Շիրակի մարզի գյուղերում բնակարանաշինական պետական ծրագիրն ավարտական փուլում է

Շիրակի մարզի գյուղական բնակավայրերում կառուցվող տների շինարարությունը ավարտական փուլում է։ Մարզի 7 գյուղերում 25 բնակարան է կառուցվում։ Ծրագրում ընդգրկվել են անօթևան այն ընտանիքները, որոնք հրաժարվել են բնակարանների գնման վկայագրերից։ Իսկ բնակարանաշինության համար ընտրվել է տարբերակ, որտեղ կարևոր պայման է շինաշխատանքներին տանտիրոջ մասնակցությունը։ Այսինքն՝ կառուցման սկզբից մինչև վերջ տանտերը պետք է մասնակցի շինաշխատանքներին՝ որպես շինարար, կամ էլ ինքն ընտրի իր տան շինարարին։ 7 գյուղերում բնակարանաշինությունն արժեցել է 310 մլն դրամ։

Նոր տան կառուցում՝ հնի հարևանությամբ, կորցրած սենյակների թվով ու տանտիրոջ մասնակցությամբ։ Այսպիսին են գյուղական բնակավայրերում բնակարանաշինության պայմանները։ Իսկ շահառուներն այն ընտանիքներն են, որոնք երկրաշարժին տուն են կորցրել, կամ այն դարձել է վթարային։

Անի խոշորացված համայնքի Գուսանագյուղում 7 անօթևան ընտանիք է հաշվառված եղել։ Բնակապահովման տարբերակի ընտրության հարցում կարծիքները կիսվել են։ 4 ընտանիք ընտրել է ԲԳՎ, 3-ը՝ շինարարություն։

Ներքին հարդարման աշխատանքներում տանտիրոջ ցանկությամբ ու ֆինանսական ներդրումներով փոփոխություններ թույլատրվել են։ Ըստ պայմանագրի, եթե շինարարին ընտրում է տանտերը, ուրեմն և որակի պատասխանատուն ինքն է։ Պայմանագրային այս կետի հետ չի համաձայնել նույն գյուղի բնակիչ Գևորգ Վարդանյանը։ Պահանջել է տան շինարարությունը ոչ թե իրեն հանձնարարել, այլ պետական միջոցներով տունը կառուցել ու հանձնել իրեն։ Գևորգ Վարդանյանը բացատրում է՝ ինքը ոչ թե հրաժարվել է բնակարանաշինական ծրագրից, այլ չի համաձայնել առաջարկվող պայմաններին։

«Պայմանագրով նշված էր, որ ես պետք է հանդիսանամ իմ տան շինարարության աշխղեկը, հաշվապահը և շինարարության որակի համար պատասխանատու անձը։ Ես նման մասնագիտական կարողություններ չունեմ, հրաժարվեցի։ Պահանջեցի օրենքով պայմանագիր կնքել, ինչպես սահմանված է ՀՀ Սահմանադրությունում։ Կառավարության որոշմամբ՝ շինարարության կազմակերպական և իրավաբանական աշխատանքները դրված են մարզպետարանի վրա։ Մարզպետարանն իրավունք չունի կառավարության որոշմամբ իր վրա դրված պարտականությունները դնել շահառուի վրա»,- Shantnews-ին ասել է Գուսանագյուղի բնակիչ Գևորգ Վարդանյանը։

Քննարկումների արդյունքում որոշում է կայացվել Վարդանյանների տունը չկառուցելու մասին։ 1 տան ֆինանսական հատկացումը կվերադարձվի պետական բյուջե, իսկ ընտանիքը կշարունակի մնալ անօթևանության հերթացուցակում։ Մյուս 25 տների շինարարությունն ավարտական փուլում է։

«25 տուն է կառուցվում, որից 23-ի շինարարությունը գրեթե ավարտված է, 2-ի կառուցումն ընթացքի մեջ է։ Ընկերությունը խոստացել է մինչև տարեվերջ ավարտել գործը։ 23 ընտանիքները մասնակի բնակվում են նորակառույց տներում։ Գյուղերում տնակների թիվը պակասել է։ Ի սկզբանե մարզում մոտ 3500 տնակ էինք հաշվառել։ Այս թիվը նվազել է։ Գյուղերում այն ընտանիքները, որոնք բնակարան են ձեռք բերել, ապամոնտաժել են տնակները»,- Shantnews-ին ասել է Շիրակի մարզպետարանի քաղաքաշինության վարչության պետի պարտականությունները կատարող Խաչատուր Խնձրցյանը։

Բնակարանաշինական ու բնակարանի գնման վկայագրերի ծրագրերի արդյունքում գյուղերում տնակների թիվ է պակասել։ Նրանք, ովքեր տուն են գնել կամ արդեն նորակառույց են տեղափոխվել, տնակներն ապամոնտաժել են։ Ժամանակավոր կացարանների հաշվառման արդյունքներն ամփոփելուց հետո պարզ կդառնա, թե գյուղերում ինչքան տնակներ են մնացել, ու քանիսի նկատմամբ պետությունը պարտավորություն ունի։ Համաձայն հաշվառման՝ Շիրակի մարզում 3495 տնակ կա։ Այս թվում՝ 2813-ը Գյումրիում է։