Շիրակի մարզում կներդրվի երթուղային միասնական ցանց

Կառավարության որոշմամբ Հանրապետության բոլոր մարզերում ներդրվելու է միասնական երթուղային ցանց, որը սպասարկելու է մեկ օպերատոր: Սա նշանակում է, որ նույն մարզում ներմարզային ու միջմարզային ուղևորափոխադրումներն իրականացնելու է մեկ ընկերություն, իսկ երթուղային ցանցում ընդգրկվելու են բոլոր բնակավայրերը: Շիրակի մարզի նոր երթուղին մշակված է, այժմ քննարկումներ են ընթանում, թե գործող ուղևորափոխադրող ընկերություններից որոնք ցանկություն կունենան միասնական օպերատոր դառնալ: Կառավարության որոշմամբ միասնական երթուղին սպասարկելու պահանջներ են ներկայացվում:

Գյումրիի ավտոկայանում ներմարզային ու միջմարզային երթուղիների չվացուցակը տարբեր է: Քաղաքին մոտ գյուղերից ժամը մեկ  միկրոավտոբուսային երթուղիներ կան, ավելի հեռու ու քանդված ճամփա ունեցող բնակավայրեր օրական լավագույն դեպքում 3-4 տրանսպորտային միջոց է հասնում: Կանոնավոր ուղևորափոխադրումների անկանոն աշխատանքի պատճառը ուղևորների հոսքի պակասն է: Ուղևորները քիչ են, սպասարկող ընկերության աշխատանքը՝ ոչ շահութաբեր: Դրա համար էլ երթուղիների քանակը նվազում է:

Անցած տարվա դեկտեմբերին է կառավարությունը որոշում կայացրել, որ մարզերում միասնական երթուղային ցանց է գործելու: Այսինքն տվյալ մարզում բոլոր ուղղություներով ուղևորափոխադրումներն իրականացնելու է մեկ ընկերություն: Այժմ Շիրակի մարզում գործում է 14 ընկերություն, որոնք սպասարկում են 51 ներմարզային ու 16 միջմարզային երթուղի: Նոր որոշման համաձայն, այս ընկերությունների տրանսպորտային միջոցները շահագործումից դուրս կգան:

«Ներկա պահին շահագործվող ոչ մի տրանսպորտային միջոց չի բավարարում որոշմամբ սահմանված կարգի պահանջներին: Մենք պարտադրված պահանջ ունենք՝ երթուղային ցանցում կիրառել մինչև 25 նստատեղ ունեցող  տրանսպորտային միջոց և ամենաքիչը մինչև 10 տարվա շահագործմամբ: Այսինքն նոր երթուղային ցանցում աշխատելու են 18-25 տեղանոց տրանսպորտային միջոցներ, որոնք ավտոբուսներ են և միկրոավտոբուսային երթուղիները ամբողջությամբ վերանում են»,-Shantnews-ին ասել է Շիրակի մարզպետարանի տրանսպորտի և ճանապարհաշինության բաժնի պետ Խաչատուր Խնձրցյանը:

Այսինքն, նույնիսկ լավ վիճակում գտնվող տրանսպորտային միջոցները շահագործելու իրավունք ընկերությունները չեն ունենա:

Միասնական երթուղին կարող են սպասարկել 10 տարուց ոչ ավելի տարիք և 18-25 նստատեղ ունեցող մեքենաները: Երթուղին մարզպետարանում կազմել են, հաշվարկ են կատարել, որ մարզի բոլոր բնակավայրերում ուղևորափոխադրումներ ապահովելու համար 18-25 տեղանոց 50 ավտոբուս կպահանջվի:

«Որոշմամբ սահմանված պայմանները ներկայացրել ենք մեր մարզի ուղևորափոխադրումներ իրականացնող ընկերություններին: Իրենք պետք է որոշեն, եթե հնարավորություն ունեն կոնսորցիումային կառավարումով շահհագործելու, պատրաստ ենք, եթե բաժնետիրական ընկերությունների կողմից են շահագործվելու, էլի պատրաստ ենք: Նոր երթուղային ցանցի ներդրման ժամկետներ չկան: Շիրակի մարզում դեռ քննարկումներ են: Երթուղային ցանցը պատրաստ է և այն կգործի միասնական օպերատորի մրցույթից հետո»,- ասել է Խաչատուր Խնձրցյանը:

Միասնական ցանցի ստեղծումով, ըստ մարզպետարանի պատասխանատուի, մարզի բոլոր համայնքներում ուղևորափոխադրումների խնդիրը կլուծվի: Այժմ տրանսպորտ ընդհանրապես չի աշխատում Աշոցք և Արփի համայնքներում: Առայժմ ընկերություններից արձագանք չունեն: Միասնական ցանցը գործում է միայն Արմավիրի մարզում: Մինչ այն կներդրվի նաև Շիրակում, ուղևորատար ընկերությունների հետ պայմանագրերի ժամկետը երկարաձգվել է և թույլատրվել է սպասարկել մինչև 15 տարվա արտադրության տրանսպորտային միջոցներով:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։