Ստեփանակերտի Փափազյանի անվան Պետական դրամատիկական թատրոնը հյուրախաղերով Գյումրիում է

44 օրյա պատերազմից մեկ տարի անց Արցախում վերաբնակեցումն ու կյանքի բնականոն ընթացքը դեռ լիարժեք չի վերականգնվել: Պատերազմը փոխել է ոչ միայն մարդկանց ճակատագիրը, այն բաժանելով՝ պատերազմից առաջ և հետոյի, այլև գործելու, արարելու մոտեցումները: Ստեփանակերտի  Վահրամ Փափազյանի անվան Պետական դրամատիկական թատրոնի տնօրենը հիշում է, թե ինչ ծրագրեր ու խաղացանկ էին կազմել 2020-ի թատերական կյանքում։

«Անցած տարի սեպտեմբերին մենք արձակուրդում էինք, միակ պատմական պիեսն էինք բեմադրելու և այն խաղալու էինք Տիգրանակերտում։ Ամեն բան պատրաստ էր՝ դեկորները, հագուստները, բայց պատերազմն առաջ ընկավ։ Պատերազմից հետո լրիվ ուրիշ Ստեփանակերտ էր։ Լույս չկար, ջուր չկար, կամաց-կամաց վերականգնվեց, բայց մարդկանց հոգեբանական վիճակն էր ծանր, դժվար էր աշխատել։ Ի պատիվ արցախցիների մենք հաղթահարեցինք ու սկսեցինք մեր գործը, հիմա երեք նոր ներկայացում ունենք պատերազմից հետո ծնված»,- SHANTNEWS.am-ի հետ զրույցում ասել է Ստեփանակերտի պետական դրամատիկական թատրոնի տնօրեն Արմեն Հարությունյանը։

Թվարկած ծրագրերն արդեն անցյալ են, որոնց այլևս անդրադարձ չեն ունենա: Պատերազմից հետո թատրոնի լինել-չլինելու հարցն էր դրված: Մի ամբողջ պատմություն կերտած թատրոնում մշակույթի վերածնունդն էր մշուշոտ՝ ինչպես կրկին բեմ բարձրանալ, երբ ոչ միայն դերասանների այլև հանդիսատեսի վիշտն ամոքված չէր: Բայց  համառությունն ավելի զորեղ գտնվեց, չհանձնվեցին, չլուծարվեցին, բոլորի որոշումը հաստատուն էր՝ թատրոնը շարունակելու է գործել։

Նոր բեմադրություններից մեկը՝ «Երկնքից երեք խնձոր ընկավ» պիեսն է: Ներկայացման բեմադրիչը Նյու Յորքում բնակվող, ստեղծագործող Կարինե Քոչարյանն է: Ստեփանակերտի թատրոնի հետ առաջին բեմադրությունն է անում, պիեսը պատերազմից հետո առաջին մեծ գործն է թատրոնում: Հեշտ չի եղել այն բեմադրել հոգեբանական ծանր տրամվաներով ապրող դերասանների հետ, բոլորին դարձյալ բերել է մշակութային կյանքը նորից ապրեցնելու վճռականությունը:

«Դժվարությամբ կարողացա բեմադրել ներկայացումը, որովհետև բարդ էր այնքանով, որ գլխավոր դերասանուհիներից մեկին մի կերպ եմ համոզել, որ գա թատրոն, որովհետև պատերազմում ամուսինն էր զոհվել՝ թողնելով երկու փոքրիկներին․․․Կնոջ համար տունը Եռաբլուրն էր դարձել։ Մյուս դերասանն ուզում էր թողնել թատրոնը, զինվորական դառնալ էր ուզում, կարծես կռիվն իր մեջ չէր հանդարտվել։ Մարդիկ ծանր հոգեկան ապրումների մեջ էին»,- մեր թղթակցի հետ զրույցում ասել է Կարինե Քոչարյանը։

ՕՖելյա Մարտիրոսյանը ներկայացման գլխավոր դերասանուհին է: 2002 թվականից դրամատիկական թատրոնում է խաղում: Պատերազմն ամբողջությամբ փոխել է երիտասարդ դերասանուհու կյանքը: Պատերազմում ամուսինն է զոհվել, վիշտը մեծ է ու դժվարությամբ է համաձայնել նորից բեմ դուրս գալ:

Ներկայացման մեջ թատրոնի գրեթե բոլոր դերասաններն են զբաղված, բոլորի ճակատագրերը որքան տարբեր են, նույնքան էլ նման են: Պատերազմը բոլորի մոտ նույն հետքն է թողել՝ հարազատի, տուն ու տեղի կորուստ:

Նարինե Աբգարյանի վեպի հիման վրա բեմադրված պիեսի հյուրախաղային հաջորդ կանգառը Լոռին  ու Կոտայքն են: Ստեփանակերտի թատրոնը նոր ներկայացումների խաղացանկում չի մոռացել ընդգրկել նաև պատանի հանդիսատեսի նախասիրությունները:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։