«Ռոսիա» կինոթատրոնը «Կուկուռուզնիկի» և «Զվարթնոցի» ճակատագրին է արժանանում. ճարտարապետներ

Ճարտարապետներն այսօր հրավիրված մամուլի ասուլիսի ժամանակ անդրադարձել են «Ռոսիա» կինոթատրոնի շենքում կատարվող փոփոխություններին: Ինչպես հայտնի է, շինությունն արդեն մեկ տասնամյակից ավելի է, ինչ որպես տոնավաճառ է ծառայում, իսկ վերջերս շենքում ու նրա տարածքում վերակառուցման աշխատանքներ են ընթանում:

«Ռոսիան» նույն հզոր ուժն ունի, ինչ օդանավակայանը: Նա նույն այդ տարիների մոդեռնիստական կառույցներից մեկն է, այն, ինչ կատարվում է, ես հանկարծակի նկատեցի՝ «Ռոսիա» կինոթատրոնը փակում են պարզապես»,- ասել է «Հայնախագիծ» ինստիտուտի տնօրեն, Հանրային խորհրդի քաղաքաշինության ենթահանձնաժողովի նախագահ Գրիգոր Ազիզյանը՝ բերելով Աշխաբադի շինություններից մեկի՝ Մարքսի անվան գրադարանի օրինակը:

Ազիզյանը հիշեցրել է, որ Աշխաբադում սկզբունք է դարձել ամեն բան սպիտակ գույնով կառուցելը, ուստի բետոնե այդ շինության պատերը ևս ներկել են սպիտակով, բայց միայն արտաքին պատերը, ներսում որևէ բանի ձեռք չեն տվել:

«Էս ի՞նչ  կատարվում «Ռոսիայի» հետ, երբ հեղինակին չեն դիմում կամ հեղինակը չի էլ ուզում մոտիկանա էդ շենքին, որովհետև իրեն չեն լսում, ինչ ուզում են, անում են»,- հավելել է Ազիզյանը:

Լրագրողների այն դիտարկմանը, թե շենքն արդեն տարիներ շարունակ որպես տոնավաճառ է ծառայում, բանախոսն արձագանքել է.

«Բայց կերպարին չէին կպնում, չէ՞, հույս ունեինք, որ փոխվելու ու նորից կինոթատրոն է դառնալու, տեսե՞լ եք, թե ինչ են անում. ապակուց պատ են դրել»:

ՀՀ ճարտարապետների միության նախագահ Մկրտիչ Մինասյանն անհրաժեշտ է համարում պարզել, թե Երևանի քաղաքապետարանն ինչպես է թույլատրել սեփականատիրոջը նման փոփոխություններ կատարել.

«Ոչ մի խորհրդակցություն հեղինակի հետ, վերջին հաշվով, հեղինակը ողջ է, և նման շենքերի  աղավաղելը նման է քանդման: Ես չգիտեմ՝ հետագայում ինչ ենք ուզում տեսնել, բայց երբ տեսնում ենք, որ բոլորը պետք է քանդվեն և աղավաղվեն, դա շատ վատ ճանապարհ է, շատ կասկածելի ճանապարհ է մեր պետության համար, որովհետև դրա համար մեր դիրքերը շատ թուլանում են, մեզ ուրիշ տեղերում դա ասում են»:

 Հարցին, թե արդյոք հավանական է, որ «Ռոսիան» կրկին որպես կինոթատրոն ծառայի, ճարտարապետ Անահիտ Թարխանյանը պատասխանել է.

«Եկեք չմոռանանք, որ այսօր կառուցվում են կինոթատրոններ, դահլիճներ, ծախսվում են մեծ գումարներ: Ընդամենն այդ կինոթատրոնում անհրաժեշտ է աթոռները 600-ից սարքել 400, քանի որ ժամանակին նեղլիկ աթոռներ են դրվել: Ի վերջո, մենք «Ոսկե ծիրան» փառատոն ենք անցկացնում, անընդհատ դժգոհում են մասնակիցները, որ տեղ չկա և ցավ են ապրում, որ «Ռոսիայի» պես կինոթատրոնում չեն կարող անցկացնել»:

Հիշեցնեք, որ «Ռոսիա» կինոթատրոնը («Այրարատ») շահագործման է հանձնվել 1974 թվականին: Այն համարվում է Երևանի ամենամոդեռնիստական կառույցներից մեկը։ Կառույցի ճարտարապետներն են Արթուր Թարխանյանը, Սպարտակ Խաչիկյանը, Հրաչյա Պողոսյանը, ովքեր 1979 թվականին կինոթատրոնի նախագծի համար արժանացել են ԽՍՀՄ նախարարների խորհրդի մրցանակին։ Սեփականաշնորհվել է 2004 թվականին։