Գյումրիում և Արթիկում ներդրվում են ավտոմատ համակարգով աշխատող էներգահաշվիչներ

Էլցանցի բաժանորդները կկարողանան հոսանքի իրենց սպառման ծավալներին ու ցուցմունքներին հետևել օնլայն: Այս հնարավորությունը ստեղծում են էներգիայի հաշվառման նոր ժամանակակից տեխնոլոգիաները: Էլցանցը նոր հաշվիչներ է տեղադրում, որոնք հնարավորինս նվազեցնում են մարդկային գործոնը: Հաշվիչները կմիացվեն ՀԷՑ-ի ընդհանուր ցանցին, և յուրաքանչյուր բաժանորդի սպառած էներգիայի չափը կգրանցվի օնլայն: Գործընթացը ներառելու է Գյումրիի և Արթիկի բազմաբնակարան շենքերը: Նոր հաշվիչների տեղադրումը սկսվել է Մուշ 2-2 թաղամասից:

Մուշ 2-2 թաղամասի շենքերի  նախորդ հաշվիչները ևս նոր էին՝ թվային, հոսանքի ծախսի գիշերային ու ցերեկային ժամերի տարանջատումով: Բայց ՀԷՑ-ի նոր ներդրումային ծրագրով դրանք էլի փոխարինվում են: Նույն ճշգրտության հաշվիչներ են տեղադրվում, բայց նորերը մեկ կարևոր գործառույթ ունեն՝ ինտերնետային կապով միացվելու են ՀԷՑ-ի տվյալների բազային և արձանագրում են յուրաքանչյուր բաժանորդի ծախսը՝ օրով ու ժամով:

«Մարդկային գործոնն, ընդհանրապես, դուրս է գալիս այս դեպքում: Բարձր ճշգրտություն ունեցող հաշվիչներ են և սպասարկումը բավական հեշտ կլինի: Կային բողոքներ՝ կապված աշխատակիցների հետ: Հիմա իրենց շփումը շատ անգամ կնվազեցվի: Եթե մենք ամիսը մեկ անգամ կատարում էինք գույքագրում, ապա հիմա այդ գույքագրման աշխատանքներն ամեն օր կարող են ֆիքսվել: Անհրաժեշտություն չկա, որ մեր աշխատակիցը գնա հաշվիչ առ հաշվիչ ֆիքսի աշխատանքը: Այդ ամենը կկատարվի ՀԷՑ-ում ավտոմատ կառավարման համակարգով»,- SHANTNEWS-ին ասել է ՀԷՑ ՓԲԸ «Ղարս» մասնաճյուղի իրացման գծով փոխտնօրեն Սեյրան Յայլոյանը:

Հաշվիչները ստուգելու, ցուցմունքներն ամեն ամսվա վերջում գույքագրելու տեսուչների գործառույթն, ըստ էության, դուրս է գալիս: Բոլոր ցուցմունքները ընկերության և բաժանորդների համար հասանելի կդառնան ինտերնետային կապով: Մարդկային գործոնը նվազեցվում է, փոխարինելու են գալիս բարձր ճշգրտության հաշվիչները:

ՀԷՑ-ի «Ղարս» մասնաճյուղի իրացման գծով փոխտնօրենը նշում է՝ սա չի նշանակում, թե տեսուչներն աշխատանքից ազատվելու են: Ինտերնետային կապի խափանման դեպքում նոր հաշվիչների տեխնիկական սպասարկումը կրկին տեսուչներն են կատարելու: Նոր հաշվիչների տեղադրումով կվերանան նաև բաժանորդ-տեսուչ պայմանավորվածությունները հոսանքի վարձավճարի մուծման ժամկետների վերաբերյալ: Սահմանված ժամկետում վճարումներ չկատարած բաժանորդների բնակարանները կհոսանքազրկվեն ավտոմատ կերպով:

«ՀԷՑ-ից ծրագրավորված միանգամից կանջատվի, բայց յուրաքանչյուր անջատումից առաջ անպայման ծանուցագիր կուղարկվի բաժանորդին: Այստեղ մեր գործոնը չկա բացարձակ: Մենք ընդամենը կարող ենք միջամտություն կատարել: Հատկապես մեր մարզում նպաստառուները շատ են: Հայաստանում  հոսանքանջատման ժամկետ է սահմանված ամեն ամսվա 20-21-ը: Մենք գիտենք մեր բաժանորդներին և այդ ժամկետը երկարացնում ենք այնքան, մինչև մարդիկ ստանան գումարները և վճարեն: Բնականաբար, մենք այդ ցուցակները կներկայացնեն, որպեսզի ծրագիրը կազմելիս հաշվի առնվի այս ամենը, որ կարողանանք օգնել բաժանորդներին: Իսկ ինչ վերաբերում է դեբիտորական պարտքեր ունեցողներին, ապա  սա արդեն մեզանից կախված չէ: Այստեղ կան մի շարք գործոններ, և եթե այդ գործոններից ոչ մեկին չի համապատասխանում, ավտոմատ անջատվում է»,- ասել է Սեյրան Յայլոյանը:

Նախատեսված է, որ առայժմ նոր հաշվիչներ ունենալու են Գյումրիի և Արթիկի բազմաբնակարան շենքերի բաժանորդները, որոնց թիվը 16 հազար է: Աշխատանքները փուլային են, և նոր հաշվիչները ընդհանուր թվային ցանցին կմիանան, երբ ենթակայանները նույնպես կունենան ավտոմատ կառավարման համակարգեր:

Շիրակի մարզում ՀԷՑ-ի ներդրումային ծրագրերին սպասում են շատ թաղամասեր, որտեղ հենասյուները փտած են, հաղորդալարերը խճճված ու մաշված: Այս խնդիրները գույքագրված են ու ներկայացված են ներդրումների սպասող աշխատանքների ցանկում:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։