Շիրակի մարզի 8 գյուղերում ջրամատակարարման ցանցը հիմնանորոգվում է

Շիրակի մարզի 8 գյուղերում ջրամատակարարման ցանցի հիմնանորոգման աշխատանքներ են կատարվում: Սա KFW գերմանական բանկի ֆինանսավորմամբ իրականացնող ջրամատակարարման ծրագրի մաս է կազմում: Գյուղերում ներքին ցանցը մի քանի տասնամյակների հնության է:  Պարբերաբար վթարներ են ու ջրակորուստներ, ինչի հետևանքով գյուղերում խմելու ջուր բոլորին չի հասնում: Օրինակը Հայկավան գյուղում է, որտեղ 9 կմ-ից ավելի ջրամատակարարման ցանց է հիմնանորոգվում:

Հայկավան գյուղում խրամուղիներ են փորվում նոր պոլիէթիլենային խողովակներ անցկացնելու համար: Փորում են ու դուրս են բերում գյուղի հին խողովակաշարը, որով խմելու ջուր է մատակարարվել: Խողովակների վիճակից պարզ է դառնում, թե ինչու Հայկավանում խմելու ջուրը չի բավականացրել:

Պարբերաբար տեղի ունեցող վթարների հետևանքը ջրակորուստներն են: Խնդիրը հատկապես սրվում է ամռան ամիսներին, երբ առանց այդ էլ չբավականացնող խմելու ջուրը գյուղացիները սկսում են օգտագործել տնամերձները ոռոգելու համար:

Մաշված ցանցն ու ջրակորուստները հաշվի առնելով է, որ Հայկավանի ներքին ցանցն ընդգրկվել է ջրամատակարարման համակարգերի բարելավման ծրագրում:  Ընդհանուր հաշվարկով, Շիրակի մարզի միայն գյուղական համայնքներում 2,8 մլն եվրո է ծրագրի արժեքը: Իսկ ծավալներն ամեն գյուղում տարբեր են:

«Տարբեր գյուղերում աշխատանքի ծավալները տարբեր են: Համեմատության համար ասեմ, որ, օրինակ, Հայկավանում 9800 մետր ցանց է նորոգվում, Գետք գյուղում՝ 2000 մ: Ընդհանուր ծրագրի  արժողությունը գյուղերի մասով 2,8 մլն եվրո է: Գյուղերում մետաղական սովորական խողովակներ են, որոնք տարիների ընթացքում գրունտային ջրերի, խմելու ջրի քլորի բնական ազդեցությունների տակ քայքայվել, մաշվել է: Բազմաթիվ վնասվածքներ կան, էլ չեմ ասում, որ գյուղերում ծանր մեքենաների տակ անընդհատ վնասվել ու վերականգնվել են խողովակները»,- SHANTNEWS-ին ասել է «Դորոժնիկ» ՍՊԸ Շիրակի մարզի ջրամատակարարման համակարգի վերականգնման ծրագրի ղեկավար Գագիկ Կարապետյանը:

Հայկավանում շինարարը նախատեսում է գործն ավարտել 2 ամսից, որից հետո ջրամատակարարումն առանց կորուստների ու շուրջօրյա է դառնալու: Փոփոխություններ նաև տնային միացումներում է լինելու՝ ջրաչափերը տներում չեն տեղադրվելու:

Սա նաև ապօրինի միացումներ թույլ չտալու համար է: Ջրաշինարարն է նշում՝ Հայկավանում և բոլոր գյուղերում ու քաղաքներում, որտեղ աշխատել են, ապօրինի միացումներ կան: Իրենց աշխատանքների ժամկետներն ու հերթականությունը պարբերաբար խախտում են: Ջրաշինարարական ու ճանապարհաշինական աշխատանքները զուգահեռ են գնում ու այն տեղամասերում, որտեղ պետք է ասֆալտապատում կատարվի, ջրամատակարարման ցանցի նորացման հերթն առաջ են գցում:

«Ապրիլ ամսից աշխատում ենք ու դեռ, այսպես ասած, հարմարվել ենք մյուսներին: Այս պահին էլ հրահանգ ենք ստացել, որ ասֆալտապատվելու է Գյումրի-Արմավիր ճանապարհի Ղարիբջանյան գյուղի հատվածը: Հիմա ծրագրից դուրս պետք է այնտեղ աշխատանքներ կատարենք: Ոնց ասած՝ շեղվում ենք մեր ծրագրի ընդհանուր տրամաբանությունից»,- ասել է Գագիկ Կարապետյանը:

8 գյուղերից բացի, ջրամատակարարման ցանցի աշխատանքներ են տարվում Գյումրիի 21 տեղամասերում, 23 տեղամասերում էլ կոյուղատար ցանցի վերանորոգումներ են: Ջրաշինարարը պարտավորվել է խրամուղիների հատվածը աշխատանքներից հետո բերել նույն տեսքի, իսկ առանձին հատվածներում խճապատում է կատարելու: Ընդհանուր ծրագրի տևողությունը 2 տարի է, վերջնաժամկետը 2023-ի ապրիլն է: Ծրագրում ընդգրկված գյուղերի ու քաղաքների ցանկը կազմվել է սկսած 2005 թվականից։

  «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։