Պատվաստվել, թե 14-օրյա պարբերականությամբ թեստ հանձնել. ՀՀ առողջապահության նախարարությունում նոր նախագիծ է դրվել շրջանառության

Շիրակի մարզում ապրիլ ամսից մինչ օրս կորոնավիրուսի դեմ պատվաստվել է 12 հազար մարդ: Պատվաստման ցուցանիշները և մարզում կորոնավիրուսի տարածման տեմպերն են այսօր ներկայացրել մասնագետները: Հիվանդացության քիչ տեմպերով, այնուամենայնիվ, աճ գրանցվում է: Ըստ մասնագետների կանխատեսումների՝ աշնան կեսին Հանրապետությունում սպասվում է կորոնավիրուսի 4-րդ ալիքը, որը նախորդներից առանձնանում է սրանով, որ շրջանառվում են վիրուսի նոր, ավելի վարակիչ  շտամներ:

Առողջապահության նախարարությունը շրջանառության մեջ է դրել նոր նախագիծ, որն ըստ էության, պատվաստումների ցուցանիշը էականորեն բարձրացնելու գործիք է դառնալու: Առողջապահության նախարարությունը բնակչության աշխատող մասին երկու տարբերակ է առաջարկում՝ պատվաստվել կամ երկու շաբաթը մեկ թեստավորման բացասական արդյունքը փաստող տեղեկանք ներկայացնել:

«Այսօր արդեն շրջանառության մեջ է դրվել նախագիծ: Նախարարի հրամանն է  սանիտարահամաճարակաբանական նորմատիվների վերաբերյալ, որոնց մեջ փոփոխություն է տեղի ունեցել: Մարզպետարանում քննարկել ենք նախագիծը, համաձայն որի՝ մարդիկ, որոնք չեն ընտրում պատվաստման ճանապարհը 14-օրյա պարբերականությամբ, գործատուին պետք է ներկայացնեն բացասական ՊՇՌ պատասխան, իսկ պատվաստվածներն արդեն գործատուին պետք է ներկայացնեն տեղեկանք պատվաստման վերաբերյալ: Նախագիծ է քննարկվում, կարծիքները հաշվի կառնենք, կներկայացնենք նախարարություն և ամենայն հավանականությամբ՝ արդեն գործընթացը կմեկնարկի»,- նշել է  Շիրակի մարզպետարանի առողջապահության բաժնի պետ Լեյլի Ասլանյանը:

Նույնը վերաբերում է նաև ուսուցիչներին: Նոր ուսումնական տարում նրանց կթույլատրվի դասարան մտնել, եթե պատվաստված են կամ 14-օրյա պարբերականությամբ թեստավորում են անցնում: Հիմա պատվաստվելու ցանկություն ունեցողները շատ են, բայց պատվաստանյութն է պոլիկլինիկաներում սահմանափակ: Հանրապետությունում արդեն երկու անուն պատվաստանյութ կա, որոնց նոր խմբաքանակներին են սպասում:

Կորոնավիրուսով հիվանդացության տեմպերը մարզում բարձր չեն, բայց բարձրանալու միտում ունեն:  Պոլիկլինիկաներում հսկողության տակ է գտնվում կորոնավիրուսով 81 հիվանդ, իսկ տրիաժ բաժանմունքներում գտնվում է 7 հիվանդ: Մասնագետները կանխատեսում են՝ Covid-ի 4-րդ ալիքն է մոտենում:

«Եթե նայում ենք թվերին, ոնց որ փոքր աճ է գնում: Այնպես որ, վիճակագրական տվյալներից ելնելով՝ մտածում ենք, որ կարող է աշնան առաջին կեսին նորից պարտադրված լինենք կորոնավիրուսային հիվանդանոցներ ունենալ: Սպասվում է 4-րդ ալիքը աշնան առաջին կեսին»,- նշել է Գյումրիի ինֆեկցիոն հիվանդանոցի բժիշկ-վարակաբան Կարինե Տոնոյանը:

Քանի դեռ կորոնավիրուսով հիվանդների թիվը մեծ չէ, Գյումրիում համապատասխան բաժանմունքները փակ են: Բայց աշնան կեսին էլի բժիշկների կանխատեսումներով, COVID բաժանմունքները կվերաբացվեն: Հիմա միայն տրիաժ բաժանմունքներն են գործում, իսկ հոսպիտալացման ենթակա հիվանդներին ուղղորդում են Երևանի բուժհաստատություններ:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։