Գյումրիում ՏԻՄ ընտրությունները կհամակարգի միայն մեկ տարածքային ընտրական հանձնաժողով, կձևավորվի  82 տեղամաս

Գյումրիում ՏԻՄ ընտրությունները կայանալու են հոկտեմբերի 17-ին: ԿԸՀ-ն սահմանել է ընտրությունների ժամանակացույցը: Սեպտեմբերի 2-ից մեկնարկում են կուսակցությունների և կուսակցությունների դաշինքների առաջադրումները: Հիշեցնենք, Գյումրիում և Վանաձորում ՏԻՄ ընտրությունները համամասնական ընտրակարգով են անցակցվելու, այսինքն՝ ընտրվում են տվյալ կուսակցության կամ կուսակցությունների դաշինքի ավագանու անդամները: Իսկ քաղաքապետի թեկնածուներ հանդիսանում են տվյալ կուսակցության կամ կուսակցությունների  դաշինքի ցուցակի առաջին համարը զբաղեցնողները:

Թիվ 31 տարածքային ընտրական հանձնաժողովը միակն է, որը համակարգելու է Գյումրիում ՏԻՄ ընտրությունները, մյուս ընտրատարածքներում ընդգրկված տեղամասերը միանում են քաղաքի ամենամեծ ընտրատարածքին: Եթե համապետական ընտրությունների ժամանակ քաղաքի տեղամասերը բաշխված էին թիվ 31 և 32 ընտրատարածքների միջև, ապա հիմա մեկ ընտրատարածքի կազմում ավելի մեծ թվով տեղամասային կենտրոններ կձևավորվեն: Դրանց թիվը հայտնի է՝ հոկտեմբերի 17-ին Գյումրիում կբացվի 82 ընտրատեղամաս:

«Թիվ 31 ընտրատարածքը վերջին խորհրդարանական ընտրությունների ժամանակ ընդգրկում էր 58 տեղամաս: Այդ տեղամասերը կմնան  անփոփոխ: Դրանց կգումարվի ևս 24 տեղամաս, որոնք համապետական ընտրությունների ժամանակ թիվ 32 ընտրատարածքի կազմում էին: Ընդհանուր Գյումրիի տեղամասերի թիվը 82 կլինի: Կփոխվեն 24 տեղամասերի համարակալումները »,- SHANTNEWS-ին ասել է թիվ 31 ՏԸՀ նախագահ Տիգրան Ղազարյանը:

Կփոխվի ոչ միայն տեղամասային կենտրոնների համարակալումը, այլև տեղամասային ընտրական հանձնաժողովների կազմը: Այս հանձնաժողովները 8 անդամ ունեն, որոնցից 6-ին նշանակում են խորհրդարանում ներկայացված քաղաքական ուժերը: Հունիսի 20-ի խորհրդարանական ընտրությունների արդյունքներով` ԱԺ-ում նոր քաղաքական ուժեր են հայտնվել, հետևաբար նաև տեղամասային հանձնաժողովների կազմերը կփոխվեն:

Բուն նախընտրական գործընթացը մեկնակելու է 2 օրից՝ կուսակցությունների ու կուսակցությունների դաշինքների առաջադրումներով: Առաջադրումների համար ժամանակ է հատկացված սեպտեմբերի 2-ից 12-ը, իսկ հետո արդեն գրանցման գործընթացն է սկսվելու: Ընտրական օրենսգիրքը հստակեցնում է, թե ովքեր չեն կարող Գյումրիի ավագանու անդամի թեկնածուներ լինել:

Կուսակցություններն ու կուսակցությունների դաշինքներն ավագանու թեկնածուների ցուցակ պետք է ներկայացնեն: Ըստ ընտրական օրենսգրքի, սահմանափակում նշված չէ, թե տվյալ քաղաքական ուժը քանի թեկնածու կարող է առաջադրել:

Իսկ նախընտրական քարոզչության համար հատկացված ժամանակը, ի տարբերություն նախորդ խորհրդարանական ընտրությունների, բավականին երկար է։ Քարոզչությունը կսկսվի սեպտեմբերի 22-ին և կտևի մինչև հոկտեմբերի 15-ը ներառյալ: Թիվ 31 տարածքային ընտրական հանձնաժողովի նախագահը նշում է՝ պաշտոնական քարոզչությանը նախորդող ժամանակահատվածում քարոզչություն իրականացնելն օրենքի խախտում չի համարվում:

«Ցանկացած խումբ, հասարակական կազմակերպություն կարող է ինչ-որ մեկին գովել: Դա չի դիտվում քարոզչություն: Մինչև քարոզարշավը գովազդային պաստառներ կարող են հայտնվել: Դրանք քարոզչություն չեն, քանի դեռ դրանց վրա հերթական համարներ չկան: Իսկ երբ քարոզարշավի մեկնարկը տրվեց, այդ ժամանակ արդեն այդ ամենը կդիտվի քարոզչություն, եթե տվյալ անձը ընդգրկված կլինի ավագանու թեկնածուների ցուցակներում»,- նշել է Տիգրան Ղազարյանը:

Հանրակրթական հաստատությունների, խանութների, սննդի կետերի շենքերին և հենասյուներին քարոզչական պաստառներ փակցնել չի թույլատրվում: ՏԻՄ ընտրություններին քվեաթերթիկների նմուշները սահմանում է տարածքային ընտրական հանձնաժողովը: Առաջադրումներից ու գրանցումներից հետո կորոշվեն կուսակցությունների և կուսակցությունների հերթական համարները, իսկ քվեարկության կարգը, ըստ թիվ 31 ՏԸՀ նախագահի, կլինի նույնը, ինչ խորհրդարանական ընտրությունների ժամանակ էր: Քվեախցերում գրիչներով նշումներ ընտրողները չեն կատարի, առաջադրված քաղաքական ուժերը կունենան առանձին քվեաթերթիկներ։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։