Հիմնանորոգվում է Գյումրի-Բավրա միջպետական ավտոմայրուղուն կապող հանրապետական նշանակության 10 կմ երկարության ճանապարհը

Հայ-վրացական սահման տանող միջպետական նշանակության Գյումրի- Բավրա մայրուղում անցած տարի հիմնանորոգված ճանապարհի նոր ասֆալտաշերտը վերջանում է ճիշտ այն հատվածում, որը հարում է Ցողամարգ-Ամասիա հանրապետական ճանապարհին: Մեկ ամիս առաջ ճանապարհն անանցանելի էր, հողային ու գրունտային ծածկույթով, երթևեկել գրեթե անհնար էր։ Այժմ այլ ճանապարհ է ու բաց երթևեկությամբ։ Ճանապարհը միակ կապն է տասնյակ գյուղերի հետ։ Այն նաև միակն է Աշոցք գնացողների համար։ Մոտ 8 կմ երկարության ճանապարհահատվածի կապիտալ նորոգումները դեռ շարունակվում են, երկրորդ ասֆալտաշերտն են լցնելու։ Շինարարը կողային առուներ է կառուցում, ջրահեռացումը դրանցով է ապահովվելու։ Ասֆալտի երկարակեցության համար կարևոր նշանակություն ունեն։

Շինարարը կողային առուներ է կառուցում, ջրահեռացումը դրանցով է ապահովվելու։ Ասֆալտի երկարակեցության համար կարևոր նշանակություն ունեն։

«Կողային առուների սալիկապատում է տրված, արդեն ջրընդունիչներ կան, որոնք տեղադրելու ենք ասֆալտապատման երկրորդ շերտը լցնելուց հետո: Դրանք ասֆալտի երկարակեցության համար են, որպեսզի ճանապարհը շատ չքայքայվի: Տեղադրվել են նաև բետոնե հենապատեր անվտանգ երթևեկության համար: Շատ կարևոր հատվածներ ունենք, որտեղ քարաթափումներ ու սողանքային  տեղամասեր են, ելքը գաբիոնային շարվածքներն են, որոնք անում ենք»,- SHANTNEWS.am-ի հետ զրույցում ասել է «Մերձմոսկովյան» ԲԲ ընկերության աշխղեկ Արտակ Մարդոյանը:

Ցողամարգ-Ամասիա կապող հանգույցը կամուրջն է՝ կառուցված 1900- ականներին։ Այն վթարային է, երթևեկության համար խիստ վտանգավոր։ Կամուրջը Ամասիայի ձոր կոչվող հատվածի միջնամասում է: Ճանապարհի շրջադարձային հատվածները, որոնք անմիջապես ձորի բերանով են, արգելապատնեշներ գրեթե չեն ունեցել: Նորերն են տեղադրում՝ բետոնե սալերով: Ճանապարհին նաև քարաթափման վտանգներն են շատ, իսկ վթարներն էլ՝ անպակաս: Ամրացման, ամրակայման աշխատանքներ են կատարում՝ գաբիոններ են կառուցում:

Վտանգավոր այլ հատվածներ էլ կան արդեն ճանապարհի մեջտեղում, երթևեկելի գոտում։ Նախատեսված էր, որ ռեսայքլինգ մեթոդով ճանապարհի եղած ծածկույթը պետք է վերամշակվեր ու նոր հիմք ստեղծեր, բայց փոփոխություն է կատարվել, որոշվել է գրեյդերով հարթեցնել և ասֆալտապատել:

Իսկ շարունակությունը Ամասիա-Արեգնադեմ 2 կմ-անոց ճանապարհահատվածն է և հիմնանորոգվում է։ Ընդհանուր 10 կմ երկարության հանրապետական ճանապարհը միայն Ամասիայի տարածաշրջանի համար չէ, որ համարվում է կենսական նշանակության ենթակառուցվածք, այն միջպետական մայրուղուն է կապում։ Ճանապարհաշինական աշխատանքները նախատեսված են ավարտել մինչև տարեվերջ։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։