2017թ.-ին մեր մարզիկները 201 մեդալ են նվաճել. Հրաչյա Ռոստոմյանը ամփոփել է անցած տարին

Այսօր ՀՀ սպորտի և երիտասարդության հարցերի նախարար Հրաչյա Ռոստոմյանն ամփոփել է 2017թ․-ի ընթացքում իրականացված միջոցառումներն ու ծրագրերը։

«Ունեցել ենք գերակա խնդիրներ՝ դրանցից կառանձնացնեմ ՀՀ բնակչության շրջանում ֆիզիկական կուլտուրայի և մասսայական սպորտի տարածումը, հայկական ազգային կոխ ըմբշամարտ մարզաձևի զարգացումը, սպորտային տուրիզմի զարգացման հայեցակարգի մշակումը, երիտասրադության ներգրավվածության մակարդակի բարձրացումը, ֆիզիկական կուլտուրայի  միջոցով նախադպրոցական տարիքի երեխաների շրջանում առողջ ապրելակերպի սերմանում և տարածում և այլն», – ասել է նախարարն ու որոշ մանրամասներ ներկայացրել արված աշխատանքներից:

ՀՀ բնակչության շրջանում ֆիզիկական կուլտուրայի և մասսայական սպորտի տարածման նպատակով են աշխատանքներ կատարվել՝ այդ թվում իրականացվել է 11 միջոցառում։ Հայաստանի նախագահի մրցանակի համար «Լավագույն մարզական ընտանիք» մրցույթ է անցկացվել ՀՀ մարզերում, Երևանում և Արցախում: Մրցույթին մասնակցել է 61 համայնքի 1539 ընտանիք, որից 23-ը հաշմանդամություն ունեցող։ Հայկական ազգային կոխ ըմբշամարտ մարզաձևի զարգացման համար մարզային առաջնություն է անցկացվել, որին մասնակցել է ՀՀ 6 մարզ, անկացվել են վերապտրաստման դասընթացներ, ինչպես նաև Կոտայքի մարզի Գառնի գյուղում անցկացվել է կոխի երիտասարդների ՀՀ բաց առաջնություն։

Նախարարը կարևորել է նաև մասսայական սպորտի զարգացման համար իրականացված ծրագրերը՝ այդ թվում Թուրքիայի Սամսուն քաղաքում 2017թ․-ին կայացած սուրդլիմպիկ խաղերին Հայաստանի մարզական պատվիրակության մասնակցության ապահովումը, Ավստրիայի Գրաց քաղաքում հատուկ օլիմպիադաների ձմեռային խաղերին մասնակցությունը,  հաշմանդամային սպորտին առնչվող ծառայությունների ծրագիրը: Մի շարք միջոցառումներ են իրականացվել նաև հովանավորությամբ՝ այդ թվում մանկապատանեկան սպորտի ոլորտում, ներդրումային ծրագրի միջոցով Քանաքեռ Զեյթուն համայնքում մարզաառողջարանային համալիր է կառուցվում:

Հրաչա Ռոստոմյանը նաև ներկայացրել է սպորտի բարձրագույն նվաճումները։

«Պետական աջակցության ծրագրում ընդգրկված 32 մարզական ազգային ֆեդերացիաները 2017թ․-ին պետական աջակցության գումարներով կազմակերպել են 126 ուսումնամարզական հավաք, 95 ՀՀ առաջնություն, մասնակցել են 176 միջազգային մրցաշարերի՝ այդ թվում Եվրոպայի և աշխարհի առաջնությունների: 2017թ.-ին հավաքական թիմերի մարզիկները 15 մարզաձևերից աշխարհի և Եվրոպայի առաջնություններում նվաճել են 30 մեդալով ավելի, քան 2016թ.-ին: Ընդհանուր 201 մեդալ՝ 61 ոսկի, 49 արծաթ և 91 բրոնզե», – նշել է նախարարը:

Նախարարի ասուլիսի տեսագրությունն ամբողջությամբ կարող եք դիտել ստորև։