Գյումրիի քաղաքապետարանն ու բնակիչը վիճարկում են տնամերձ հողակտորի օտարման հարցը

Ինչպես են Գյումրիում հողատարածքները օտարվում, և արդյոք գոյություն ունի տնօրինման վաղեմության ժամկետ ասվածը՝ հողերի համար…

Այս հարցերը վիճահարույց են դարձել քաղաքապետարանի և Թբիլիսյան խճուղի 2/24 տան բնակիչների միջև: Տան կից հողամասը բնակիչը մի քանի տասնամյակ է օգտագործում է՝ առանց հատկացման փաստաթղթերի և հիմա պահանջում է ուղղակի վաճառքով իրեն հանձնել, իսկ քաղաքապետարանն այն աճուրդի է դրել: Բնակիչը տարածքը տնօրինելու և խնամելու փաստերն է ներկայացնում, իսկ քաղաքապետարանը՝ հողերի օտարման կարգը, որոնք իրար հակասում են:

Զաքարյանների տունը 1915-ից հետո է կառուցվել Թբիլիսյան խճուղում: Տունը կառուցել են, տարածքի հողամասն էլ վարել, ցանել, մշակել: Տարիների ընթացքում բանջարանոցը այգու են վերածել: Տունն ու այգին ժառանգաբար փոխանցվել են Զաքարյանների երրորդ սերնդին: Այստեղ հիմա տիկին Գոհարն է ապրում: Տունը տարիներ շարունակ ինքնակամ շինություն է համարվել, օրինականացվել է միայն 2011 թվականին, երբ Զաքարյանները դիմել են տասնամյակներով իրենց տնօրինածը սեփականաշնորհելու համար: Տունը սեփականաշնորհվել է, այգին մնացել է առանց փաստաթղթավորման:

«Տունը սեփականաշնորհվել է, բայց այգին՝ 500 մետր քառակուսի, մնացել է: Դիմել եմ պատկան կառույցներին, որ որպես իմ տնամերձ հողակտոր ուղղակի վաճառքով  գնեմ, բայց  ինձ մերժել են՝ ասելով, որ հողակտորները օտարվում են աճուրդով: Նման ու շատ ավելի մեծ տարածքներ կան նաև հարևան տներում, որոնք սեփականաշնորհված են, իսկ մեզ չեն թույլատրում սեփականաշնորհել: Երևի պատճառը մաքսատունն է, որը հարևանությամբ է գտնվում: Դրա համար էլ այս հողակտորի 1 մետր քառակուսին դարձել է ոսկի: Ասում են՝ պետք է աճուրդի մասնակցեք, բայց ինչպես ես կարող եմ աճուրդով հող գնել, երբ իմ եկամուտն այս ծառերից ստացված բերքն է ապահովում»,- Shantnews-ին ասել է  տան բնակչուհին՝ Գոհար Զաքարյանը:

Այս տարվա ապրիլին է դիմել քաղաքապետարան՝ հողամասն իրեն վաճառելու առաջարկով: Ըստ տանտիրոջ, սկզբում քաղաքապետարանում դեմ չեն եղել իր առաջարկին, բայց հետո քաղաքաշինության բաժնում մտափոխվել են ու աճուրդի ներկայացրել հողամասը: Աճուրդ՝ նշանակում է, որ հողատարածքը գնելու հավակնորդներ, բացի տանտիրոջից, էլի կան: Այս դեպքում հողամասի մեկ քառակուսի մետրի գինը շատ ավելի բարձր կլինի:

Երեք շարքով տնկված ծառերը 500 քառակուսի մետր տարածք են զբաղեցնում: Այն տնամերձի շարունակությունն է, բայց տանը կից չի համարվում: Քաղաքի գլխավոր ճարտարապետը բացատրում է՝ հողակտորն առանձին գույքային միավոր է, որն ուղղակի վաճառքով օտարել չեն կարող, թեկուզ և տանտերը երկար տարիներ տնօրինել է: Կան բացառություններ, որոնց տվյալ հողամասը չի պատկանում:

«Կառավարության որոշմամբ սահմանված են այն դեպքերը, երբ հնարավոր է ուղղակի վաճառքով օտարել հողամասը: Դա այն հողակտորներն  են, որտեղ այլ կառուցապատում հնարավոր չէ, կամ կից են պատուհաններին, կամ խախտվում են սեփականատիրոջ իրավունքները: Այս հողակտորը չի պատկանում նշված ցանկին: Քաղաքապետարանն  օրենքով սահմանված կարգով ներկայացրել է աճուրդի: Աճուրդն արդեն կայացել է, ինչի մասին տանտերը պետք է որ տեղեկացված լիներ, քանի որ այն ժամանակ, երբ նրա տունն ու հողամասը տարանջատվել են, տեղյակ է պահվել, որ տվյալ հողակտորը աճուրդով է օտարվելու,  որովհետև առանձին գույքային միավոր է»,- Shantnews-ին ասել է Գյումրիի գլխավոր ճարտարապետ Հենրիկ Գասպարյանը:

Այսինքն՝ ուղղակի վաճառքով կարող են օտարվել միայն այն հողերը, որոնք տանը շատ մոտ են ու փոքր մակերես են զբաղեցնում, այլ շինություն հնարավոր չէ կառուցել: Տվյալ դեպքում խոսքը բավական մեծ տարածքի մասին է, որի նկատմամբ հետաքրքրությունը վերջին 3 տարիներին է առաջացել:

Մի ժամանակ քաղաքի ծայրամաս համարվող ու գրեթե ամայի տարածքը հիմա մաքսատան հարևանությամբ է: Ու մինչ բնակիչը ուղիղ վաճառքով տարածքն իրեն հանձնելու առաջարկն է ներկայացնում, պարզվում է՝ հողակտորի համար աճուրդ է հայտարարվել, այն արդեն կայացել է, ու տարածքը սեփականատեր ունի:

Տարածքը կառուցապատման համար է հատկացվել: Իսկ բերքատու ծառերի տեղում հասարակական նշանակության օբյեկտ է կառուցվելու, այս մասին գլխավոր ճարտարապետն է ասում: Իսկ Գոհար Զաքարյանը պատրաստվում է հողատարածքի աճուրդով օտարումը վիճարկել իրավական ճանապարհով:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։