Ալեքպոլի Մալխասովների հայտնի առանձնատունը վերածվել է Հայկական ազգային խորհրդանիշների թանգարանի

Կումայրի արգելոցի միջուկում կառուցված տների մեծ մասի պատմագրությունը ալեքպոլյան ժամանակաշրջանի է: Քաղաքի կենտրոնական հրապարակին հարող տարածքում, որը նախկինում կոչվել է ուռումների (հունական) թաղամաս, հիմնականում ապրել են մեծահարուստ ընտանիքները: Թաղամասի առանձնատներից մեկի արտաքին պատին կառուցման թվագրությունն է՝ 1887 թվական: Այն ժամանակին Ալեքպոլի դպրանոցներից մեկն է եղել, որն հետո դարձել է մեծահարուստների առանձնատուն։

«Շքեղ առանձնատունը պատկանել է Մալխասովներին կամ Մալխասյաններին, որոնք բավականին հարուստ ընտանիք են եղել ու զբաղվել են տպագրական աշխատանքով»,- SHANTNEWS.am-ի հետ զրույցում ասել է Ալեքպոլի պատմությունն ուսումնասիրող Դերենիկ Մալխասյանը:

Ալեքպոլյան ճարտարապետությամբ շենքի նոր սեփականատերը պատմական գիտությունների դոկտոր Հայկ Դեմոյանն է։ Նրա նախաձեռնությամբ կիսաքանդ շինությունը վերածվել է մշակութային կենտրոնի: Նկուղային հատվածում «Հայկական ազգային խորհրդանիշների» թանգարան է հիմնել՝ ցուցադրելով իր հավաքածուում ունեցած նմուշները, իսկ դրանք հիմնականում ներկայացնում են եվրոպական և ռուսական պատկերագրության մեջ հայկական արքայական ընտանիքներին վերաբերող դրոշների հորինվածքներ ու զինանշաններ:

«Զինանշանային համակարգը գալիս է ապացուցելու այդ պատկերագրությունը: Զինանշանների եվրոպական վահանաձև հին մատյաններում կտեսնեք Սիս, Կոռիկոս հայ կաթողիկոսական զինանշաններ, արքայական զինանշաններ, որոնք ուղղակի կապ են ունեցել եվրոպական զինանշանների մշակույթի արժեհամակարգի հետ, և դրանց խաչաձև լուծումները հենց դրա վառ վկայություններից մեկն է»,- SHANTNEWS.am-ի հետ զրույցում ասել է պատմական գիտությունների դոկտոր Հայկ Դեմոյանը:

5 փոքր սրահներում ավելի քան երեք տասնյակ նմուշներ են ցուցադրված, որոնք տարիների ընթացքում Հայկ Դեմոյանը ձեռք է բերել արտերկրում  հայտարարված տարբեր աճուրդներում։ Թանգարանում ցուցադրված ամենահին նմուշը, որն անձնական արխիվից չէ, բերվել է ԱՄՆ-ից:

«Միակ նմուշը, որ բերվել է Լոս Անջելեսի Արարատ-Էսքիջյան թանգարանից, այս բացառիկ սփռոցն է մետաքսե՝ 230 տարվա՝ 18-րդ դարի վերջ 19-րդ դարի սկիզբ։ Տեսնում եք հայկական զինանշանը և առասպելական կերպարները՝ Հայկ Նահապետը: Սա բացառիկ պահպանված նմուշ է, որը ժամանակավորապես է Գյումրիի մեր թանգարանում»,- նշել է Հայկ Դեմոյանը:

Ցուցասրահներից մեկում ներկայացված է նաև Հայաստանի և հարևան երկրների Լինչի քարտեզը։ Իռլանդացի հայագետ,  աշխարհագրագետ Լինչը  երկար տարիներ ուսումնասիրել է տարածաշրջանն ու վերջնական տեսքով 1901 թվականին հրապարակել է քարտեզը:

«Այս հատվածում դուք երբեք չեք գտնի Ադրբեջանը, սա ոչ թե կեղծիք է, այլ ճշմարտության բացահայտումն է: Եվ Լինչը կատարել է մեծ առաքելություն, և այս  հատվածներում Շիրակ աշխարհը և Արևմտյան Հայաստանը ամբողջությամբ կան՝ իրենց հուշարձաններով»,- ներկայացրել է հուշարձանագետ Ավետիք Մելիք-Սարգսյանը:

Թանգարանի վերնահարկում արդեն «Ակումբ 1887»-ն է։ Այստեղ ցուցադրված կահ-կարասին ու նմուշներն ավելի շատ անգլիական ոճն են ընդգծում: Ակումբը ծառայելու է որպես երկխոսությունների, քննարկումների, մշակութային  միջոցառումների անցկացման կոլորիտային  վայր:

Ցուցադրությունը շարունակում է  համալրվել նոր նյութերով։ Հայկական ազգային խորհրդանիշների թանգարանը բացման օրը  համալրվեց նոր նմուշով ՝ 19-րդ դարում Ալեքպոլում հայտնի դերձակ՝ Ֆանտազի Արտաշի արդուկով։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։