Գյումրիում հաշմանդամները կարող են աշխատանք գտնել ՏՏ ոլորտում

Հաշմանդամություն ունեցող անձինք կարող են աշխատանք գտնել տեղեկատվական տեխնոլոգիաների ոլորտում: Սրան է ուղղված ծրագիրը, որն իրականացնում են հասարակական սեկտորը և տեղեկատվական տեխնոլոգիաների ընկերությունները: Ծրագիրը մեկնարկել է Գյումրիից:

Գյումրիի տեխնոլոգիական կենտրոնի դահլիճում հեթական հանդիպման մասնակիցները հաշմանդամություն ունեցող անձինք են: Ըստ վիճակագրության հաշմանդամություն ունեցողների 98 տոկոսը գործազուրկ է: Գործատուի պահանջներն ու նրանց հնարավորությունները շատ հաճախ չեն համապատասխանում, ինչի հետևանքով հաշմանդամություն ունեցողն անգործ է մնում, աշխատատեղերն էլ թափուր: Տեղեկատվական տեխնոլոգիաներն այն ոլորտն են, որտեղ աշխատուժի կարիք միշտ կա ու այդ պահանջարկն աճում է:

«ՏՏ ոլորտում պահանջարկը միշտ կա ու չի նվազում, այլ շատանում է: Կոնկրետ կոմպոնենտներ կան, որոնք օգտագործվում են արհեստական բանականության և մեքենայական ուսուցման մեջ: Այստեղ շուկան բաց է։ Սա շատ լավ հնարավորություն է սկսնակների համար, որ հեշտությամբ հայտնվեն ՏՏ ոլորտում»,- SHANTNEWS-ին ասել է ԳՏԿ ծրագրի ղեկավար Բելլա Հարությունյանը:

Հաշմանդամություն ունեցող անձանց առաջարկում են տվյալների տեսակավորում կատարել: Այն իրենից բարդ աշխատանք չի ներկայացնում, բարձրագույն կրթություն կամ լեզուների իմացություն էլ չի պահանջում: Տվյալների տեսակավորումը արհեստական բանականություն ստեղծելու հիմքն է հանդիսանում:

Տվյալների տեսակավորում հայաստանյան ՏՏ ընկերություններն այժմ պատվիրում են Հնդկաստանին և Չինաստանին, մինչդեռ այստեղ ասում են՝ ներուժ կա: Աշխատանքը հաշմանդամություն ունեցողներին հարմար է նաև սրանով, որ գործը կարելի է տնից կատարել ու ֆիզիկական ծանրաբեռնվածություն չի պահանջում: Տվյալների տեսակավորման պատվերներ ՏՏ ընկերություններից արդեն կան:

«Ծրագիրը սոցիալական է, բայց բարեգործական չէ: Մենք երիտասարդներին պարզապես գումար չենք տալիս, այլ վարձատրում ենք նրանց կատարված աշխատանքի դիմաց: Կարծում ենք, որ միայն աշխատանքի դիմաց գումար վաստակելով է, որ պետք է տնտեսությունը զարգանա: Իսկ ՏՏ ընկերություններից աջակցություն չենք խնդրում, այլ առաջարկում ենք իրենց աշխատանքը վստահեն մեզ, իսկ մենք այն կկատարենք որակով և հարմար գնով»,- SHANTNEWS-ին ասել է «ՍԸՐՔԼ» հկ համահիմնադիր Լիանա Դավոյանը:

17 երիտասարդներ Շիրակի մարզից նախ դասընթացների կմասնակցեն, հետո նրանցից լավագույն 10-ը կանցնեն աշխատանքի ու կվարձատրվեն: Ծրագիրը մեկնարկել է Գյումրիից, բայց ընդլայնելու է աշխարհագրությունը: Նախատեսում են ընդգրկել հաշմանդամություն ունեցող երիտասարդների տարբեր մարզերից:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։