Հողային հաշվեկշռի հստակեցում և հողհատկացում սոցիալական բնակարանաշինության համար․ Գյումրիի ավագանու նոր որոշումները

Գյումրիի ավագանու վերջին նիստում հաստատմանն  են ներկայացվել մի շարք որոշումների նախագծեր, որոնցով նախատեսվում են հողատարածքների վաճառք ու հատկացում։ Բայց մինչ այդ ավագանին հաստատել է Գյումրիի հողային հաշվեկշիռը, որը կազմվել է հուլիսի 1-ի դրությամբ։ Թե ինչքան համայնքապատկան հողատարածքներ կան, ներկայացրել է քաղաքի գլխավոր ճարտարապետը։ Համայնքային հողակտորներից ուղղակի վաճառք կատարելու և հողհատկացում կատարելու որոշումներ ևս ավագանին ընդունել է։

Առաջին հողհատկացումը Գյումրիում սոցիալական բնակարանների կառուցման համար է։ Սոցիալական բնակարանաշինության նախորդ ծրագիրը շարունակվելու է։ 12-16 բնակարան է կառուցվելու։ Ծրագիրը Անի թաղամասի նույն հասցեում է  իրականացվելու, բայց բնակարանների հատկացման պայմաններն են փոխվել։

«Հիմնադրամը բնակարանները միանգամից անհատույց չի տրամադրում, այլ տալիս է 10 տարի ժամկետով, որի ընթացքում ընտանիքները պետք է հիպոթեքային վարկի միջոցով բնակարանի արժեքի 50 %-ը վճարեն։ Մյուս 50 %-ը հիմնադրամն է վճարում։ Բարերարներն արդեն եկել են, ցանկություն են հայտնել նախագծային աշխատանքները սկսել։ Դրա համար անհրաժեշտ է, որ քաղաքապետարանը համապատասխան հողատարածքն անհատույց հատկացնելու որոշում կայացնի»,- ասել է Գյումրիի գլխավոր ճարտարապետ Հենրիկ Գասպարյանը։

Արդյոք Գյումրիում կա ապօրինի կառույցներն ապամոնտաժելու ցանկություն և լծակներ։ Սա հաջորդ հարցն էր, որը հետաքրքրում էր ավագանու անդամներին։ Ապօրինի կառույցներ կան, իսկ ապամոնտաժման որոշում՝ ոչ։

«Մենք պայքարում ենք ապօրինի շինարարության դեմ ոչ թե քանդելով, այլ՝ կանխելով։ Եթե հայտնաբերում ենք այդպիսի կառույցներ՝ շինարարությունը կանխում ենք և գնում իրավական ճանապարհով, բայց դրանք քանդելու հարց չենք դրել, որովհետև չկան մեծ կառույցներ, որոնք ենթակա են ապամոնտաժման»,- ասել է Հենրիկ Գասպարյանը

Ի պատասխան Գյումրիի գլխավոր ճարտարապետի, «Հայկական վերածնունդ» խմբակցության ավագանու անդամ Հասմիկ Եղիազարյանը նշել է՝ սա նշանակում է, որ համապատասխան բաժինները քաղաքապետարանում շատ վատ են աշխատում, քանի որ քաղաքի կենտրոնական հատվածում կատարվող ապօրինի շինարարությունները չեն նկատում։

20 մլն դրամ քաղաքային բյուջեից կհատկացվի համայնքային կառույցներին։ Սա անհրաժեշտ է  սուբվենցիոն ծրագրի նախապատրաստության համար։ Քաղաքապետարանը 46 ՀՈԱԿ-ներում արևային ֆոտովոլտային կայաններ է տեղադրելու։ Մինչ ծրագրի մեկնարկը անհրաժեշտ է, որ համայնքային կառույցները էներգամատակարար ընկերության հետ համապատասխան ենթակառուցվածքների խնդիրները լուծեն։

Վերջին նիստում ավագանին հավանության է արժանացրել Արթուր Ալեքսանյանի անվան հունահռոմեական ըմբշամարտի մարզադպրոցի տնօրեն և օլիմպիական չեմպիոնի  անձնական մարզիչ Գևորգ Ալեքսանյանին Գյումրիի պատվավոր քաղաքացու կոչում շնորհելու նախագծին։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։