Շիրակի մարզում բերքահավաքը ժամանակին կազմակերպելու համար կոմբայնները չեն բավականացնում

Շիրակի մարզում կոմբայնները չեն բավականացնում հացահատիկի բերքահավաքը ժամանակին կատարելու համար: Այս տարի երաշտի ու ոռոգման ջրի պակասի պատճառով հացահատիկի բերքը խիստ նվազ է, եղածն էլ ժամանակին չեն կարողանում հավաքել: Օրինակը Մարմաշեն խոշորացված համայնքի Հովունի գյուղում է: Բերքը հասել է, կոմբայն չկա հացքաղ կատարելու: Գյուղի միակ կոմբայնը սեփականատերը վաճառել է և այս տարի տեխնիկա չունեն: Հարևան գյուղերի կոմբայններն էլ Հովունիի դաշտերը իրենցինից հետո են հերթի դրել: Կոմբայնավարների մոտ չգրված օրենք կա՝ մինչև իրենց գյուղում բերքահավաքը չվերջացնեն, հարևան գյուղեր չեն գնում:

Ըստ այդմ էլ Մայիսյանի կոմբայնները հարևան Հովունիի սահմանը չեն հատում, իրենց տարածքում են բերքահավաք կատարում: Իսկ Հովունիում գոնե մեկ կոմբայն էլ չունեն, ստիպված սպասում են մինչև հարևանները բերքահավաքն ավարտեն:

200 հեկտար հացահատիկ են գյուղում մշակել: Երբ հարևան գյուղերում դեռ բերքը հասած չէր, Հովունիում հասցրել են դաշտերի միայն շատ փոքր մասում բերքահավաք կատարել: Հետո, երբ կոմբայնավարները տեղափոխվել են իրենց գյուղերի բերքահավաքի, Հովունիում գործը կիսատ է մնացել:

Անցած տարի Հովունիում կոմբայնի խնդիր չեն ունեցել: Գյուղում երկու միավոր տեխնիկա է եղել: Մեկն այս տարի արդեն անսարք է, մյուսը սեփականատերը վաճառել է ու գյուղովի հայտնվել են փաստի առաջ: Խոշորացված համայնքն էլ համայնքապատկան կոմբայն չունի: Հույսը մասնավոր կոմբայնավարների հետ ծանոթ-բարեկամական պայմանավորվածությունն է մնացել:

«Գյուղի ցանքերի 20 %-ում է բերքահավաքը կատարված: 80 %-ը դեռ տեղում է: Ուղղակի ծանոթության միջոցով դիմում ենք կոմբայնավարներին: Նրանք էլ փորձում են օգնել, որ որոշ չափով մեր խնդիրը լուծվի: Մեր համայնքում գոնե 3 սարքին կոմբայն պետք է լինի, որ հացահատիկը ժամանակին հավաքվի:Ինչքան տեղեկացված եմ ընդամենը մեկ կոմբայն է աշխատում մեր դաշտերում»,- SHANTNEWS-ին ասել է Հովունի գյուղի վարչական ղեկավար Լևիկ Խաչատրյանը:

Հացահատիկի բերքը շատ նվազ է: Գյուղացիներն են նշում, որ մոտ 10 անգամ պակաս է: Մեկ հեկտարից մոտ 3 տոննա պետք է բերք ստանային, բայց հավաքածն ընդամենը 300 կգ է: Հիմա կոմբայնների պակասի պատճառով եղած բերքը դաշտերում թափվում է:

Չոր հասկերից հատիկները քամու հետևանքով թափվում են, իսկ եթե կարկուտ եղավ ընդհանրապես ոչինչ չեն տանի տուն: Կորուստներով են աշխատում նաև մարզում ունեցած բոլոր կոմբայնները:  Շիրակի մարզում հին ու կորուստներով աշխատող կոմբայնները միշտ դաշտում են, այսպես ասենք, հերթափոխով: Սկսում են Անիի տարածաշրջանից, որտեղ հացահատիկի բերքն առաջինն է հասնում, ամենամեծ հողատարածքները Ախուրյանի տարածաշրջանում են, որտեղ տեխնիկան չի բավականացնում: Իսկ ամենավերջում հացահատիկը հասունանում է Ամասիայի և Աշոցքի տարածաշջաններում: Այստեղ արդեն բերքահավաքին տեխնիկայի խնդիր չի առաջանում:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։