Որոնք էին Գյումրիի ՏԻՄ ընտրություններում քիչ ձայներ ստանալու պատճառները․ կարծիք եք հայտնում անցողիկ շեմը չհաղթահարած քաղաքական ուժերը

Գյումրիի ՏԻմ ընտրությունների անցողիկ շեմը հաղթահարել է 5 կուսակցություն, այսինքն՝ մասնակից ուժերի ուղիղ կեսը։ Մինչ ընտրությունները քարոզարշավի ընթացքում կուսակցություններից ու դաշինքներից յուրաքանչյուրի հաշվարկով անցողիկ շեմը հասանելի էր իրենց համար։ Արդյունքները, սակայն, այլ բան ցույց տվեցին։ Մասնակցության ցածր ցուցանիշը, ընտրությունների նկատմամբ անվստահությունը, թե սեփական ուժերի գերագնահատումը․․․ Որոնք էին ՏԻՄ ընտրություններում քիչ քվեներ ստանալու պատճառները։ Այս մասին խոսել են անցողիկ շեմը չհաղթահարած քաղաքական ուժերը։

Քարոզարշավի ընթացքում արված անկախ հարցումներն ու բնակիչների հետ հանդիպումները ցույց են տվել, որ ընտրողների, համենայնդեպս, ընտրել խոստացողների թիվը փոքր չէ։ Քվեարկության արդյունքները այլ բան են ցույց տալիս։ Կոմունիստական կուսակցությունն ընդամենը 260 ձայն է ստացել։

«Մեզ թվում էր, որ մեր ագիտացիան, շփումը մարդկանց հետ ավելի լավ արդյունք պետք է տային, բայց ինչպես տեսանք՝ այդպես չեղավ։ Դրա պատճառն այն էր, որ մենք ժողովրդի հետ բավական ժամանակ չշփվեցինք։ Ոչ թե չկամություն կար, այլ մոռացություն կար»,- SHANTNEWS-ին ասել է ՀԿԿ Գյումրիի կազմակերպության ղեկավար Կոնստանդին Ղավազյանը։

«Գյումրին կռնա» դաշինքը ՏԻՄ ընտրությունների մասնակցությամբ քաղաքակրթական շարժմանը նաև քաղաքական բաղադրիչ ավելացրեց։ Դաշինքի ներկայացուցիչների համար ընտրությունների արդյունքը կանխատեսելի էր։ Սա միայն սկիզբն են համարում ու պատրաստվում հաջորդ՝ համապետական ու ՏԻՄ ընտրություններին։«Գյումրին կռնա»-ն 904 ձայն է ստացել կամ նրանց օգտին քվեարկել է ընտրողների 3,43%։

«Ըստ մեր հարցումների՝ առկա բնակչության 20-25%-ը հավանել է մեզ։ Թե ինչու չվերածվեց դա ընտրաձայների, պատճառն այն կարճ ժամանակահատվածն էր, որը մեզ հնարավորություն չտվեց հավանությունը դարձնել ընտրաձայն։ Նոր քաղաքական ուժ ենք, մուտքը նոր էր, և կարծես մարդիկ ասացին՝ ճիշտ եք ասում, լավ բան եք ասում, մի քիչ սպասեք, մենք ձեզ հավանում ենք, բայց դեռ չենք համարձակվում ընտրել։ Հետագա ընտրություններին՝ թե՛ ՏԻՄ, թե՛ համապետական ընտրություններին, մենք դիտարկում ենք մեր մասնակցությունը։ Դրա համար էլ շարունակում ենք մեր գործունեությունը քաղաքական դաշտում»,- SHANTNEWS-ին ասել է « Գյումրին կռնա» դաշինքի ներկայացուցիչ Վարդան Գրիգորյանը։

«Հայրաքաղաք» դաշինքի ցուցակը գլխավորող Լևոն Բարսեղյանը նախօրեին  համացանցով էր հետընտրական իր վերլուծությունները ներկայացրել։ Իրենց թեկնածուների թվում գործող ավագանու անդամներ էին, մարդիկ, որոնք քաղաքի խնդիրների տեղյակ էին։ Լևոն Բարսեղյանը ընտրությունների արդյունքները բացատրում է շատ պարզ՝ ընտրողները որոշեցին չօգտվել իրենց ծառայություններից։

«Ոչ մի սարսափելի բան տեղի չի ունեցել, որովհետև շատ հնուց և խորքից եմ այս ամբողջին նայում։ Մարդիկ ընտրում են իրենց նմաններին, մարդը չի կարող իր նմանին չընտրել, իր մտածողության, իր հետաքրքրությունները բավարարող, իր խելքին, իր ճաշակին․․․ Այդպես է ընտրում մարդը։ Եվ հիմա ձևավորված քաղաքային իշխանությունը քաղաքի տրամադրությունների, քաղաքացիների հավաքական կամքի, գիտելիքի արտացոլումն է»,- ասել է ժուռնալիստների «Ասպարեզ» ակումբի խորհրդի նախագահ Լևոն Բարսեղյանը։

Հիմա քաղաքային իշխանություն կձևավորվի 5 կուսակցություններով։ Ավագանու 33 անդամները ձևավորելու են ավագանի ու ընտրելու են քաղաքապետ։ Ամենաշատ ձայներ ստացած «Բալասանյան դաշինք» սոցիալական կուսակցության ցուցակը գլխավորող թեկնածուն հայտարարություն էր տարածել ու նշել էր, որ  հակված են ստեղծել եզակի համագործակցության հարթակ ու պատրաստ են համագործակցել ընտրությունների մասնակցած բոլոր ուժերի հետ։

Նոր քաղաքապետ ընտրվելու է նորընտիր ավագանու առաջին նիստում։ Իսկ մինչ այդ, հոկտեմբերի 24-ին, կատարվելու է մանդատների բաշխում։ Անցողիկ շեմը հաղթահարած կուսակցություններից ով քանի մանդատ է ստանալու, դեռ հաշվարկները հրապարակված չեն, մի բան հաստատ է՝ առավելագույն ձայներ ստացած ուժը միայնակ քաղաքապետ ընտրելու հնարավորություն չունի։