«Գրաունդ Արտ Ֆեստ» կամ տեղանքային արվեստի գործերի ստեղծում․ Գյումրիում  մշակութային միջազգային եռօրյա փառատոն է անցկացվելու

Ոչ թե Կումայրի պատմական միջուկն ու թանգարանները, այլ  քաղաքի այն հատվածները, որոնք ոչ պակաս մշակութային, պատմական ու տուրիստական այցեքարտ են համարվում, կհայտնվեն  ուշադրության կենտրոնում։ Սա «Գուրբան» հիմնադրամի տեղանքային արվեստի գործերի ստեղծում փառատոնն անցկացնելու գլխավոր պայմանն է եղել։  Որտեղ և ինչ միջավայրում են լինելու մշակութային միջոցառումները՝ փառատոնի կազմակերպիչները հանդես են եկել մամուլի ասուլիսով ու մանրամասներ ներկայացրել։

Օրինակ՝ Գյումրիի երկաթուղու կայարանամերձ հրապարակն ու հարակից տարածքը բացօթյա փառատոնի հարթակներից մեկն է լինելու։

Փառատոնի մասնակիցները գերմանաբնակ արվեստագետներն են նաև, նրանց մի մասն արդեն Գյումրիում է։ Լյուդմիլա Կիրասնովան Գերմանիայի Մյունխեն քաղաքից է եկել։ Սա նրա երրորդ այցելությունն է Գյումրի։ Քիչ թե շատ հասցրել է ծանոթանալ  մշակութային միջավայրին  ու քաղաքի պատմական շինություններին։ Այս փառատոնին քաղաքի որ հատվածում է իր գործերը ներկայացնելու, ընտրությունն իրենն է եղել։

«Վայրն ընտրել եմ ձեր քաղաքային շուկան։ Շուկան կենդանի տարածք է, որտեղ քաղաքացիների տարբեր շերտերի ես հանդիպում, տարբեր մտածողության։ Իսկ արվեստաբանին հենց կենդանությունն է պետք, որ ձեռք տա, շոշափի ու կարողանաս այդ ամենը վրձնել, սա նաև, կարծում եմ՝ ձեր արվեստաբաններին հետաքրքիր կլինի։ Մարդկանց հետ աշխատանքը դա մի  կյանք է, որտեղ արվեստաբանը թաքնված շատ գծեր կբացահայտի»,- ընդգծել է Լյուդմիլա Կիրասնովան։

Մյունխենից են նաև երաժիշտներ Մարկետան ու Լեան։ Գյումրիի փողոցներում երաժշտության հետաքրքիր հնչյուններ կլսենք եռօրյա փառատոնին, շվեյցարական նվագարանով՝ հենդ փենդով, որը թարգմանաբար  նշանակում է ձեռքի կաթսա։ Երաժիշտներն արդեն հասցրել են ծանոթանալ նաև հայկական մշակույթին ու երաժշտարվեստին։

«Երկու շաբաթ է, որ Գյումրիում ենք, ծանոթացել ենք հայ երաժիշտների հետ, լսել ենք հայկական ազգային երաժշտությունը, ու այս օրերին կփորձենք պարապել մեր գործիքով այն ներկայացնել, կարծում ենք՝ հետաքրքիր կլինի։ Երկու տարբեր մշակույթների  ներդաշնակություն ենք ստեղծելու, որը մեզ համար առաջին փորձն է լինելու»,- ասել է Լեա Լիմբոունեն։

Գյումրիի «Մայր Հայաստան» հուշահամալիրի տարածքը ևս փառատոնային հարթակ է լինելու հայ և օտարազգի պարարվեստի ներկայացուցիչների համար։ Փառատոնը մեկնարկելու է օգոստոսի 6-ին և կշարունակվի մինչև օգոստոսի 8-ը։ Մշակութային միջազգային փառատոնն իր շուրջ կհամախմբի ավելի քան 24 արվեստագետների տարբեր երկրներից։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։