Փոփոխությունները Սերժ Սարգսյանի վարչապետ դառնալու համար չեն արվում. Արդարադատության նախարար

Իշխանական համակարգում տեղի ունեցող փոփոխությունների թեմայով՝  «Շանթ» հեռուստաընկերության «Հեռանկար» ծրագրի տաղավարում Արամ Աբրահամյանը զրուցել է ՀՀ արդարադատության նախարար Դավիթ Հարությունյանի հետ: Հարց է հնչել այն մասին, թե արդյո՞ք  անհրաժեշտ էր հիմա  կատարել  այն փոփոխությունները, որոնց ականատեսն ենք լինում այս օրերին.

«Աշխատանքները սկսել ենք շատ վաղուց՝ Սահմանադրությունը ընդունելուց հետո և մի շարք սահմանադրական օրենքներ վաղուց արդեն ընդունված են: ԱԺ ընտրությունները  տեղի են ունեցել սահմանադրական օրենքի հիման վրա, մի շարք սահմանադրական օրենքներ՝ Կուսակցությունների մասին, Մարդու իրավունքների պաշտպանի մասին,  ևս ընդունվել են նախկինում: Այսինքն աշխատանքը պլանավորված էր, քայլերի հաջորդականությունը ևս՝ շատ հստակ սահմանված», – ասել է Դավիթ Հարությունյանը:

Զրույցի ժամանակ Արամ Աբրահմյանը կրկին ցանկացել է հստակեցնել, ուստի հարցրել է՝ իշխանական համակարգի փոփոխությունները հիմա՝ ապրիլից  մեկ կամ երկու ամիս առա՞ջ պետք է արվերին.

«Այո, ոչինչ չէր խանգարում, որովհետև կան օրենքներ, որոնք պետք է գործեին ավելի վաղ՝ Ընտրական օրենսգիրքն է, իսկ Դատական օրենսգիրքը մասամբ պետք է  ուժի մեջ մտնի մինչև ապրիլի 9-ը, իսկ օրենքների հիմնական մասը, որոնք պետք է ապրիլի 9-ից ուժի մեջ մտնեն, կարող են արվել հենց հիմա» , – պարզաբանել է Հարությունյանը

Արամ Աբրահամյանը ուշադրություն է հրավիրել այն հանգամանքի վրա, որ այս օրերին՝ հատկապես սոցիալական ցանցերում, խոսվում է այն մասին, թե այս ամենն արվում է, որպեսզի  ապրիլին վարչապետ դառնա Սերժ Սարգսյանը

«Կարծում եմ շատ թյուր մոտեցում է: Լսել եմ նման կարծիք, որ Սահմանադրություն փոխվեց, որպեսզի Սերժ Սարգսյանը դառնա վարչապետ, սակայն կարծում եմ սթափ գնահատելու դեպքում պարզ կդառնար, որ եթե նպատակը այն էր, որ Սերժ Սարգսյանը շարունակի պաշտոնավարել որպես նախագահ, ապա բազում այլ մոդելներ կային՝ չփոխելով Սահմանադրությունը »,- ասել է Հարությունյանը՝ բերելով ՌԴ օրինակը, երբ նախագահ Պուտինը և վարչապետ Մեդվեդևը փոխվեցին տեղերով, իսկ հետո Պուտինը նորից նախագահ դարձավ:

ՀՀ արդարադատության նախարարը հարկ է համարել ընդգծել, թե որն է Սահմանադրությամբ ամրագրվող կառավարման մոդելի առանձնահատկությունը.

«Նախագահական կամ կիսանախագահական երկներում նախագահներն ընտրվում են 5 տարի ժամկետով, ինչպես օրինակ  մեզանում, և 5 տարի նրանք հաշվետու չեն որևե մեկին: Վարչապետը խորհրդարանական մոդելում միշտ հաշվետու է խորհրդարանին և միշտ փոփոխելի է: Նա չի ընտրվում, նա չի ընտրվում որոշակի ժամկետով»,- հավելել է Հարությունյանը, նաև ասելով, որ սա ամենակարևոր փոփոխությունն է՝ հաշվետվողականությունը խորհրդարանի առջև: