Շիրակի մարզում սուբսիդավորված սերմացուով մշակված դաշտերում գարու բերք չի ստացվել

Շիրակի մարզի այն գյուղացիական տնտեսությունները, որոնք գարի են մշակել սերմացուի տրամադրման պետական ծրագրով, բերք չեն ստացել: Արթիկի տարածաշրջանի Գետափ, Գեղանիստ և Վարդաքար գյուղերում գարու դաշտերում բերքահավաք կազմակերպելն անգամ անիմաստ է: Սերմացուն շատ դեպքերում ընդհանրապես չի ծլել կամ էլ առանց հասունանալու չորացել է: Տարին երաշտային է, հողերն էլ՝ անջրդի, բայց գյուղացիները վստահ են, որ խնդիրը ոչ այնքան եղանակային պայմաններն են, որքան սերմացուն, որը փաստացի Շիրակի մարզի պայմաններում արդյունք չի ապահովել: Գարու սերմացուն գյուղացիներին պետական սուբսիդավորմամբ տրամադրվել է գարնանը:

Արթիկի տարածաշրջանի գյուղերում օգոստոսի 10-ը հացահատիկի բերքահավաքի վերջնաժամկետն է: Մարտի վերջին, ապրիլի սկզբին գարի են ցանում, հուլիսի վերջին ու օգոստոսի սկզբին քաղում: Նույն այս ժամանակացույցով սերմարտադրության պետական ծրագրով գարի են ցանել, մշակել, իսկ հիմա, երբ եկել է բերքահավաքի ժամանակը, դաշտը դատարկ է, բառի բուն իմաստով:

Արթիկի տարածաշրջանի Գետափ գյուղում սուբսիդավորված գնով գարու սերմացու է գնել 8 տնտեսություն, ցանել են 25 հեկտար: Բոլորի մոտ նույն արդյունքն է, ավելի ճիշտ՝ արդյունք չկա: Գյուղացիները համեմատության համար հարևանությամբ մշակած մյուս ցանքերն են ցույց տալիս, որտեղ տեղական՝ իրենց ունեցած գարու սերմացուն են ցանել: Նույն երաշտային պայմաններում ու անջրդի հողերի վրա տեղական սերմացուն հեկտարից 5-10 ցենտներ բերք է ապահովել:

Գետափի գյուղապետն ահազանգել է մարզպետարան ու էկոնոմիկայի նախարարություն: Պարզվել է, որ գարու այն սերմացուն, որը հատկացվել է սուբսիդավորված գնով, վեգետացիոն շատ ավելի երկար ժամանակահատված ունի:

«Լիցենզավորված սերմացու է: Նախարարության լիցենզիաներն անցած է, լաբորատոր փորձաքննություն անցած սերմացու է: Նախարարությունից ճշտել ենք, ասել են՝ վեգետացիան 180 օր է: 180 օրն էլ մեր պայմաններում երկար է, չի հասցնի վեգետացիան: Մեզ մոտ 4-5 ամիս է գարու վեգետացիան: 180 օրը շատ է, չի հասնի և չի քաղվի: Ի սկզբանե մեզ այս օրերի մասին ոչինչ չի ասվել: Սերմացուի անունը, լիցենզավորման թղթերը ցույց են տվել, պայմանագրերը կա կնքված, բայց վեգետացիոն երկար օրերի մասին ոչինչ չի ասվել: Եթե իմանային՝  սերմացուն չէին գնի, չէին ցանի»,- SHANTNEWS-ին ասել է Գետափի գյուղապետ Շիրակ Խաչատրյանը:

Այսինքն՝ ըստ էկոնոմիկայի նախարարության պատասխանի, տվյալ սերմացուն հասունանում է 6 ամսվա ընթացքում: Նույն այս հաշվարկով, եթե այն ցանում են Շիրակի մարզում, մինչև հասունանալը տարածաշրջանում աշնան վերջ կամ ձմեռ է լինում, կարճ ասած՝ սերմացուն կոնկրետ Շիրակի մարզի պայմաններին  հարմար չէ: Գյուղացիները սուբսիդավորված գնով կանխիկ վճարել են ու սերմացուն գնել, իսկ վեգետացիոն երկար ժամանակահատվածի մասին գյուղացիներին նախապես տեղյակ չի պահվել:

Գարու ցանքերում բերքահավաք ընդհանրապես չեն կազմակերպելու, գյուղացիներն են ասում՝ իմաստ չունի: Անգամ որպես անասնակեր դաշտից ոչինչ տուն տանել չեն կարողանա: Ըստ գյուղապետի՝ էկոնոմիկայի նախարարությունից խոստացել են հանձնաժողով կազմել և ուսումնասիրություններ կատարել իրենց գարու ցանքերում: Նույն պետական ծրագրով անցած աշնանը նաև ցորենի սերմացու են գնել, ցանել են, արդյունքից էլ դժգոհ չեն:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։