում է «Ֆուլեր» տնաշինական կենտրոն բարեգործական հասարակական կազմակերպության հետ, որը պետության տրամադրած ֆինանսական միջոցներով լիազորված է կազմակերպել տների կառուցման աշխատանքները։ Բայց այսքանով մարզում անօթևանության խնդիրը վերջնական չի լուծվում։ Դեռ կան ընտանիքներ, որոնք տարբեր պատճառներով դեռ տնակներում են ապրում։ Շիրակի մարզպետ Հովհաննես Հարությունյանը խոսել է մարզում անօթևանության խնդրի լուծման հնարավոր  ծրագրերի իրականացման մասին։

  «Կարծում եմ, որ համայնքների հետ համագործակցության  արդյունքում, եթե վերցնենք Գյումրի համայնքը, սոցիալական բնակարանների միջոցով կամ այլ ծրագրերի միջոցով, որոշ ժամանակ հետո պետք է լուծված լինեն խնդիրները։ Քննարկվում է այդպիսի ծրագիր, մենք կապիտալիստական երկրում ենք ապրում, և սոցիալիստական երկրում է, որ պետությունը ունի պարտավորություն մարդկանց բնակարաններով ապահովելու, բայց այսօր այդ խնդիրը ուշադրության կենտրոնում է»,- SHNATNEWS.am-ի հարցին պատասխանել է Շիրակի մարզպետը։

Նշենք , որ Շիրակի մարզում բնակապահովման միակ ծրագիրը գյուղական բնակավայրերում իրականացվող բնակարանաշինությունն է, որն անցած տարի է մեկնարկել: Մարզի 7 գյուղերի 25 շահառուներն այն անօթևան ընտանիքներն են, որոնք հրաժարվել էին բնակարանի գնման վկայագրերից:

Ընտրված բնակարանաշինության տարբերակն այնպիսին է, որ տանտերն ինքն է գտնում շինարարին կամ շինաշխատանքներն ինքնուրույն է կատարում, իսկ շինանյութի և աշխատավարձի գումարը փոխհատուցում է կառավարությունը:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։