Քննիչն ուշացրել է քննչական բոլոր գործողությունները, իսկ ամսաթվերը՝ կեղծել. ՀՔԾ

Հատուկ քննչական ծառայությունում քննվող քրեական գործի նախաքննությամբ հիմնավորվել է, որ Դ. Հ.-ն 2016թ.-ի նոյեմբերի 23-ից մինչև 2017թ.-ի հոկտեմբերի 10-ը, աշխատելով ՔԿ Արարատի մարզային քննչական վարչության Մասիսի քննչական բաժնի ավագ քննիչի պաշտոնում, իր վարույթում քննված քրեական գործով տևական ժամանակ քննչական և դատավարական գործողություններ չկատարելու հանգամանքները քողարկելու, իր ծառայողական պարտականությունները բարեխիղճ կատարելու պատրանք ստեղծելու անձնական դրդումներով կատարել է պաշտոնեական կեղծիքներ:

ՀՔԾ-ից հայտնում են, որ Արարատի մարզի Նորաբաց գյուղում գտնվող առանձնատնից 2016թ.-ի դեկտեմբերի 28-ին կատարված առանձնապես խոշոր չափերով գողության վերաբերյալ քրեական գործի նախաքննության ընթացքում Դ. Հ.-ն  սեփականատեր Ռ. Մ.-ին և նրա կնոջը ժամանակին չի հարցաքննել, դատահետքաբանական փորձաքննություն չի նշանակել: Դեպի հանգամանքներ քողարկելու նպատակով  նա 30.01.2017թ.-ի հունվարի 30-ին արձանագրություններ է կազմել, որոնցում ակնհայտ կեղծ գրառումներ է մտցրել, թե, իբր, դրանք կազմվել են 2016թ.-ի դեկտեմբերի 29-ին` առանձնատնից կատարված գողության դեպքի հաջորդ օրը:

2017թ.-ի դեկտեմբերի 31-ին քննիչը կազմել է տուժողի կնոջ հարցաքննության և առանձնատան մուտքի դռան փականն ու բանալիները առգրավելու մասին արձանագրություններ, որոնցում ակնհայտ կեղծ տեղեկություններ է մտցրել դրանց կատարման օրվա, ժամի և վայրի վերաբերյալ: Ընդ որում, առգրավման վերաբերյալ կազմված արձանագրությունում որպես ընթերակա նշել է մտացածին անձանց տվյալներ և դրել կեղծ ստորագրություններ:

Դ. Հ.-ն կազմել է նաև դատահետքաբանական փորձաքննություն նշանակելու մասին որոշում, որում ևս մտցրել է ակնհայտ կեղծ տեղեկություններ: Իր կողմից կատարված կեղծիքները քողարկելու նպատակով Մասիսի քննչական բաժնի` ելքի փաստաթղթերի գրանցման գրքում նա նշել է, թե իբր, դատահետքաբանական փորձաքննություն նշանակելու մասին որոշումը ելքագրվել է 2017թ.-ի հունվարի 9-ին: Քննիչը  2017 թվականի փետրվարին այցելել է Նորաբաց գյուղ, որտեղ կազմել է վկաների հարցաքննության արձանագրություններ, ու նշել, թե դրանք կազմվել են 2016թ.-ի դեկտեմբերի 30-ին` գողության դեպքից երկու օր հետո:

Իսկ 2017թ. փետրվարին` քրեական գործով վկայի հարցաքննության ընթացքում տեղեկանալով, որ վերջինս տուժողի տան դիմաց նկատել է կասկածելի ավտոմեքենա, Դ. Հ.-ն նրան դեպքից տևական ժամանակ անց հարցաքննելու և մատնանշված ավտոմեքենայի` գողության դեպքի հետ առնչությունը պարզելու ուղղությամբ անհրաժեշտ անհետաձգելի միջոցառումներ չիրականացնելու հանգամանքները թաքցնելու նպատակով` վկայի հարցաքննության արձանագրությունում մտցրել է ակնհայտ կեղծ տեղեկություններ, թե իբր, վերջինս գողության դեպքի օրը գտնվել է տանը և տուժողի տան մոտ կասկածելի ավտոմեքենաներ չի նկատել:

Դ. Հ.-ն ակնհայտ կեղծ տեղեկություններ է ներառել նաև  գողության կատարման մեջ կասկածվող անձանց հեռախոսահամարների վերծանումների զննության արձանագրությունում` նշելով, թե, իբր, գործողության կատարմանը ներկա են գտնվել երկու ընթերականեր, ինչպես նաև դրել է կեղծ ստորագրություններ: 

Բացի այդ, Դ. Հ.-ն, ստանալով գողության կատարման մեջ կասկածվող անձանց բնակարաններում խուզարկություններ կատարելու թույլտվության մասին դատարանի որոշումները, կազմել է խուզարկությունների կատարման վերաբերյալ 3 կեղծ արձանագրություններ, թե, իբր, նշված անձանց բնակարաններում խուզարկություններ է կատարել, սակայն դրանցում ոչինչ չի հայտնաբերել: Միաժամանակ, նշված արձանագրություններում որպես ընթերակա նշել է մտացածին անձանց տվյալներ և դրել կեղծ ստորագրություններ:

Մասիսի քննչական բաժնի նախկին ավագ քննիչ Դ. Հ.-ին մեղադրանք է առաջադրվել 5 տարբեր դրվագներով պաշտոնեական կեղծիքներ կատարելու համար: