Հիմնանորոգվում են Արեգնադեմ-Ամասիա և Ամասիա-Ցողամարգ ճանապարհները

Հիմնանորոգման աշխատանքներ են մեկնարկել Գյումրի-Կապս -Ամասիա և Ամասիա-Ցողամարգ մարզային նշանակության ճանապարհահատվածներին:  Հիմնանորոգման արդյունքում Գյումրիից Ամասիա և Ամասիայից Աշոցք 10 կմ ճանապարհ կդառնա բարեկարգ: Առայժմ շինաշխատանքները խճապատմանը կամ ասֆալտապատմանը չեն հասել: Ամասիայի տարածքում դեռ գործող  ճանապարհի ամրացման աշխատանքներ են կատարվում: Առանձին տեղամասերում բնական աղբյուրների ու կոյուղաջրերի անկառավարելի հոսքի պատճառով  քարաթափումների վտանգ կա:

Ամասիայի ձոր կոչվող տեղամասի ներքևում գետն է ու ձորը, վերևում ժայռերը, որոնց միջից ջուր է հոսում: Տարածքի անասնագոմերի կոյուղաջրերը ևս  ժայռաքարերի միջով են հոսում, որոնք թուլացնելով՝ քարաթափումների պատճառ են դարձել:

«Ժայռաթափումներ մեր տարածքում հաճախ են լինում, մանավանդ այս հատվածում: Անձրևների, ձյան, ձնաբքի հետևանքով փլուզումներ են: Քարափումներ են և, բնականաբար, փլուզման է ենթարկվում: Իսկ այս հատվածով դեպի Գյումրի երթևեկությունն ավելի շատ է, քան Կապս-Ամասիա ճանապարհով»,- SHANTNEWS-ին ասել է Ամասիա համայնքի ղեկավարի տեղակալ Արտավազդ Ղուկասյանը:

Մինչ բուն ճանապարհաշինությունը, ճանապարհի այն հատվածներում, որտեղ քարաթափման վտանգ կա ամրացման աշխատանքներ են կատարում: Իսկ տեխնոլոգիան գաբիոններն են: Այս տեխնոլոգիան օգտագործվում է ավելի քան 100 տարի ճանապարհի բարձրադիր կետերի, հողի լանջերի, ինժեներական կառույցների, գետափների, լճակների ամրապնդման և պաշտպանության համար: Մետաղական ցանցեր են գործում, դրանք լցնում խճաքարերով ու տեղադրում ճանապարհի ծածկույթի տակ: Գաբիոնները տեղամասին հարթություն և ամրություն են տալիս:

«Կատարվում է պատի ամրացում: Հենապատ ենք դնում, ցանցերով քարերի կույտով ամրացնում ենք պատը: Ժայռային հատված է , ճանապարհը նեղացել է, հնարավոր է փլուզումներ լինեն: Դրա համար էլ ամրացում է կատարվում»,-SHANTNEWS-ին ասել է «Մերձմոսկովյան» ԲԲԸ աշխղեկ Լեռնիկ Մկրտչյանը:

Պայթեցումները ևս մեկ ու լրացուցիչ աշխատանք է, որ կատարվելու է ճանապարհաշինությունը սկսելուց առաջ: Նույն այս հատվածում քարաթափումների պատճառով ճանապարհը նեղացել է: Ամասիան Աշոցքին կապող ամենակարճ ճանապարհն է: Ամասիայից Ցողամարգ հիմնանորոգվելու է 7 կմ 940 մետր հատված:

Մոտ 2 կմ էլ Գյումրի-Կապս-Ամասիա ճանապարհի Արեգնադեմ-Ամասիա հատվածն է վերանորոգվելու: 2 տարի առաջ Կապսից մինչև Ջրաձոր 6 կմ հիմնանորոգվեց, իսկ շարունակությունը՝ Արեգնադեմ-Ամասիան, ծրագրից դուրս էր մնացել: Ընդհանուր հաշվարկով մոտ 10 կմ ճանապարհ է նորոգվում:

Այս ճանապարհահատվածին ջրահեռացման համակարգի կառուցումն անհրաժեշտություն է, այլապես ժայռից հոսող ջրերը նոր ասֆալտաշերտը կքայքայեն: Այժմ ընդամենը հողե հունով առուներ են:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։